କୋଲକାତା: ପଶ୍ଚିମ ବଙ୍ଗରେ ‘ଜୟ ଶ୍ରୀରାମ’ ନାରା ଦେଉଥିବା ବିଜେପି କର୍ମୀଙ୍କ ଉପରେ ପୋଲିସର ଲାଠିଚାର୍ଜ । ଉତ୍ତର 24 ପରଗନା ଜିଲ୍ଲାର କାଚନାପାଡା ଅଞ୍ଚଳରେ ଶନିବାର ଘଟିଛି ଏଭଳି ଘଟଣା । ଏଠାରେ ଶାସକ ଦଳ ତୃଣମୂଳ କଂଗ୍ରେସର ବୈଠକ ଆରମ୍ଭ ହେବା ପୂର୍ବରୁ ବିଜେପି କର୍ମୀମାନେ ‘ଜୟ ଶ୍ରୀରାମ’ ନାରା ଦେଇ ରାସ୍ତା ଅବରୋଧ କରିବାକୁ ପ୍ରୟାସ କରୁଥିଲେ ।
ସୂଚନା ଅନୁସାରେ ଟିଏମସିର ବୈଠକ ହେବା ପୂର୍ବରୁ ଦଳୀୟ ନେତାମାନେ ଉକ୍ତ ମାର୍ଗ ଦେଇ ଆସୁଥିଲେ । ଏହି ସମୟରେ ବିଜେପି କର୍ମୀମାନେ ରାସ୍ତା ଅବରୋଧ କରିବାକୁ ଚେଷ୍ଟା କରୁଥିଲେ । ପୋଲିସ ତାଙ୍କୁ ରାସ୍ତାରୁ ହଟାଇବାକୁ ଚେଷ୍ଟା କଲେ ସୁଦ୍ଧା ବିଜେପି କର୍ମୀ ମାଡି ଆସୁଥିଲେ । ଉକ୍ତ ଭିଡକୁ ନିୟନ୍ତ୍ରଣ କରିବା ଲାଗି ପୋଲିସ ପକ୍ଷରୁ ତୁରନ୍ତ ବଳ ପ୍ରୟଗ କରାଯାଇ କାର୍ଯ୍ୟାନୁଷ୍ଠାନ ଜାରି କରାଗଲା ।
ଏନେଇ ଜଣେ ବିଜେପି କର୍ମୀଙ୍କ କହିଛନ୍ତି, ‘କାଚନାପାଡା ଥାନା ମୋରେସ୍ଥିତ ଯେଉଁ ପାର୍ଟି କାର୍ଯ୍ୟାଳୟ ରହିଛି ତାହା ବିଜେପି ନେତା ମୁକୁଲ ରାୟଙ୍କର ପୁଅ ଶୁଭ୍ରାଂଶୁ ରାୟଙ୍କର । ସେ ବିଜେପିରେ ଯୋଗ ଦେବା ପରେ ଟିଏମସି ଉକ୍ତ କାର୍ଯ୍ୟାଳୟକୁ ନିଜ ହାତକୁ କବଜା କରିବାକୁ ଚାହୁଁଛି । କିନ୍ତୁ ଏହା ଆମେ କରିବାକୁ ଦେବୁ ନାହିଁ ।’
ଏନେଇ ଅଗ୍ନିଶମ ବିଭାଗର ମନ୍ତ୍ରୀ ସୁଜିତ ବୋସ କହିଛନ୍ତି, ‘ବଙ୍ଗଳାରେ ମମତା ବାନାର୍ଜୀ ସରକାର ଜାରି ରହିବ । ବିଜୟ ଏବଂ ପରାଜୟ କେବଳ ଲୋକତନ୍ତ୍ରରେ ହେବ । ଲୋକେ ଜୟ ଶ୍ରୀରାମ ନାରା ଦେଇପାରିବେ । କାରଣ ଆମେ ସେହି ସଂସ୍କୃତିକୁ ବିଶ୍ବାସ କରୁ । କିନ୍ତୁ ଲୋକେ ଯଦି ଦୁର୍ବ୍ୟବହାର କରି ରାସ୍ତା ଅବରୋଧ କରିବେ ତେବେ ପୋଲିସ ମଧ୍ୟ ନିଜ କାମ କରିବାକୁ ବାଧ୍ୟ ହେବ ।’
