ଜବଲପୁର: ଆଜି ଜାତୀୟ କ୍ରୀଡ଼ା ଦିବସ । ମହାନ ହକି ଖେଳାଳି ମେଜର ଧ୍ୟାନଚାନ୍ଦଙ୍କ ଜୟନ୍ତୀ ଅବସରରେ ପ୍ରତିବର୍ଷ ଆଜିର ଦିନକୁ ଜାତୀୟ କ୍ରୀଡ଼ା ଦିବସ ଭାବେ ପାଳନ କରାଯାଉଛି । ହେଲେ ଏହି ମହାନ ଯାଦୁଗରଙ୍କୁ ଦେଶର ସର୍ବୋଚ୍ଚ ବେସାମରିକ ସମ୍ମାନ ଭାରତ ରତ୍ନ ପ୍ରଦାନ ଲାଗି ଦୀର୍ଘ ଦିନଧରି ଦାବି ହୋଇ ଆସୁଥିଲେ ମଧ୍ୟ ସରକାର କର୍ଣ୍ଣପାତ କରୁନାହାନ୍ତି । ବାରମ୍ବାର ଭାରତ ରତ୍ନ ପାଇଁ ହେଉଥିବା ଦାବି ପ୍ରତ୍ୟାଖ୍ୟାତ ହେଉଛି ବୋଲି କ୍ଷୋଭର ସହ ପ୍ରକାଶ କରିଛନ୍ତି କିମ୍ବଦନ୍ତୀ ହକି ପୁରୁଷ ମେଜର ଧ୍ୟାନଚାନ୍ଦଙ୍କ ସୁପୁତ୍ର ଅଶୋକ କୁମାର । ମେଜର ଧ୍ୟାନଚାନ୍ଦଙ୍କ ପୁଅ ବିଶିଷ୍ଟ ହକି ଖେଳାଳି ତଥା ଅର୍ଜ୍ଜୁନ ପୁରସ୍କାରପ୍ରାପ୍ତ ଅଶୋକ କୁମାର ଧ୍ୟାନଚାନ୍ଦଙ୍କ ଇଟିଭି ଭାରତ ସହ ଆଲୋଚନା କରିଛନ୍ତି ।
ଅଶୋକ କୁମାର କହିଛନ୍ତି ଯେ, ସମଗ୍ର ବିଶ୍ବ ଧ୍ୟାନଚାନ୍ଦଙ୍କ ହକି ଅବଦାନକୁ ସ୍ବୀକାର କରୁଛି । ବିଶ୍ବ କ୍ରୀଡ଼ାରେ ଭାରତ ପାଇଁ ସେ ସ୍ବତନ୍ତ୍ର ପରିଚୟ ସୃଷ୍ଟି କରିଥିଲେ । ହେଲେ ତାଙ୍କ ଏହି ଅବଦାନକୁ ସରକାର ବୁଝି ପାରୁନାହାନ୍ତି । । ଭାରତ ସର୍ବାଧିକ ୮ ଥର ଅଲିମ୍ପିକ ସ୍ବର୍ଣ୍ଣ ପଦକ ଜିତି ବିଶ୍ବ କୀର୍ତିମାନ କରିଥିବା ବେଳେ ଧ୍ୟାନଚାନ୍ଦ ଏହାର ପ୍ରଥମ ୩ ସଂସ୍କରଣ (୧୯୨୮-ଆମଷ୍ଟରଡାମ, ୧୯୩୨-ଲସ୍ ଏଞ୍ଚେଲ୍ସ, ୧୯୩୬-ବର୍ଲିନ)ରେ ଭାରତ ପାଇଁ ସ୍ବର୍ଣ୍ଣ ପଦକ ଜିତିଥିଲେ । ଅଶୋକ କହିଛନ୍ତି ସେ ଧ୍ୟାନ ସିଂହ ହୋଇ ସେ ହକି ପଡିଆକୁ ଓହ୍ଲାଇଥିଲେ ମାତ୍ର ପରେ ସେ ଧ୍ୟାନଚାନ୍ଦ ହୋଇ ନୂତନ ପରିଚୟ ସୃଷ୍ଟି କରିଥିଲେ ।
1956ରେ ଧ୍ୟାନଚାନ୍ଦ ପ୍ରଥମ ବ୍ୟକ୍ତି ଭାବରେ ପଦ୍ମ ବିଭୂଷଣରେ ସମ୍ମାନିତ ହୋଇଥିଲେ । ଇଂରେଜ ଅମଳଠାରୁ ଆରମ୍ଭ କରି ସ୍ବାଧୀନ ଭାରତ ପର୍ଯ୍ୟନ୍ତ ଦୀର୍ଘ ଅଢ଼େଇ ଦଶନ୍ଧି ଧରି ଧ୍ୟାନଚାନ୍ଦ ଥିଲେ ଭାରତୀୟ ହକିର ଅପ୍ରତିଦ୍ବନ୍ଦ୍ବୀ ନାୟକ । ହେଲେ ତାଙ୍କୁ ଏ ପର୍ଯ୍ୟନ୍ତ ଭାରତ ରତ୍ନ ନ ମିଳିବା ଏକ ଆଶ୍ଚର୍ଯ୍ୟ ଜନକ ବିଷୟବସ୍ତୁ ବୋଲି କହିଛନ୍ତି ଅଶୋକ ଧ୍ୟାନଚାନ୍ଦ ।
ଏହାସହ ପୂର୍ବ ଭଳି ହକି ଆଉ ଖେଳା ଯାଉନାହିଁ । ଅନେକ ନିୟମ ପରିବର୍ତ୍ତନ ହୋଇଛି । ବର୍ଷ ବର୍ଷ ଧରି ପରିଶ୍ରମ ପରେ ବି ଭାରତ ଅଲମ୍ପିକ୍ ଓ ଏସିଆଡ୍ରେ ପଦକ ନ ଜିତିବା କଥା ନେଇ ବ୍ୟଥିତ ଥିବା କହିବା ସହ ଉଦ୍ୟମ ଜାରି ରହିବି ଆବଶ୍ୟକ ବୋଲି ପରାମର୍ଶ ଦେଇଛନ୍ତି ।
ଏତତ୍ବ୍ୟତୀତ ଅଗଷ୍ଟ 29ରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଦ୍ବାରା ‘ଫିଟ୍ ଇଣ୍ଡିଆ’ଅଭିଯାନକୁ ପ୍ରଶଂସା କରିଛନ୍ତି । ଦୈନନ୍ଦିନ ଜୀବନରେରେ ହେଉ ଅବା କ୍ରୀଡା କ୍ଷେତ୍ରରେ ସଫଳ ରହିବା ପାଇଁ ଫିଟ୍ ରହିବା ଅବଶ୍ୟକ ବୋଲି ସେ କହିଛନ୍ତି ।
