ନୂଆଦିଲ୍ଲୀ: ଦିଲ୍ଲୀବାସୀଙ୍କୁ ପୁଣି ଉପହାର ଦେଲେ ଦିଲ୍ଲୀ ସରକାର । ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲା ମହିଳାଙ୍କ ପାଇଁ ବସ ଟିକଟ ମାଗଣା ଘୋଷଣା କରିବା ପରେ ରାଜଧାନୀରେ ମାଗଣା ୱାଇଫାଇ ଘୋଷଣା କରିଛନ୍ତି । ଦିଲ୍ଲୀବାସୀଙ୍କୁ ଡେସମ୍ବର 16 ରୁ ଫ୍ରି ୱାଇଫାଇ ମିଳିବ । ଏଠାରେ ବଡ଼ କଥା ହେଲା ଇଣ୍ଟରନେଟ ବ୍ୟବହାରକାରୀଙ୍କୁ ପ୍ରତି ମାସ 15 ଜିବି ଡାଟା ମିଳିବ ।
ସୂଚନା ଥାଉକି ଆମ ଆଦମୀ ପାର୍ଟି ନିର୍ବାଚନ ଘୋଷଣାପତ୍ରରେ ଦିଲ୍ଲୀବାସୀଙ୍କୁ ଫ୍ରି ୱାଇଫାଇ ଦିଆଯିବ ବୋଲି ଘୋଷଣା କରାଯାଇଥିଲା । ବୁଧବାର ମୁଖ୍ୟମନ୍ତ୍ରୀ କେଜ୍ରିୱାଲ ଏକ ସାମ୍ବାଦିକ ସମ୍ମିଳନୀ କରି ଫ୍ରି ୱାଇଫାଇ ହଟସ୍ପଟ ଜରିଆରେ ମିଳିବ ବୋଲି ଘୋଷଣା କରିଛନ୍ତି । ଦିଲ୍ଲୀରେ ଏଥିଲାଗି 11 ହଜାର ହଟସ୍ପଟ ଇନଷ୍ଟଲ କରାଯିବ ।
ଏନେଇ କେଜ୍ରିୱାଲ କହିଛନ୍ତି, ‘ପୂର୍ବରୁ ଦିଆଯାଇଥିବା ପ୍ରତିଶୃତି ପୂରଣ ହେବାକୁ ଯାଉଛି । ଏହା ପ୍ରଥମ ସରକାର ଯିଏ କି ଜନତାଙ୍କୁ ଦେଇଥିବା ପ୍ରତିଶୃତି ପାଳନ କରୁଛି । ଫ୍ରି ୱାଇଫାଇ ଜରିଆରେ ବିଦ୍ୟାର୍ଥୀ ଏବଂ ସ୍ବାସ୍ଥ୍ୟ କ୍ଷେତ୍ରରେ ବହୁତ ସାହାଯ୍ୟ ମିଳିବ । ସମସ୍ତେ ମାଗଣାରେ ଏହାର ଲାଭ ଉଠାଇ ପାରିବେ ।’
