ଶ୍ରୀନଗର: ଜମ୍ମୁ-କାଶ୍ମୀରସ୍ଥିତ ନିୟନ୍ତ୍ରଣ ରେଖା ନିକଟରେ ପୁଣିଥରେ ଅସ୍ତ୍ରବିରତି ଉଲଙ୍ଘନ କରିଛି ପାକିସ୍ତାନ। ଭାରତୀୟ ସୀମାକୁ ଟାର୍ଗେଟ କରି ପାକିସ୍ତାନ ପଟୁ ହୋଇଥିବା ଗୁଳିବିନିମୟରେ ସେନାର 2ଜଣ ଯବାନ ଶହୀଦ ହୋଇଛନ୍ତି। ଏଥିରେ ଅନ୍ୟ 2 ଜଣ ଯବାନ ଆହତ ହୋଇଥିବା ଜଣାପଡିଛି। ଶହୀଦ ଯବାନ ସେନାରେ ପୋର୍ଟର ଭାବେ କାର୍ଯ୍ୟରତ ଥିଲେ।
ଶୁକ୍ରବାର ପ୍ରାୟ 11ଟା ସମୟରେ ପାକିସ୍ତାନ ସେନା ପକ୍ଷରୁ ପୁଞ୍ଚ ଜିଲ୍ଲାର ଗୁଲପୁର ସେକ୍ଟରରେ ଗୁଳିବିନିମୟ କରାଯାଇଥିଲା । ଭାରତୀୟ ସୀମାକୁ ଲକ୍ଷ୍ୟ କରି ପାକିସ୍ତାନ ସୈନିକ ମୋର୍ଟାର ମାଡ କରିଥିଲେ । ପାକିସ୍ତାନର ଏହି ଆକ୍ରମଣରେ 2 ଜଣ ଯବାନ ଶହୀଦ ହୋଇଥିବା ବେଳେ ଅନ୍ୟ 2 ଜଣ ଆହତ ହୋଇଛନ୍ତି। ସେପଟେ ପାକିସ୍ତାନର ଏହି ହରକତର ଜବାବ ଦେଉଛନ୍ତି ଭାରତୀୟ ଯବାନ। ଭାରତର ପାଲଟା ଆକ୍ରମଣରେ ପାକିସ୍ତାନ ସୈନ୍ୟ ଶିବିରରେ ଭାରିମାତ୍ରାରେ କ୍ଷୟକ୍ଷତି ହୋଇଥିବା ଖବର ମିଳିଛି।
