ନୂଆଦିଲ୍ଲୀ: ଭାରତ-ପାକ ମଧ୍ୟରେ ଲାଗି ରହିଥିବା ଉତ୍ତେଜନା କେବେ ଚରମ ରୂପରେ ରୂପାନ୍ତରିତ ହୋଇ ଯୁଦ୍ଧ ପରିସ୍ଥିତି ସୃଷ୍ଟି ହେବ ତାର ଠିକଠିକଣା ନାହିଁ । ଏହିଭଳି ପରିସ୍ଥିତିରେ ସେନାକୁ ସଜାଗ ଓ ସତର୍କ ହୋଇ ରହିବା ପାଇଁ କହିଛନ୍ତି ସ୍ଥଳସେନା ମୁଖ୍ୟ ବିପିନ ରାୱତ । ଯେ କୌଣସି ପ୍ରତିକୂଳ ପରିସ୍ଥିତିର ମୁକାବିଲା କରିବା ଓ ପ୍ରତିପକ୍ଷକୁ କଡାଜବାବ ଦେବା ପାଇଁ ସେନାକୁ ଜାଗ୍ରତ ହୋଇ ରହିବା ପାଇଁ କହିଛନ୍ତି ବିପିନ ରାୱତ ।
ମିଳିଥିବା ସୂଚନା ଅନୁସାରେ ସ୍ଥଳସେନା ମୁଖ୍ୟ ବିପିନ ରାୱତ ଗୁରୁବାର ଦିନିକିଆ ଜମ୍ମୁକାଶ୍ମୀର ଓ ରାଜସ୍ଥାନ ଗସ୍ତରେ ଯାଇଛନ୍ତି । ରାୱତ ନିୟନ୍ତ୍ରଣ ରେଖା (ଏଲ୍ଓସି) ତଥା ରାଜସ୍ଥାନର ସୀମା ସଲଗ୍ନ ଚେକ୍ ପୋଷ୍ଟରେ ନିୟୋଜିତ ଯବାନଙ୍କ ପ୍ରସ୍ତୁତି ସମ୍ପର୍କରେ ସମୀକ୍ଷା କରିଛନ୍ତି । ଏହାସହ ରାୱତ ସେନା ସହ ବିଭିନ୍ନ ପ୍ରସଙ୍ଗରେ ଆଲୋଚନା କରିଛନ୍ତି । ଏଥିସହ ସେନାକୁ ସବୁବେଳେ ପ୍ରସ୍ତୁତ ରହିବାକୁ ଓ ବାୟୁସେନା ସହ ତାଳମେଳ ରକ୍ଷା କରିବା ପାଇଁ ରାୱତ କହିଛନ୍ତି ।
ଏଠାରେ ସୂଚନା ଯୋଗ୍ୟ ଯେ ପୁଲୱାମା ପ୍ରତିଶୋଧ ନେବା ପାଇଁ ବ୍ୟଗ୍ର ଥିବା ଭାରତୀୟ ବାୟୁ ସେନା ପିଓକେରେ ପଶି 26 ଫେବୃଆରୀ ମଙ୍ଗଳବାର ୧୦୦୦ କେଜିର ବୋମା ପକାଇ ଶତ୍ରୁ ଶିବିର ଉପରେ ଜବରଦସ୍ତ ଆକ୍ରମଣ କରିଥିଲା । ଏହି ଆକ୍ରମଣରେ ଜୈଶ-ଏ-ମହମ୍ମଦର ଆଡ୍ଡା, କଣ୍ଟ୍ରୋଲ ରୁମ, ଟ୍ରେନର, କମାଣ୍ଡରଙ୍କ ସମେତ କ୍ୟାମ୍ପ ଗୁଡିକୁ ଧ୍ବଂସ ହୋଇଥିବା ବେଳେ 350ରୁ ଊର୍ଦ୍ଧ୍ବ ଆତଙ୍କବାଦୀ ନିହତ ହୋଇଥିବାର ଖବର ରହିଛି । ଏହାପରେ ଭାରତ ବାୟୁସେନା ଓ ପାକିସ୍ତାନ ବାୟୁସେନା ସହ ମୁହାଁମୁହିଁ ଲଢେଇରେ ଭାରତୀୟ ମିଗ-21 ପାକିସ୍ତାନର ଏଫ୍-16କୁ ଧ୍ବସଂ କରିଥିଲା । ଏହାପରଠାରୁ ଦୁଇ ଦେଶ ମଧ୍ୟରେ ଅଘୋଷିତ ଯୁଦ୍ଧ ପରିସ୍ଥିତ ସୃଷ୍ଟି ହୋଇଛି ।
ଏହା ବ୍ୟତୀରେକ ପାକିସ୍ତାନ ବାରମ୍ବାର ସୀମାରେ ଅସ୍ତ୍ରବିରତୀ ଉଲ୍ଲଂଘନ କରୁଛି । ଏଭଳି ସମୟରେ ପାକିସ୍ତାନରୁ ପରିଚାଳିତ ଆତଙ୍କବାଦୀ ଆକ୍ରମଣକୁ ମଧ୍ୟ ଅଣଦେଖା କରାଯିବ ନାହିଁ ବୋଲି କହିଛନ୍ତି ସ୍ଥଳସେନା ମୁଖ୍ୟ । ଏହି ସମସ୍ତ ଦିଗକୁ ବିଚାର କରି ସେନାକୁ ପ୍ରସ୍ତୁତ ହୋଇ ରହିବା ପାଇଁ କହିଛନ୍ତି ବିପିନ ରାୱତ ।
