ନୂଆଦିଲ୍ଲୀ: ବାରଣାସୀରୁ କଂଗ୍ରେସ ମହାସଚିବ ପ୍ରିୟଙ୍କା ଗାନ୍ଧି ନିର୍ବାଚନ ଲଢିବା ନେଇ ଯେଉଁ ଚର୍ଚ୍ଚା ହୋଇଥିଲା, ସେଥିରେ ପୁନଚ୍ଛେଦ ପଡିଛି । ପ୍ରିୟଙ୍କା ନୁହେଁ, 2014ର ପ୍ରାର୍ଥୀ ଅଜୟ ରାୟଙ୍କୁ ପ୍ରାର୍ଥୀ କରିଛି କଂଗ୍ରେସ । ପ୍ରଧାନମନ୍ତ୍ରୀ ମୋଦିଙ୍କୁ ସାମ୍ନା କରିବେ ଅଜୟ ।
2014ରୁ ଏହି ଆସନରୁ ପ୍ରତିନିଧିତ୍ବ କରୁଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଏଥର ବି ସେ ଏହି ଆସନରୁ ନିର୍ବାଚନ ଲଢିବେ । ଏନେଇ ଆସନ୍ତାକାଲି ନାମାଙ୍କନ ଭରିବେ ମୋଦି । ଅନ୍ୟପଟେ ବାରଣାସୀ ପାଇଁ ଆଜି ପ୍ରାର୍ଥୀ ଘୋଷଣା କରିଛି କଂଗ୍ରେସ । ଅଜୟ ରାୟଙ୍କୁ ଦଳ ପ୍ରାର୍ଥୀ କରିଛି ।
ପୂର୍ବରୁ ଏହି ଆସନରୁ କଂଗ୍ରେସ ମହାସଚିବ ତଥା ରାହୁଲଙ୍କ ଭଉଣୀ ପ୍ରିୟଙ୍କା ନିର୍ବାଚନ ଲଢିବା ନେଇ ଚର୍ଚ୍ଚା ସରଗରମ ହୋଇଥିଲା । ରାହୁଲ ମଧ୍ୟ ସିଧାସଳଖ ଚର୍ଚ୍ଚାକୁ ଏଡାଇ ଦେଇନଥିଲେ । ମୋଦି ବନାମ ପ୍ରିୟଙ୍କା, ସୋସିଆଲ ମିଡିଆରେ ଏଭଳି କିଛି ଚର୍ଚ୍ଚା ଜୋର ଧରିଥିଲା ।
