ରାୟପୁର: କୃଷକଙ୍କ ପାଇଁ ଗଣ୍ଡା ଗଣ୍ଡା ଯୋଜନା କରୁଛନ୍ତି ସରକାର । ସମାନ୍ତରାଳ ଭାବେ ରାଜ୍ୟର ଉନ୍ନତିକୁ ଲକ୍ଷ୍ୟ କରି ବିଭିନ୍ନ ପ୍ରକାର କମ୍ପାନୀ କାରଖାନା କରିବା ପାଇଁ ଅନୁମତି ଦେଉଛନ୍ତି । ମାତ୍ର ଉକ୍ତ କମ୍ପାନୀ ଗୁଡ଼ିକ ଯୋଗୁଁ ସମସ୍ୟାରେ ପଡ଼ୁଛନ୍ତି ରାଜ୍ୟର ଚାଷୀ । ମାତ୍ର ଏହି ସମସ୍ୟାକୁ ସରକାର ଅଣଦେଖା କରୁଥିବା ଅଭିଯୋଗ ହୋଇଛି ।
ମିଳିଥିବା ସୂଚନା ମୁତାବକ ଛତିଶଗଡ଼ର ରାୟଗଡ଼ ଅଞ୍ଚଳରେ ପରିବେଶ ନିୟମ ଭାଙ୍ଗୁଛି ସ୍ଥାନୀୟ ଷ୍ଟିଲ ଉତ୍ପାଦନକାରୀ କମ୍ପାନୀ । କମ୍ପାନୀରୁ ନିର୍ଗତ ଅପରିଷ୍କାର ଜଳ ଓ ମଇଲା ଚାଷ ଜମିରେ ମାଡ଼ୁଥିବା ଅଭିଯୋଗ କରିଛନ୍ତି ସ୍ଥାନୀୟ ବାସିନ୍ଦା । ଫଳରେ ଚାଷବାସରେ ସମସ୍ୟାର ସମ୍ମୁଖନ ହେଉଥିବା କହିଛନ୍ତି ସେମାନେ ।
ରାୟଗଡ଼ର ପତରାପାଲି ଅଞ୍ଚଳରେ ଥିବା ଷ୍ଟିଲ ଆଣ୍ଡ ପାଓ୍ବାର ଲିମିଟେଡ଼ ପ୍ଲାଣ୍ଟରୁ ଦୈନିକ ହଜାର ହଜାର ଲିଟର ଆବର୍ଜନା ନିର୍ଗତ ହେଉଛି । ଏହା ସହିତ ବହୁଳ ପରିମାଣରେ କୋଇଲା ଗୁଣ୍ଡ ମଧ୍ୟ ଏହି ଜମି ଉପରେ ଜମା ହେଉଛି । ଏହି ଆବର୍ଜନା ନିକଟସ୍ଥ ଚାଷ ଜମିରେ ଦୈନିକ ମାଡ଼ୁଥିବାରୁ ଏକର ଏକର ଚାଷ ଜମିରେ କଳା ରଙ୍ଗର ପାଉଁଶ ପଡ଼ି ରହିଛି । ଫଳରେ ଏକର ଏକର ଜମି ଏବେ ଚାଷ କରିବା ଅନୁପଯୋଗୀ ହୋଇ ପଡ଼ିଛି ।
ଫଳରେ ଚାଷ ଛାଡ଼ି ଏବେ ପ୍ଲାଣ୍ଟ ନିକଟରେ ବସବାସ କରୁଥିବା ଲୋକମାନେ ଏବେ କୋଇଲାରେ ଲଡୁ କରି ତାକୁ ଜାଲେଣି ଭାବେ ବ୍ୟବହାର କରୁଛନ୍ତି । ଏପରିକି କିଛି ବାସିନ୍ଦା ତାହାକୁ ବିକି ଦୈନନ୍ଦିନ ଜୀବିକା ମଧ୍ୟ ଚଳାଉଥିବା ଦେଖିବାକୁ ମିଳିଛି । ଏନେଇ ସ୍ଥାନୀୟ ଚାଷୀମାନେ ପ୍ରଶାସନ ନିକଟରେ ଅଭିଯୋଗ କରିଛନ୍ତି । ମାତ୍ର ଏନେଇ ପ୍ରଶାସନ ପକ୍ଷରୁ କୌଣସି କାର୍ଯ୍ୟାନୁଷ୍ଠାନ ନେଉନଥିବା ଚାଷୀମାନେ କହିଛନ୍ତି ।
ସେପଟେ ଏ ଘଟଣା ସମ୍ପର୍କରେ ତାଙ୍କ ନିକଟରେ କୌଣସି ସୂଚନା ନଥିବା ପ୍ରଶାସନିକ ଅଧିକାରୀମାନେ କହିଛନ୍ତି । ସେମାନେ କହିଛନ୍ତି କି ପ୍ଲାଣ୍ଟରେ ସ୍ବେରେଜ ଟ୍ରିଟମେଣ୍ଟ ପ୍ଲାଣ୍ଟ ଏବା ଏଟିପି ଲଗାଯାଇଛି । ଯଦି କୌଣସି ଅନିୟମିତତା ଦୃଷ୍ଟିକୁ ଆସୁଛି ତେବେ ତାହାର ଯାଞ୍ଚ କରାଯାଇ ପଦକ୍ଷେପ ଗ୍ରହଣ କରାଯିବ ବୋଲି ପ୍ରଶାସନ ପକ୍ଷରୁ ସୂଚନା ଦିଆଯାଇଛି ।
