ଭୋପାଳ: ମଧ୍ୟପ୍ରଦେଶ ପୋଲିସ ହେପାଜତରେ ଜଣେ ଅଭିଯୁକ୍ତ ନିଜକୁ ଗୁଳି କରି ଆତ୍ମହତ୍ୟା କରିବା ପରେ ପାଞ୍ଚ ଜଣ ପୋଲିସ କର୍ମଚାରୀଙ୍କୁ ନିଲମ୍ବିତ କରାଯାଇଛି । ମଙ୍ଗଳବାର ଜଣେ ନାବାଳିକାଙ୍କୁ ଅସଦାଚରଣ ଅଭିଯୋଗରେ ଶୁଭମ ବଇରାଗି (25) ଙ୍କୁ ଗିରଫ କରାଯାଇଥିଲା ବୋଲି ଜବଲପୁର ରେଞ୍ଜର ଇନ୍ସପେକ୍ଟର ଭଗବନ୍ତ ସିଂ ଚୌହାନ କହିଛନ୍ତି ।
ଅଭିଯୁକ୍ତ ଅସ୍ତ୍ରଶସ୍ତ୍ର ଚୋରା କାରବାରରେ ମଧ୍ୟ ସମ୍ପୃକ୍ତ ଥିଲା । ଏହି ଅଭିଯୁକ୍ତକୁ ଧରିବା ପାଇଁ ନିକଟରେ 3000 ଟଙ୍କା ପୁରସ୍କାର ରାଶି ମଧ୍ୟ ଘୋଷଣା କରାଯାଇଥିବା ସେ କହିଛନ୍ତି । ଯେତେବେଳେ ପୋଲିସ ତାକୁ ଅସ୍ତ୍ରଶସ୍ତ୍ର ଲୁଚାଇ ରଖିଥିବା ସ୍ଥାନକୁ ନେଇ ଯାଇଥିଲା ସେଠାରେ ପୂର୍ବରୁ ଲୁଚାଇ ରଖିଥିବା ଏକ ପିସ୍ତଲରେ ନିଜକୁ ଗୁଳି କରିଥିଲା ବୋଲି ଆଇଜିପି କହିଛନ୍ତି । ଶେଷରେ ଏକ ଘରୋଇ ଡାକ୍ତରଖାନାରେ ଚିକିତ୍ସା ସମୟରେ ତାଙ୍କର ମୃତ୍ୟୁ ଘଟିଥିଲା।
ଅବହେଳା କାରଣରୁ ଦୁଇ ସହକାରୀ ସବ୍-ଇନ୍ସପେକ୍ଟରଙ୍କ ସମେତ ପାଞ୍ଚ ଜଣ ପୋଲିସ କର୍ମଚାରୀଙ୍କୁ ନିଲମ୍ବିତ କରାଯାଇଛି ଏବଂ ଏହି ଘଟଣାରେ ନ୍ୟାୟିକ ତଦନ୍ତ ନିର୍ଦ୍ଦେଶ ଦିଆଯାଇଛି ବୋଲି ଚୌହାନ କହିଛନ୍ତି। ପୋଷ୍ଟମର୍ଟମ ପରେ ଅଭିଯୁକ୍ତଙ୍କ ମୃତଦେହ ତାଙ୍କ ପରିବାରକୁ ହସ୍ତାନ୍ତର କରାଯାଇଥିଲା । ଏନେଇ ମୃତକଙ୍କ ପରିବାର ଲୋକ ମୃତ ଦେହକୁ ରାସ୍ତାରେ ରଖି ଏକ ଶୋଭାଯାତ୍ରା କରିବା ସହ ମୃତକଙ୍କ ଭଉଣୀ ସୋନମ ବଇରାଗି ପୋଲିସ କର୍ମଚାରୀଙ୍କ ବିରୋଧରେ ଏକ ହତ୍ୟା ମାମଲା ରୁଜୁ କରିବାକୁ ଦାବି କରିଛି।
ବ୍ୟୁରୋ ରିପୋର୍ଟ, ଇଟିଭି ଭାରତ
