ନୂଆଦିଲ୍ଲୀ: ଉତ୍ତର-ପୂର୍ବ ଦିଲ୍ଲୀରେ ହିଂସା ପରେ ଆମ ଆଦମୀ ପାର୍ଟି ସାଂସଦ ମାନେ ମଙ୍ଗଳବାର ଦିନ ସଂସଦ ପରିସରରେ ମହାତ୍ମା ଗାନ୍ଧୀଙ୍କ ପ୍ରତିମୂର୍ତ୍ତି ନିକଟରେ କେନ୍ଦ୍ର ସରକାର ଓ ଭାରତୀୟ ଜନତା ପାର୍ଟି ବିରୋଧରେ ପ୍ଲାକାର୍ଡ ଧରି ବିକ୍ଷୋଭ ପ୍ରଦର୍ଶନ କରିଛନ୍ତି ।
ବରିଷ୍ଠ ଆପନେତା ତଥା ରାଜ୍ୟସଭା ସାଂସଦ ସଞ୍ଜୟ ସିଂ କହିଛନ୍ତି ଦେଶର ରାଜଧାନୀରେ ଦଙ୍ଗା ସୃଷ୍ଟି କରିଥିବା ଲୋକଙ୍କ ସହ ବିଜେପି ଛିଡା ହୋଇଛି ବୋଲି କେନ୍ଦ୍ର ସରକାର ବାର୍ତ୍ତା ଦେଉଛନ୍ତି । ସରକାର ଏହି ଦଙ୍ଗା ବିଷୟରେ ସଂସଦରେ ଆଲୋଚନା କରିବାକୁ ମନା କରୁଛନ୍ତି । ଦିଲ୍ଲୀ ଦଙ୍ଗାର ନ୍ୟାୟିକ ତଦନ୍ତ ଦାବି କରିଛନ୍ତି ସଞ୍ଜୟ । ସେ ଆହୁରି ମଧ୍ୟ କହିଛନ୍ତି, ଯଦି ଆମେ ଦଙ୍ଗା ଭଳି ଗମ୍ଭୀର ପ୍ରସଙ୍ଗ ଉପରେ ଆଲୋଚନା କରିପାରିବୁ ନାହିଁ ତେବେ ସଂସଦର ମହତ୍ତ୍ବ କଣ । ସେମ୍ବେଦନଶୀଳ ପ୍ରସଙ୍ଗରେ ଉତ୍ତର ଦେବାକୁ କେନ୍ଦ୍ର ସରକାର ପ୍ରସ୍ତୁତ ନୁହଁନ୍ତି । ସେ ପ୍ରଶ୍ନ ଉଠାଇଛନ୍ତି ଏହା ଦ୍ବାରା ଆମେ ଦେଶର ନାଗରିକମାନଙ୍କୁ କେଉଁ ବାର୍ତ୍ତା ଦେଉଛୁ ?
ଏହାପୂର୍ବରୁ ସଞ୍ଜୟ କହିଥିଲେ ଅମିତ ଶାହା ଗୃହମନ୍ତ୍ରୀ ପଦରେ ରହିବାର କୌଣସି ଅଧିକାର ନାହିଁ । ତାଙ୍କ ଅଧୀନରେ ଦୁଷ୍କର୍ମକାରୀମାନେ ଦିନରାତି ଗୁଳି ଚଳାଉଛନ୍ତି, କ୍ୟାମ୍ପସରେ ଛାତ୍ର ଓ ଶିକ୍ଷକଙ୍କୁ ମାଡ ଦିଆଯାଉଛି । ବର୍ତ୍ତମାନ ଯାଏଁ ହିଂସା ପ୍ରଭାବିତ ଅଞ୍ଚଳ ପରିଦର୍ଶନ କରି ନାହାଁନ୍ତି । ତେଣୁ ଦିଲ୍ଲୀ ହିଂସା ଏସଆଇଟି ତଦନ୍ତ ପାଇଁ ସେ ଦାବି କରିଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
