ଇଟ୍ଟାନଗର: ଅରୁଣାଚଳ ପ୍ରଦେଶରେ ଶନିବାର ସୁରକ୍ଷାକର୍ମୀଙ୍କୁ ବଡ ସଫଳତା ମିଳିଛି । ରାଜ୍ୟର ଲଙ୍ଗଡିଙ୍ଗ ଜିଲ୍ଲାରେ ଆସାମ ରାଇଫଲ୍ସର ଏନକାଉଣ୍ଟରରେ 6 ଉଗ୍ରବାଦୀ ନିହତ ହୋଇଛନ୍ତି । ଏହି ଏନକାଉଣ୍ଟରରେ ଆସାମ ରାଇଫଲ୍ସର ଜଣେ ଯବାନ ମଧ୍ୟ ଆହତ ହୋଇଥିବା ଜଣାପଡିଛି ।
ସୂଚନା ଅନୁଯାୟୀ ଅରୁଣାଚଳ ପ୍ରଦେଶର ଲଙ୍ଗଡିଙ୍ଗ ଜିଲ୍ଲାର ନଗିନୁ ଗ୍ରାମ ନିକଟରେ କିଛି ଉଗ୍ରବାଦୀ ଲୁଚି ରହିଥିବା ବିଶେଷ ସୂତ୍ରରୁ ସୂଚନା ମିଳିଥିଲା । ଏହାପରେ ଆସାମ ରାଇଫଲ୍ସ ଏବଂ ଅରୁଣାଚଳ ପ୍ରଦେଶ ପୋଲିସର ମିଳିତ ଟିମ୍ ସକାଳ ପ୍ରାୟ ସାଢେ 4ଟା ସମୟରେ ସର୍ଚ୍ଚ ଅପରେଶନ ଆରମ୍ଭ କରିଥିଲେ । ଏହି ସମୟରେ ଉଗ୍ରବାଦୀମାନେ ସୁରକ୍ଷାକର୍ମୀଙ୍କ ଉପରକୁ ଗୁଳିଚାଳନା କରିଥିଲେ । ଏହାପରେ ଉଭୟପଟୁ ଗୁଳିବିନିମୟ ହୋଇଥିଲା । ଘଟଣାରେ 6 ଜଣ ଉଗ୍ରବାଦୀ ନିହତ ହୋଇଥିଲେ । ସେପଟେ ଆସାମ ରାଇଫଲ୍ସର ଜଣେ ଯବାନ ମଧ୍ୟ ଏହି ଏନକାଉଣ୍ଟରରେ ଆହତ ହୋଇଥିଲେ । ତାଙ୍କୁ ସେନା ଡାକ୍ତରଖାନାକୁ ସ୍ଥାନାନ୍ତର କରାଯାଇଥିବା ଜଣାଯାଇଛି।
ତେବେ ଏହି ଅଭିଯାନରେ ନିହତ ହୋଇଥିବା ସମସ୍ତ ଉଗ୍ରବାଦୀଙ୍କ ସମ୍ପର୍କ ନାଗା ଉଗ୍ରବାଦୀ ସଂଗଠନ ଏନଏସସିଏନ ସହ ଥିବା ଆଶଙ୍କା କରାଯାଉଛି । ଘଟଣାସ୍ଥଳରେ ବହୁ ପରିମାଣରେ ଅସ୍ତ୍ରଶସ୍ତ୍ର ଏବଂ ଅନ୍ୟାନ୍ୟ ଯୁଦ୍ଧ ସାମଗ୍ରୀ ଜବତ ହୋଇଛି । ଉଦ୍ଧାର ହୋଇଥିବା ଅସ୍ତ୍ର ମଧ୍ୟରେ ଚାରିଟି AK-47 ରାଇଫଲ ଏବଂ ଦୁଇଟି ଚାଇନିଜ୍ MQ ମଧ୍ୟ ରହିଛି । ଅନ୍ୟପକ୍ଷରେ ସର୍ଚ୍ଚ ଅପରେଶନ ଜାରି ରହିଥିବା ଅରୁଣାଚଳ ପ୍ରଦେଶ ଡିଜିପି ଆର ପି ଉପାଧ୍ୟାୟ ସୂଚନା ଦେଇଛନ୍ତି ।
