ନୂଆଦିଲ୍ଲୀ: ବଡ ଧରଣର ଅର୍ଥ ହେରଫେର ପରେ ଦେଶ ଛାଡି ପଳାଇଛନ୍ତି 51 ଜଣ ଆର୍ଥିକ ଅପରାଧୀ । ବିଜୟ ମାଲ୍ୟା ଏବଂ ନୀରବ ମୋଦି ଭଳି 51 ଜଣ ଆର୍ଥିକ ଅପରାଧୀ ମୋଟ 17,900 କୋଟି ଟଙ୍କାର ଠକେଇ କରିଥିବା ମଙ୍ଗଳବାର ସଂସଦରେ ସୂଚନା ଦେଇଛନ୍ତି କେନ୍ଦ୍ର ଅର୍ଥ ରାଷ୍ଟ୍ରମନ୍ତ୍ରୀ ଅନୁରାଗ ସିଂହ ଠାକୁର । ରାଜ୍ୟସଭାରେ ଏକ ଲିଖିତ ଉତ୍ତରରେ ସେ ଏହି ସୂଚନା ଦେଇଛନ୍ତି ।
‘ପଳାତକ ଆର୍ଥିକ ଅପରାଧୀ’ ସଂପର୍କିତ ଏକ ପ୍ରଶ୍ନରେ ଲିଖିତ ଉତ୍ତରରେ ସେ କହିଛନ୍ତି, 51 ଜଣ ଆର୍ଥିକ ଅପରାଧୀ ଜାଲିଆତି କରି ଦେଶ ଛାଡି ପଳାଇଛନ୍ତି । ସେମାନଙ୍କ ବିରୋଧରେ ମୋଟ 66ଟି ମାମଲା ରୁଜୁ ହୋଇଛି । ତେବେ ସିବିଆଇ ଏହି ସବୁ ମାମଲାର ତଦନ୍ତ କରୁଥିବା ସେ କହିଛନ୍ତି ।
ଆର୍ଥିକ ସେବା ବିଭାଗର ତଥ୍ୟ ଅନୁସାରେ, ରାଷ୍ଟ୍ରାୟତ୍ତ ବ୍ୟାଙ୍କଗୁଡିକ ପକ୍ଷରୁ ଏମାନଙ୍କୁ ଋଣ ପ୍ରଦାନ କରାଯାଇଥିଲା । ତେବେ ପ୍ରବର୍ତ୍ତନ ନିର୍ଦ୍ଦେଶାଳୟ ପଳାତକ ଆର୍ଥିକ ଅପରାଧୀ ଅଧିନିୟମ, ୨୦୧୮ ଆଧାରରେ ଅଦାଲତରେ ୧୦ ଅଭିଯୁକ୍ତଙ୍କ ବିରୋଧରେ ଆବେଦନ କରିଛି। 8 ବ୍ୟକ୍ତିଙ୍କ ପାଇଁ ଇଡି ଦ୍ଵାରା ପଠାଯାଇଥିବା ପ୍ରତ୍ୟାର୍ପଣ ଅନୁରୋଧ ସମ୍ବନ୍ଧରେ ଇଣ୍ଟରପୋଲ୍ ଦ୍ଵାରା ରେଡ୍ କର୍ଣ୍ଣର ନୋଟିସ୍ ମଧ୍ୟ ଜାରି ହୋଇଛି ବୋଲି ସେ କହିଛନ୍ତି ।
