ନୂଆଦିଲ୍ଲୀ: ଏଠାକାର ଇନ୍ଦିରା ଗାନ୍ଧୀ ଇଣ୍ଟରନ୍ୟାସନାଲ ଏୟାରପୋର୍ଟ(ଆଇଜିଆଇ)ରୁ 10 କେଜିର ଡ୍ରଗ୍ସ ଜବତ ହୋଇଛି । ଏ ଘଟଣାରେ ଜଣେ ମୋଜାମ୍ବିକ ମହିଳାଙ୍କୁ ଗିରଫ କରିଛି ଇଣ୍ଟେଲିଜେନ୍ସ ୟୁନିଟ ଓ ଏୟାର କଷ୍ଟମ ପ୍ରିଭେଣ୍ଟିଭ୍ ଟିମ୍ ।
କଷ୍ଟମ କମିଶନର ମନୀଷ କୁମାରଙ୍କ କହିବା ଅନୁସାରେ, ମହିଳା ଜଣଙ୍କ ଏଡିସ ଅବାବ୍ରୁ ଦିଲ୍ଲୀ ଆସୁଥିଲେ । ହେଲେ ତାଙ୍କ ହାବଭାବ ଯୋଗୁଁ ସେ ସନ୍ଦେହ ଘେରକୁ ଆସିଯାଇଥିଲେ। ଏହାପରେ ତାଙ୍କର ଯାଞ୍ଚ ହୋଇଥିଲା । ଏକ କଳା ପାଇପ ଭଳି ପଲିଥିନ ଭିତରୁ ଧଳା ଧଳା କିଛି ପାଉଡର ବାହାରିଥିଲା ଯାହାର ଓଜନ 10 କିଲୋଗ୍ରାମ ଥିଲା ।
ଏହାର ତଦାରଖ କରିବା ପରେ ଏହା ଡ୍ରଗ୍ସ ବୋଲି ଜଣାପଡିଥିଲା। ଯାହାର ମୂଲ୍ୟ 45 କୋଟିରୁ ଊର୍ଦ୍ଧ୍ବ ହେବ ବୋଲି ଅନୁମାନ କରାଯାଉଛି । ଏ ଘଟଣାରେ କଷ୍ଟମ ବିଭାଗ ଉକ୍ତ ମହିଳାଙ୍କୁ ଗିରଫ କରି ତଦନ୍ତ କରୁଛି।
