ଶ୍ରୀନଗର: ଜମ୍ମୁ ଓ କାଶ୍ମୀର ବଡଗାମ ଅଞ୍ଚଳରୁ 4 ଜଣ ଆତଙ୍କବାଦୀ ସହଯୋଗୀଙ୍କୁ ଗିରଫ କରିଛନ୍ତି ସୁରକ୍ଷାକର୍ମୀ। କୌଣସି ସୂତ୍ରରୁ ଖବର ପାଇ ସୁରକ୍ଷାକର୍ମୀମାନେ ଏହି ଅଞ୍ଚଳରେ ସର୍ଚ୍ଚ ଅପରେସନ ଜାରି ରଖିଥିଲେ। ସେହି ସମୟରେ 4 ଜଣ ସନ୍ଦିଗ୍ଧଙ୍କୁ ଅଟକ ରଖିଥିଲେ ସୁରକ୍ଷାକର୍ମୀ। ଯାଞ୍ଚ ବେଳେ 4 ଜଣ ଲସ୍କର-ଏ-ତୋଏବା ଆତଙ୍କବାଦୀ ସଂଗଠନର ସହଯୋଗୀ ବୋଲି ଜଣା ପଡ଼ିଥିଲା।
ଗିରଫଙ୍କ ନିକଟରୁ ଦୁଇଟି ଚୀନ ଗ୍ରେନେଡ, 30ଟି ଏକେ 7 ରାଉଣ୍ଡ ଗୁଳି, 8ଟି ପିସ୍ତଲ ରାଉଣ୍ଡ ଗୁଳି, ଏକ ମାକ୍ସିନ ପିସ୍ତଲ ଓ ଲସ୍କର-ଏ-ତୋଏବା ଆତଙ୍କୀ ସଂଗଠନର ପତାକା ଜବତ କରିଛନ୍ତି ସୁରକ୍ଷାକର୍ମୀ। ଗିରଫ ଅଭିଯୁକ୍ତମାନେ ହେଉଛନ୍ତି ବାଳାପୁରା ୱାଥୁରା ଅଞ୍ଚଳର ନିଶାର ଅହମ୍ମଦ, ଶେଖପୁରା ୱାଥୁରା ଅଞ୍ଚଳର ତାହିର ଜାହାଙ୍ଗିର ଦାର, କେରଳାପୁରା ଅଞ୍ଚଳର ଆଦିଲ ଅହମ୍ମଦ ୱାନି ଓ ବଶିର ଅହମ୍ମଦ।
ଏନେଇ 180/2020 ଅନ୍ତର୍ଗତ ଏକ ମାମଲା ରୁଜୁ କରିଛି ପୋଲିସ। ଏହାସହ 18, 19, 20, 23 ୟୁଏଲଏ ଧାରା ଲଗାଇଛି ପୋଲିସ। ଅଭିଯୁକ୍ତଙ୍କୁ ନେଇ ଅଧିକ ତଦନ୍ତ ଚଳାଇଛି ପୋଲିସ।
ବ୍ୟୁରୋ ରିପୋର୍ଟ, ଇଟିଭି ଭାରତ
