ଇମ୍ଫାଲ: ମଣିପୁର ଥୌବଲ ଜିଲ୍ଲାରୁ ଗତ ବୁଧବାର ବିପୁଳ ପରିମାଣର ବ୍ରାଉନ ସୁଗାର ଜବତ ହୋଇଛି । ଯାହାର ଆନୁମାନିକ ବଜାର ମୂଲ୍ୟ ପ୍ରାୟ 287 କୋଟି ଟଙ୍କା ହେବ ବୋଲି ଏକ ସରକାରୀ ବିବୃତ୍ତିରୁ ଜଣାପଡିଛି ।
ଆସାମ ରାଇଫଲ୍ସ(ସାମରିକ ବାହିନୀ) ଓ ମଣିପୁର ପୋଲିସର ମିଳିତ ଉଦ୍ୟମ ଦ୍ବାରା ଏହି ବିପୁଳ ପରିମାଣର ଧଳା ଜହର ବା ବ୍ରାଉନ ସୁଗାରକୁ ଜବତ କରାଯାଇଥିଲା । ତେବେ ନଭେମ୍ବର 10 ଓ 11 ତାରିଖରେ ବିପୁଳ ପରିମାଣର ବ୍ରାଉନ ସୁଗାର ରାଜ୍ୟର ଥୌବଲ ଜିଲ୍ଲା ଅନ୍ତର୍ଗତ କମୁଠାରେ ଲୁଚାଇ ରଖାଯାଇଛି ଏବଂ ଏହାକୁ ସାରା ଦେଶର ବିଭିନ୍ନ ସ୍ଥାନରେ ଚାଲାଣ କରାଯିବା ସଂପର୍କରେ ଖବର ଆସାମ ଓ ମଣିପୁର ପୋଲିସର ବିଶ୍ବସ୍ତ ସୁତ୍ରରୁ ମିଳିଥିଲା ।
ତେବେ ଖବର ପାଇବା ପରେ ପୋଲିସ ପକ୍ଷରୁ ରାଜ୍ୟର ବିଭିନ୍ନ ସ୍ଥାନରେ ଛାନଭିନ ଆରମ୍ଭ ହୋଇଯାଇଥିଲା । ରାତ୍ରି ସମୟରୁ ଯାଞ୍ଚ କରାଯିବା ପରେ ନଭେମ୍ବର 11 ତାରିଖ ଭୋର ସମୟରେ 3ଟି ଲୁକାୟିତ ବ୍ୟାଗରୁ ପୋଲିସ 72 କିଲୋଗ୍ରାମର ବ୍ରାଉନ ସୁଗାରକୁ ଜବତ କରାଯାଇଥିଲା । ଏହି ବ୍ରାଉନ ସୁଗାରର ବଜାର ମୂଲ୍ୟ 287 କୋଟି ଟଙ୍କାରୁ ଊର୍ଦ୍ଧ୍ବ ହେବ ବୋଲି ନାରକୋଟିକ୍ସ ସଂସ୍ଥା ଆକଳନ କରିଥିବା ଏକ ସରକାରୀ ବିବୃତ୍ତିରୁ ଜଣାପଡିଛି । ଏହି ଘଟଣାରେ ପୋଲିସ ଅଧିକ ତଦନ୍ତ ଜାରି ରଖିଥିବା ସୂଚନା ମିଳିଛି ।
@ANI
