ଶ୍ରୀନଗର: ୟୁରୋପୀୟ ସଙ୍ଘ ଓ ଭାରତୀୟ ଶିଖର ସମ୍ମିଳନୀ ପୂର୍ବରୁ 25 ଜଣ ବୈଦେଶିକ ରାଷ୍ଟ୍ରଦୂତଙ୍କ ପ୍ରତିନିଧିମଣ୍ଡଳୀ ଜମ୍ମୁ କଶ୍ମୀର ଗସ୍ତ କରିଛନ୍ତି । ଏଥିରେ ଜର୍ମାନୀ, କତାର ଓ ଆଫଗାନିସ୍ତାନର ରାଷ୍ଟ୍ରଦୂତ ପ୍ରମୁଖ ସାମିଲ ଅଛନ୍ତି । କଶ୍ମୀର ଘାଟିରୁ 370 ଧାରା ଉଚ୍ଛେଦ ହେବା ପରେ ଏହା ବୈଦେଶିକ ରାଷ୍ଟ୍ରଦୂତ ପ୍ରତିନିଧି ମଣ୍ଡଳୀର ଦ୍ବିତୀୟ ଜମ୍ମୁ କଶ୍ମୀର ଗସ୍ତ । ସେଠାରେ ସ୍ଥିତି ସାମାନ୍ୟ ଥିବା ନେଇ ପ୍ରତିନିଧିମଣ୍ଡଳୀ ପକ୍ଷରୁ କୁହାଯାଇଛି ।
କଶ୍ମୀରର ଆତିଥ୍ୟ ସତ୍କାର ଦେଖି ବେଶ ଖୁସି ଅଛନ୍ତି ବୈଦେଶିକ ରାଷ୍ଟ୍ରର ପ୍ରତିନିଧି । ଆଫଗାନିସ୍ତାନର ରାଷ୍ଟ୍ରଦୂତ କହିଛନ୍ତି ଯେ, ଆମେ ଏଠାରେ କିଛି ଘଣ୍ଟା ପାଇଁ ରହିଥିଲୁ । ଏହି ସମୟ ମଧ୍ୟରେ ଘାଟିରେ ସମସ୍ତ ଦୋକାନ ବଜାର ଖୋଲାଥିବା ବେଳେ ଛାତ୍ରଛାତ୍ରୀ ସ୍କୁଲ ଯାଉଥିବା ଦେଖିବାକୁ ପାଇଥିଲୁ । ସେହିପରି ରାଷ୍ଟ୍ରଦୂତ ହଂସ ଡାନେନବର୍ଗ କହିଛନ୍ତି ଯେ, ଘାଟିରେ ଧିରେ ଧିରେ ଶାନ୍ତି ଫେରୁଛି । ସବୁକିଛି ଶୀଘ୍ର ସାମାନ୍ୟ ହୋଇଯିବ ।
ଉଗାଣ୍ଡା ଉଚ୍ଚାୟୁକ୍ତ କହିଛନ୍ତି ଯେ, କଶ୍ମୀର ଭାରତର ମୁଖ୍ୟ ଅଂଶ । ମୁଁ ବର୍ତ୍ତମାନ ଏଠାରେ ଅନେକ ସମ୍ଭାବନା ଦେଖିବାକୁ ପାଉଛି । ଜମ୍ମୁ କଶ୍ମୀରରୁ 370 ଧାରା ଉଚ୍ଛେଦ ହେବା ପରଠୁ ବାରମ୍ବାର ମାନବାଧିକାର କ୍ଷୁର୍ଣ୍ଣ ବିଷୟ ଉଠାଯାଉଛି । ଏହାକୁ ନେଇ ଅନ୍ତରାଷ୍ଟ୍ରୀୟ ସ୍ତରରେ ମଧ୍ୟ ଭାରତକୁ ଘେରିବାକୁ ଚେଷ୍ଟା କରାଯାଉଛି । ଏସବୁ ମଧ୍ୟରେ 25 ବୈଦେଶିକ ରାଷ୍ଟ୍ରଦୂତଙ୍କ ଜମ୍ମୁ କଶ୍ମୀର ଗସ୍ତ ଅନେକ ଦୃଷ୍ଟିକୋଣରୁ ଗୁରୁତ୍ବପୂର୍ଣ୍ଣ ।
@ANI
