ପାଟନା: ପୁଣି ବିହାର ମୁଜାଫରପୁରରେ ଗଣଦୁଷ୍କର୍ମ । ଉନ୍ନାଓ ଗଣଦୁଷ୍କର୍ମ ଓ ହତ୍ୟାକାଣ୍ଡ ଘଟଣାକୁ 10 ଦିନ ବିତିନଥିବା ବେଳେ ବିହାରର ମୁଜାଫରପୁରରେ ଏକ 15 ବର୍ଷୀୟ ନାବାଳିକାଙ୍କ ସହ ଗଣଦୁଷ୍କର୍ମ ହୋଇଥିବା ଅଭିଯୋଗ ହୋଇଛି ।
ସୂଚନା ଅନୁଯାୟୀ, ଗତ ସୋମବାର ନାବାଳିକା ଜଣଙ୍କ ଏକ ଭ୍ୟାନରେ ସ୍କୁଲରୁ ଫେରୁଥିଲେ । ଉକ୍ତ ଭ୍ୟାନରେ 3 ଜଣ ଯୁବକ ମଧ୍ୟ ଯାତ୍ରା କରୁଥିଲେ । ସେହି ସମୟରେ ନାବାଳିକା ଜଣଙ୍କ ତାଙ୍କ ଘର ପାଖରେ ଗାଡି ରଖିବାକୁ ଡ୍ରାଇଭରଙ୍କୁ କହିଥିଲେ । ମାତ୍ର ଡ୍ରାଇଭର ଜଣଙ୍କ ତାଙ୍କ ଘର ପାଖରେ ଗାଡି ରଖିନଥିଲେ ।
ଏହାପରେ କିଛି ଦୂରରେ 3 ଜଣ ଯୁବକ ନାବାଳିକା ଜଣଙ୍କୁ ଏକ ଘରକୁ ଟାଣି ନେଇ ସେଠାରେ ତାଙ୍କ ସହ ଗଣଦୁଷ୍କର୍ମ କରିଥିଲେ । ଏହାପରେ ଯୁବକମାନେ ନାବାଳିକାଙ୍କ ଏକ ଫଟୋ ଉଠାଇ ତାଙ୍କୁ ଏ ସମ୍ପର୍କରେ କାହାକୁ ନକହିବା ପାଇଁ ଧମକ ଦେଇଥିଲେ ।
ତେବେ ଏହି ଘଟଣା ପରେ ନାବାଳିକା ଜଣଙ୍କ ଥାନାରେ ଏନେଇ ଏକ ଅଭିଯୋଗ କରିଥିଲେ । ଅଭିଯୋଗ ଆଧାରରେ ପୋଲିସ ଘଟଣାର ତଦନ୍ତ ଆରମ୍ଭ କରିଛି ।
ପ୍ରକାଶ ଥାଉକି, ଗତ କିଛି ଦିନ ତଳେ ମୁଜାଫରପୁରରେ ଗଣଦୁଷ୍କର୍ମରେ ଅସଫଳ ହୋଇ ଅଭିଯୁକ୍ତମାନେ ଜଣେ ମହିଳାଙ୍କ ଦେହରେ ନିଆଁ ଲଗାଇଦେଇଥିଲେ ।
