ଶ୍ରୀନଗର: ଆଜି ହେଉଛି ଭାରତୀୟ ସ୍ଥଳ ସେନା ପ୍ରତିଷ୍ଠା ଦିବସ। ଭାରତ ଆଜି ୭୨ ତମ ସ୍ଥଳସେନା ପ୍ରତିଷ୍ଠା ଦିବସ ପାଳନ କରୁଛି । ଏହି ଦିନରେ ସେନାର ବିରତ୍ବ ପାଇଁ ଦେଶ ଗର୍ବ ଅନୁଭବ କରୁଛି । ଏଭଳି ସମୟରେ ଜମ୍ମୁ-କାଶ୍ମୀରରୁ ଏଭଳି ଏକ ଚିତ୍ର ଆସିଛି, ଯାହା ସେନାକୁ ମର୍ତ୍ତ୍ୟରେ ଦେବଦୂତଙ୍କ ଉପସ୍ଥିତିକୁ ଦର୍ଶାଉଛି । କେବଳ ଶତ୍ରୁ ଉପରେ ପ୍ରହାର କରି ଦେଶ ସୁରକ୍ଷା ପାଇଁ ନୁହେଁ ସାଧାରଣ ଲୋକଙ୍କୁ ସହାୟତା ପାଇଁ ସେନା ସର୍ବଦା ତତ୍ପର ଓ ଆପ୍ରାଣ ଉଦ୍ୟମ କରିଥାଏ ବୋଲି ଭିଡିଓ ସ୍ପଷ୍ଟ କରୁଛି । ଭାରତୀୟ ସେନାର ସେବା ମନୋଭାବ ବିଶ୍ବରେ ବିରଳ । ୪ ଘଣ୍ଟା ବରଫରେ ଚାଲି ଚାଲି ୧୦୦ ଯବାନ ଜଣେ ଗର୍ଭବତୀଙ୍କୁ ହସ୍ପିଟାଲରେ ପହଞ୍ଚାଇବା ଭାରତୀୟ ସେନାର ମହାନତାର ପରିଚୟ ଦେଉଛି ।
ଚିନାର କୋର ଏହି ଭିଡିଓଟିକୁ ଟ୍ବିଟରେ ପୋଷ୍ଟ କରିଥିଲା । ସେନାର ୧୦୦ ଜଣ ଯବାନ ଚାରିଘଣ୍ଟା ଧରି ବରଫ ଉପରେ ଚାଲିଚାଲି ଜଣେ ଗର୍ଭବତୀଙ୍କୁ ହସ୍ପିଟାଲରେ ପହଞ୍ଚାଉଥିବା ସୂଚନା ଦେଇଥିଲା । କାଶ୍ମୀରର ଜଣେ ଗର୍ଭବତୀ ଶମୀମା ଯାହାଙ୍କ ଅବସ୍ଥା ସଙ୍କଟାପନ୍ନ ଥିଲା ତାଙ୍କୁ ଚାରି ଘଣ୍ଟାକାଳ ଷ୍ଟ୍ରେଚର ସାହାଯ୍ୟରେ ବରଫ ଉପରେ ଚାଲିଚାଲି ୩୦ ଜଣ ସ୍ଥାନୀୟ ଲୋକଙ୍କ ସାହାଯ୍ୟରେ ହସ୍ପିଟାଲ ନେଇଯାଇଥିବା ସୂଚନା ଦିଆଯାଇଥିଲା । ହସ୍ପିଟାଲରେ ମା' ଶମୀମା ଏକ ଶିଶୁ ପୁତ୍ରକୁ ଜନ୍ମ ଦେଇଥିବାବେଳେ ଉଭୟେ ମା’ ଓ ଶିଶୁ ସୁସ୍ଥ ଥିବା ଜଣାପଡ଼ିଛି ।
ଭିଡିଓ ଭାଇରାଲ ହେବା ପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଭିଡିଓଟିକୁ ଟ୍ବିଟ କରି ପ୍ରଶଂସା କରିଛନ୍ତି । ନିଜ ଟୁଇଟରେ ପ୍ରଧାନମନ୍ତ୍ରୀ ମୋଦି ଆମର ସେନାକୁ ବୀରତ୍ବ, କର୍ତ୍ତବ୍ୟପରାୟଣତା ଏବଂ ମାନବୀୟ ଭାବନା ଲାଗି ସମ୍ମାନ କରାଯାଇଥାଏ ବୋଲି ଲେଖିଛନ୍ତି । ଏହାସହ ଯେତେବେଳେ ବି ଲୋକଙ୍କୁ ସହାୟତାର ଆବଶ୍ୟକତା ରହିଥାଏ ସେନା ସଠିକ ସମୟର ସେଠାରେ ଉପସ୍ଥିତ ରହିଥାଏ । ଏହାସହ ଯଥାସମ୍ଭବ ସାହାଯ୍ୟ କରିବାରେ ହେଳା କରି ନଥାଏ । ସେନା ପାଇଁ ଆମେ ଗର୍ବିତ ବୋଲି ପିଏମ ଟ୍ବିଟ କରିଛନ୍ତି । ଏହାସହ ପିଏମ ମୋଦି ମା' ଶମୀମା ଏବଂ ତାଙ୍କ ପିଲାର ଉତ୍ତମ ସ୍ବାସ୍ଥ୍ୟ ଲାଗି କାମନା କରୁଛି ବୋଲି ପିଏମ ନିଜ ଟ୍ବିଟର ପେଜରେ ଲେଖିଛନ୍ତି ।
