ବେଙ୍ଗାଲୁରୁ: ସାମାନ୍ୟ ଅସାବଧାନତା ଯେ କେତେ ବଡ ବିପଦକୁ ଡାକିପାରେ, ତାହାର ଏକ ନଜିର ଦେଖିବାକୁ ମିଳିଛି ବେଙ୍ଗାଲୁରୁ ସହରରେ । ସହରରେ ଏକ 1ବର୍ଷୀୟ ଶିଶୁ ଅଭିଭାବକଙ୍କ ସାମାନ୍ୟ ଅସାବଧାନତାରୁ ଏକ ବିବାହ ମୁଦି ଗିଳିଦେଇଥିବା ଜଣା ପଡିଥିଲା । ଖଟ ଉପରେ ପଡିଥିବା ମୁଦିଟିକୁ ଗିଳିବା ପରେ ଶିଶୁଟି ଅଣନିଶ୍ବାସୀ ହୋଇପଡିଥିବା ଅଭିଭାବକ ଦେଖିଥିଲେ । ଏହାପରେ ଶିଶୁଟିକୁ ତୁରନ୍ତ ସ୍ଥାନୀୟ ରେନବୋ ଶିଶୁ ଡାକ୍ତରଖାନାରେ ଭର୍ତ୍ତି କରାଇଥିଲେ ।
ଡାକ୍ତରଖାନା ନେବା ପୂର୍ବରୁ ଶିଶୁଟିର ଶ୍ବାସକ୍ରିୟା ସାଧାରଣ କରିବା ପାଇଁ ଅଭିଭାବକ ଅନେକ ଚେଷ୍ଟା କରିବା ସତ୍ତ୍ବେ କୌଣସି ସୁଫଳ ମିଳିନଥିଲା । ତେବେ ଡାକ୍ତରଖାନା ପହଞ୍ଚିବା ପରେ ଡାକ୍ତରମାନେ ତୁରନ୍ତ ଏକ୍ସ-ରେ କରି ଜାଣିବାକୁ ପାଇଥିଲେ କି ଶିଶୁଟି ଏକ ମୁଦି ଗିଳି ଦେଇଛି ଏବଂ ମୁଦିଟି ଶିଶୁଟିର ଶ୍ବାସନଳୀରେ ଠାକି ଯାଇଛି । ଏହାପରେ ଡ଼ଃ ଶଙ୍କର ବି ଜି ଶିଶୁଟି ଦେହରୁ ମୁଦିଟିକୁ ତୁରନ୍ତ କାଢିବା ପାଇଁ ପ୍ରସ୍ତୁତି ଆରମ୍ଭ କରିଥିଲେ । ନଚେତ୍ ମୁଦିଟି ତଳକୁ ତଳକୁ ଖସି ଶିଶୁର ଜୀବନ ପ୍ରତି ବିପଦ ସୃଷ୍ଟି କରିବ ବୋଲି ସେ ଅଭିଭାବକଙ୍କୁ ଚେତେଇ ଦେଇଥିଲେ ।
ତେବେ ଶିଶୁଟିକୁ ଆନାସ୍ଥେସିଆ ଦିଆଯାଇ ଅଚେତ୍ କରାଯାଇଥିଲା । ଏହାପରେ ଇଣ୍ଡୋସ୍କୋପିକ ଦ୍ବାରା ଶିଶୁଟି ଦେହରୁ ସଫଳତାର ସହ ମୁଦିଟି କଢାଯାଇଥିଲା । ଶିଶୁଟି ସମ୍ପୂର୍ଣ୍ଣ ସୁସ୍ଥ ରହିଥିବା ବେଳେ କିଛି ଘଣ୍ଟା ପରେ ତାକୁ ଡାକ୍ତରଖାନାରୁ ଘରକୁ ପଠାଇ ଦିଆଯାଇଥିଲା ।
ବ୍ୟୁରୋ ରିପୋର୍ଟ, ଇଟିଭି ଭାରତ
