ଭୋପାଳ: ମଧ୍ୟପ୍ରଦେଶ ଛତ୍ରପୁରରୁ ଟ୍ରେନରେ ଉତ୍ତରପ୍ରଦେଶର ବାନ୍ଦା ଜିଲ୍ଲାକୁ ଫେରୁଥିବା ବେଳେ ଜଣେ ଯୁବତୀଙ୍କ ସହ ଘଟିଛି ଛାତିଥର ଘଟଣା । ଟ୍ରେନରେ କିଛି ଦୁର୍ବୃତ୍ତ ପ୍ରଥମେ ଯୁବତୀଙ୍କୁ ଅସଦାଚରଣ କରିବା ପରେ ତାଙ୍କୁ ଦୁଷ୍କର୍ମ କରିବା ପାଇଁ ଉଦ୍ୟମ କରିଥିଲେ । ତେବେ ଯୁବତୀ ଜଣକ ଏହାକୁ ବିରୋଧ କରିବା ପରେ ଦୁର୍ବୃତ୍ତମାନେ ତାଙ୍କୁ ଚଳନ୍ତା ଟ୍ରେନରୁ ବାହାରକୁ ଧକ୍କା ମାରି ଫିଙ୍ଗିଥିବା ଦେଖିବାକୁ ମିଳିଛି । ଯୁବତୀଙ୍କ ଅବସ୍ଥା ସଙ୍କଟାପନ୍ନ ରହିଥିବା ଜଣାପଡ଼ିଛି ।
ଯୁବତୀଙ୍କୁ ମଧ୍ୟପ୍ରଦେଶ ଖଜୁରାହୋ ଅଞ୍ଚଳରେ ଥିବା ହସ୍ପିଟାଲରେ ଭର୍ତ୍ତି କରାଯାଇଛି । ଯୁବତୀଙ୍କ ଅନେକ ହାଡ଼ ଭାଙ୍ଗି ଯାଇଥିବାବେଳେ ଶରୀରରେ ଅନେକ ଅଂଶରେ ଗଭୀର ଆଘାତ ଲାଗିଛି । ଝାନ୍ସି ଡିଭିଜନର ରେଳ ସୁରକ୍ଷା କମିଶନର ଆଲୋକ କୁମାର ଘଟଣାସ୍ଥଳରେ ପହଞ୍ଚିଥିଲେ । GRP ଜବଲପୁର ଏବଂ ଝାନ୍ସିର ଆରପିଏଫ ଟିମ ଏହି ଘଟଣାର ତଦନ୍ତ କରୁଛି । ଅଭିଯୁକ୍ତଙ୍କୁ ଶୀଘ୍ର ଗିରଫ କରାଯିବ ବୋଲି ଦାବି କରାଯାଉଛି ।
ଏହି ଘଟଣା ମଧ୍ୟପ୍ରଦେଶର ରାଜନଗର (ଛତ୍ରପୁର) ନିକଟ ଏକ ଗ୍ରାମରୁ ଆସିଛି । ଏଠାରୁ ଜଣେ 25 ବର୍ଷର ଯୁବତୀ ଖଜୁରାହୋ-ମହୋବା ଯାତ୍ରୀବାହୀ ଟ୍ରେନରେ ବୃନ୍ଦା ଯାଉଥିଲେ । ବଗିରେ ତାଙ୍କ ପାଖରେ ବସିଥିବା ଯୁବକ ତାଙ୍କୁ ଦୁର୍ବ୍ୟବହାର କରିବା ଆରମ୍ଭ କରିଥିଲେ । ଟ୍ରେନ୍ ଚାଲିବା ପରେ ସେ ତାଙ୍କ ସହ ଦୁଷ୍କର୍ମ କରିବାକୁ ଚେଷ୍ଟା କରିଥିଲେ । ଏଥିରୁ ମୁକୁଳିବା ପାଇଁ ଯୁବତୀ ଜଣକ ତାର ହାତକୁ କାଟି ଦେଇଥିଲେ ।
ଏହି କାରଣରୁ ଅଭିଯୁକ୍ତ ଯୁବକ ଉକ୍ତ ଯୁବତୀଙ୍କୁ ପ୍ରଥମେ ଅତି ନିର୍ମମ ଭାବେ ମାଡ଼ ମାରିଥିଲେ । ଏହାପରେ ଯୁବତୀଙ୍କ କେଶକୁ ଧରି ଟ୍ରେନ କବାଟ ନିକଟକୁ ନେଇ ତାଙ୍କୁ ଚଳନ୍ତା ଟ୍ରେନରୁ ବାହାରକୁ ଫିଙ୍ଗିଥିବା ଜଣାପଡ଼ିଛି । ଯୁବତୀଙ୍କ ଅବସ୍ଥା ଏବେ ସଙ୍କଟାପନ୍ନ ଥିବା ଜଣାପଡ଼ିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
