ନୂଆଦିଲ୍ଲୀ: ଆରମ୍ଭ ହେବ ବହୁ ପ୍ରତୀକ୍ଷିତ 5G ସ୍ପେକ୍ଟ୍ରମ ନିଲାମ ପ୍ରକ୍ରିୟା । ଆସନ୍ତାବର୍ଷ ଏପ୍ରିଲ-ମେ’ ମାସରେ ଏହି ବହୁ ପ୍ରତୀକ୍ଷିତ ପ୍ରକଳ୍ପର ନିଲାମୀ ପ୍ରକ୍ରିୟା ଆରମ୍ଭ ହେବା ନେଇ ଆଜି (ଗୁରୁବାର) ସୂଚନା ଦେଇଛନ୍ତି, ସୂଚନା ପ୍ରଯୁକ୍ତି ବିଦ୍ୟା ମନ୍ତ୍ରୀ ଅଶ୍ବିନୀ ବୈଷ୍ଣବ । ଅଶ୍ବିନୀ କହିଛନ୍ତି ଯେ ନିଲାମ ପ୍ରକ୍ରିୟାକୁ ନିୟନ୍ତ୍ରଣ କରୁଥିବା ଟେଲିକମ୍ ରେଗୁଲେଟୋରୀ ଅଥରିଟି ଅଫ୍ ଇଣ୍ଡିଆ (TRAI) ଏହି ପ୍ରସଙ୍ଗରେ ବିଚାରବିମର୍ଶ ଜାରି ରଖିଛି ଏବଂ ଫେବୃଆରୀ 2022 ସୁଦ୍ଧା ଏନେଇ ରିପୋର୍ଟ ଦାଖଲ ଶେଷ ହେବ । ଅତି ବେଶିରେ ଏହା ମାର୍ଚ୍ଚ ପର୍ଯ୍ୟନ୍ତ ବିଳମ୍ବ ହୋଇପାରେ ।
ଫେବୃଆରୀ ମଧ୍ୟ ସପ୍ତାହ ମଧ୍ୟରେ TRAI ର ରିପୋର୍ଟ ଦାଖଲ ହୋଇଗଲା ପରେ ନିଲାମି ପ୍ରକ୍ରିୟା ଆରମ୍ଭ ହେବାରେ କୌଣସି ବିଳମ୍ବ ହେବ ନାହିଁ ନେଇ ମନ୍ତ୍ରୀ କହିଛନ୍ତି । ଏହି ୫ଜି ସ୍ପେକ୍ଟ୍ରମରେ ଉଭୟ ୫ଜି ଓ ୪ଜି ନେଟଓ୍ବାର୍କ ବ୍ୟବହାର ସୁବିଧା ରହିବ । ତେଣୁ ଏହି ନିଲାମ ବ୍ୟବସ୍ଥାକୁ କେବଳ ସ୍ବଳ୍ପ ମିଆଦି ନୁହେଁ ବରଂ ଦୀର୍ଘ ମିଆଦି ଅବଧୀ ଭାବେ କାର୍ଯ୍ୟକାରୀ କରିବାକୁ ଭାରତ ସରକାର ବିଚାର କରୁଛନ୍ତି । ଏହାର ନିଲାମର ଅବଧୀ ଅତିକମରେ 5-10 ବର୍ଷ ହେବା ନେଇ ବିଚାର କରାଯାଉଥିବା କହିଛନ୍ତି ଅଶ୍ବିନୀ ।
ବ୍ୟୁରୋ ରିପୋର୍ଟ, ଇଟିଭି ଭାରତ
