ହାଇଦ୍ରାବାଦ: ଜାପାନ ସରକାରଙ୍କ ଅନୁରୋଧ ରକ୍ଷା କରି ପ୍ରାୟ 5ହଜାର ନର୍ସଙ୍କୁ ଜାପାନ ପଠାଇବେ ଆସାମ ସରକାର । ଜାପାନର ବିଭିନ୍ନ ହସ୍ପିଟାଲରେ ନର୍ସଙ୍କ ଆବଶ୍ୟକତା ରହିଛି । ଏହି ଖାଲି ପଦବୀ ପୂରଣ କରିବା ପାଇଁ ଏହି ନର୍ସଙ୍କୁ ଜାପାନ ଆବଶ୍ୟକ କରୁଛି (Assam Govt to send 5000 nurses to Japan)। ଏନେଇ ଜାପାନ ଆସାମ ସରକାରଙ୍କୁ ଏକାଧିକ ଚିଠି ମଧ୍ୟ ଲେଖିଛି । ତେବେ ଜାପାନର ଅନୁରୋଧ କ୍ରମେ ଆସାମ ସରକାର ପ୍ରାୟ 5 ହଜାର ନର୍ସଙ୍କୁ ଜାପାନ ପଠାଇବା ପାଇଁ ପ୍ରକ୍ରିୟା ଆରମ୍ଭ କରିବାକୁ ଯାଉଛନ୍ତି । ସେହିପରି ଜାପାନ ସରକାରଙ୍କ ପ୍ରସ୍ତାବ ଅନୁସାରେ ପ୍ରତ୍ୟେକ ନର୍ସଙ୍କୁ ଭାରତୀୟ ମୁଦ୍ରାରେ ମାସିକ 2.50 ରୁ 3 ଲକ୍ଷ ଟଙ୍କା ପର୍ଯ୍ୟନ୍ତ ଦରମା ପ୍ରଦାନ କରାଯିବ ବୋଲି ମୁଖ୍ୟମନ୍ତ୍ରୀ ହିମନ୍ତ ବିଶ୍ବଶର୍ମା ସୂଚନା ଦେଇଛନ୍ତି ।
ଗତକାଲି ବାଇହାଟା ଚାରିଆଲିରେ ଏକ ଜନ ସମାବେଶକୁ ସମ୍ବୋଧିତ କରିବା ବେଳେ ମୁଖ୍ୟମନ୍ତ୍ରୀ ବିଶ୍ବଶର୍ମା ଏହି ସୂଚନା ଦେବା ସହ ରାଜ୍ୟରେ ନର୍ସିଂ ଶିକ୍ଷାର ସଫଳତାକୁ ମଧ୍ୟ ଉଲ୍ଲେଖ କରିଥିଲେ । ରଜ୍ୟରେ ନର୍ସି ଶିକ୍ଷାର ସଫଳ ରୂପାୟନ ଫଳରେ ଏହା ସମ୍ଭବ ହେବାକୁ ଯାଉଥିବା ସେ କହିଥିଲେ । ସେହିପରି ଜାପାନରେ ଜଣେ ନର୍ସ ଭାବେ କାର୍ଯ୍ୟ କରିବା ପାଇଁ ଜାପାନୀ ଭାଷା ଶିଖିବା ସେଠାକାର ସ୍ଥାନୀୟ ନୀତି ନିୟମାବଳୀ ମଧ୍ୟ ଜାଣିବା ଏକ ପ୍ରକାର ଜରୁରୀ ବୋଲି ମୁଖ୍ୟମନ୍ତ୍ରୀ ବିଶ୍ବଶର୍ମା କହିଥିଲେ । ଚୟନ ହେବାକୁ ଥିବା ନର୍ସଙ୍କୁ ଏଥିନିମନ୍ତେ ସରକାର ପ୍ରଶିକ୍ଷଣ ମଧ୍ୟ ପ୍ରଦାନ କରିବେ ।
ବ୍ୟୁରୋ ରିପୋର୍ଟ, ଇଟିଭି ଭାରତ
