ଗୌହାଟୀ: ଆସାମ କୋର୍ଟରେ ହାଜର ହେବେ ଦିଲ୍ଲୀ ଉପମୁଖ୍ୟମନ୍ତ୍ରୀ ମନିଷ ସିସୋଦିଆ । ଆଜି ଆସାମର ଏକ କୋର୍ଟ ମୁଖ୍ୟମନ୍ତ୍ରୀ ହିମନ୍ତ ବିଶ୍ବଶର୍ମାଙ୍କ ଦ୍ବାରା ଦାଏର କରାଯାଇଥିବା ମାମଲାରେ ସିସୋଦିଆଙ୍କୁ ହାଜର ହେବା ପାଇଁ ନିର୍ଦ୍ଦେଶ ଦେଇଛନ୍ତି । ନଭେମ୍ବର 19 ତାରଖରେ ହାଜର ହେବା ପାଇଁ ଜାରି ହୋଇଥିବା ସମନରେ କୁହାଯାଇଛି (Himanta Biswa Sarma filed case on Manish Sisodia)। ଆସାମ ମୁଖ୍ୟମନ୍ତ୍ରୀ ବିଶ୍ବଶର୍ମା, ଦିଲ୍ଲୀ ଉପମୁଖ୍ୟମନ୍ତ୍ରୀ ସିସୋଦିଆ ତାଙ୍କ ବିରୋଧରେ ମିଥ୍ୟା ଓ ଆପତ୍ତିଜନକ ମନ୍ତବ୍ୟ ଦେଇଥିବା ନେଇ ଏକ ଅପରାଧିକ ମାମଲା ଦାଏର କରିଥିଲେ ।
ଜୁନ ମାସରେ ଆସାମ ମୁଖ୍ୟମନ୍ତ୍ରୀ ହିମନ୍ତ ବିଶ୍ବଶର୍ମା ଓ ତାଙ୍କ ପତ୍ନୀଙ୍କ ବିରୋଧରେ ସଙ୍ଗୀନ ଦୁର୍ନୀତି ଅଭିଯୋଗ ଆଣିଥିଲେ ସିସୋଦିଆ । କୋଭିଡ ସମୟରେ ମୁଖ୍ୟମନ୍ତ୍ରୀ ବିଶ୍ବଶର୍ମା ନିଜ କ୍ଷମତାର ଅପବ୍ୟବହାର କରି ନିଜ ପତ୍ନୀଙ୍କ ଦ୍ବାରା ପରିଚାଳିତ ଏକ କମ୍ପାନୀକୁ ପିପିଇ କିଟ କିଣିବାର ଟେଣ୍ଡର ଦେଇଥିବା ଅଭିଯୋଗ କରିଥିଲେ ସିସୋଦିଆ । ତେବେ ଏହି ଟେଣ୍ଡର ପାଇଁ ସ୍ବାଭାବିକ ବଜାର ଦର ଠାରୁ ବହି ପରିମାଣର ଅଧିକ ରାଶି ପ୍ରଦାନ କରାଯାଇବା ମଧ୍ୟ କହିଥିଲେ ସିସୋଦିଆ ।
ସିସୋଦିଆ କହିଥିଲେ, ଅନ୍ୟମାନେ 600 କୋଟି ଟଙ୍କାରେ ଏହାକୁ କିଣିଥିବା ବେଳେ ନିଜ ପତ୍ନୀଙ୍କ ଦ୍ବାରା ଚଳାଯାଉଥିବା କମ୍ପାନୀକୁ ମୁଖ୍ୟମନ୍ତ୍ରୀ ବିଶ୍ବଶର୍ମା 990 କୋଟି ଟଙ୍କାରେ ଏହି ଟେଣ୍ଡର ଦେଇଥିଲେ । ଯାହା ମହାମାରୀ ସମୟରେ ଏକ ବଡ ଅପରାଧ । ଅନ୍ୟପଟେ ମୁଖ୍ୟମନ୍ତ୍ରୀ ବିଶ୍ବଶର୍ମା ଏହି ଅଭିଯୋଗକୁ ସମ୍ପୂର୍ଣ୍ଣ ମିଥ୍ୟା ଓ ଅମୂଳକ ବୋଲି ଦର୍ଶାଇ କୋର୍ଟରେ ଦ୍ବାରସ୍ଥ ହୋଇଥିଲେ । ସିସୋଦିଆଙ୍କ ବିରୋଧରେ ସେ ଏକ ଅପରାଧିକ ମାମଲା ଦାଏର କରିଥିବା ବେଳେ ଚଳିତ ମାସ 19 ତାରିଖରେ ସିସୋଦିଆଙ୍କୁ ହାଜର ହେବା ପାଇଁ ନୋଟିସ ଜାରି କରାଯାଇଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
