ନୂଆଦିଲ୍ଲୀ: ୩ ସେନା ବାହିନୀ ପାଇଁ ଗଠିତ କମିଟିର ଅଧ୍ୟକ୍ଷ ପଦର ଦାୟିତ୍ୱ ଗ୍ରହଣ କରିଛନ୍ତି ଏମଏମ ନରୱାଣେ (Army Chief Gen Naravane takes charge as chairman of Chiefs Staff Committee) । ଦେଶର ପରବର୍ତ୍ତୀ ସିଡିଏସ ହେବା ନେଇ ଧରିଥିବା ଚର୍ଚ୍ଚା ଆଗକୁ ସତ ହେବାକୁ ଯାଉଛି । ପୂର୍ବରୁ ଏହି ପଦବୀରେ ସିଡିଏସ୍ ବିପିନ ରାୱତଙ୍କ ପାଖରେ ଥିଲା । ହେଲେ ତାଙ୍କ ଅବର୍ତ୍ତମାନରେ ଜେନେରାଲ ନରୱାଣେ ଏହି ଦାୟିତ୍ୱ ପାଇଛନ୍ତି । ତେଣୁ ବରିଷ୍ଠତା ଦୃଷ୍ଟିରୁ ଜେନେରାଲ ନରୱାଣେଙ୍କୁ (Army Chief Gen Naravane) ଏହି ପଦ ମିଳିପାରେ ସେ ହିଁ ଦେଶର ପରବର୍ତ୍ତୀ ସିଡିଏସ୍ ହେବା ନେଇ ଚର୍ଚ୍ଚା ଜୋର ଧରିଛି ।
ସେନାମୁଖ୍ୟ ଜେନେରାଲ ନରୱାଣେ ୩ ସେନା ପ୍ରମୁଖଙ୍କ ମଧ୍ୟରେ ସବୁଠାରୁ ବରିଷ୍ଠ । ବାୟୁସେନା ମୁଖ୍ୟ ଏୟାର ଚିଫ ମାର୍ଶଲ ଭିଆର ଚୌଧୁରୀ ଓ ନୌସେନା ମୁଖ୍ୟ ଆଡମିରାଲ ଆର ହରି କୁମାର ତାଙ୍କ ଠାରୁ କନିଷ୍ଠ । ତେଣୁ ବରିଷ୍ଠତା ଦୃଷ୍ଟିରୁ ଜେନେରାଲ ନରୱାଣେଙ୍କୁ ତିନି ସେନା ବାହିନୀ ପାଇଁ ଗଠିତ କମିଟିର ମୁଖ୍ୟ କରାଯାଇଛି । ୨୦୧୯ରେ ଭାରତ ସରକାର ସିଡିଏସ ପଦ ସୃଷ୍ଟି କରିବା ପୂର୍ବରୁ ୩ ସେନା ବାହିନୀ ମଧ୍ୟରେ ବରିଷ୍ଠ ଅଧିକାରୀ ହିଁ ଏହି କମିଟିର ଅଧ୍ୟକ୍ଷ ଭାବେ କାର୍ଯ୍ୟ କରୁଥିଲେ କିନ୍ତୁ ସିଡିଏସ୍ ହେବା ପରେ କମିଟିର ଅଧ୍ୟକ୍ଷ ଦାୟିତ୍ୱ ଖାଲି ପଡିଥିଲା ।
୨୦୧୯ ମସିହା ଡିସେମ୍ବର ୩୧ରେ ଜେନେରାଲ ନରୱାଣେ ସ୍ଥଳ ସେନା ମୁଖ୍ୟ ଭାବେ ଦାୟିତ୍ୱ ଗ୍ରହଣ କରିଥିଲେ। ଜେନେରାଲ ବିପିନ ରାୱତଙ୍କ ପରେ ସେ ସ୍ଥଳର ସେନାର ମୁଖ୍ୟ ହୋଇଥିଲେ । ତେଣୁ ତାଙ୍କ ଭାରତ ସରକାର ଦେଶର ପରବର୍ତ୍ତୀ ସିଡିଏସ୍ ମଧ୍ୟ କରିପାରନ୍ତି ବୋଲି କୁହାଯାଉଛି । ଷ୍ଟାଫ୍ କମିଟି (କୋଏସସି) ମଙ୍ଗଳବାର ଦିନ ସିଡିଏସ ବିପିନ ରାୱତ, ତାଙ୍କ ପତ୍ନୀ ମଧୁଲିକା ଏବଂ ସମସ୍ତ ୧୪ ଜଣ ଯୋଦ୍ଧାଙ୍କୁ ଦେହାନ୍ତରେ ସମବେଦନା ଜଣାଇଛି । ଏହି ଦୁର୍ଘଟଣାର ଏକାକୀ ବଞ୍ଚିଥିବା ଗ୍ରୁପ୍ କ୍ୟାପଟେନ ବରୁଣ ସିଂ ବୁଧବାର ବେଙ୍ଗାଲୁରୁର ଏକ ସାମରିକ ଡାକ୍ତରଖାନାରେ ନିଧନ ହୋଇଛି ।
ଏହି ସମୟରେ, ସେନାମୁଖ୍ୟ ନରୱାଣେ ସାଉଦି ସଶସ୍ତ୍ର ବାହିନୀର କମାଣ୍ଡର ଲେଫ୍ଟ ଜେନେରାଲ ଫାହଦ୍ ବିନ୍ ଅବଦୁଲ୍ଲା ଅଲ-ମୁଟାୟରଙ୍କ ସହ ଏକ ଟେଲିଫୋନ୍ ବାର୍ତ୍ତାଳାପ କରିଥିଲେ । ଦ୍ୱିପାକ୍ଷିକ ପ୍ରତିରକ୍ଷା ସହଯୋଗ ପ୍ରସଙ୍ଗରେ ସେମାନେ ଆଲୋଚନା କରିଛନ୍ତି ବୋଲି ସେନା କହିଛି ।
ବ୍ୟୁରୋ ରିପୋର୍ଟ,ଇଟିଭି ଭାରତ
