ବର୍ଷା ଆଣିଲାନି ଆଶ୍ବସ୍ତି, ଆଜି ବି ଖରାପ ଶ୍ରେଣୀରେ ଦିଲ୍ଲୀ ବାୟୁ

ବାୟୁ ପ୍ରଦୂଷଣରେ ଜର୍ଜରିତ ଦିଲ୍ଲୀବାସୀ । ବର୍ଷା ପରେ ବି ଖରାପ ଶ୍ରେଣୀରେ ବାୟୁ ଗୁଣବତ୍ତା । ଅଧିକ ପଢନ୍ତୁ

ନୂଆଦିଲ୍ଲୀ: ବିଷ ବଳୟରେ ରାଜଧାନୀ ଦିଲ୍ଲୀ । କମିବାର ନା ଧରୁନି ବାୟୁ ପ୍ରଦୂଷଣ । ସୋମବାର ପ୍ରବଳ ବର୍ଷା ପରେ ଦିଲ୍ଲୀ ଏନସିଆରରେ ବାୟୁ ଗୁଣବତ୍ତା ସାମାନ୍ୟ ହ୍ରାସ ହୋଇଥିଲେ ମଧ୍ୟ ଦିଲ୍ଲୀର ଅନେକ ସ୍ଥାନରେ ବାୟୁର ମାନ ଅତ୍ୟନ୍ତ ଖରାପ ଶ୍ରେଣୀରେ ରହିଛି । ଆଜି ସକାଳ ସମୟରେ ଦିଲ୍ଲୀରେ ବାୟୁ ଗୁଣବତ୍ତା 366 ରେକର୍ଡ କରାଯାଇଛି । ସୋମବାର ସନ୍ଧ୍ୟାରେ ଏହା 395 ରହିଥିଲା । ତେବେ ରାଜଧାନୀରେ ପ୍ରବଳ ବର୍ଷା ପରେ ଗତକାଲି ଅପେକ୍ଷା ପ୍ରଦୂଷଣ ଆଜି ସାମାନ୍ୟ ହ୍ରାସ ହୋଇଛି । କିନ୍ତୁ ଅନେକ ସ୍ଥାନରେ ବାୟୁ ଗୁଣବତ୍ତା 400 ପାର୍ କରିଛି ।

କେନ୍ଦ୍ରୀୟ ପ୍ରଦୂଷଣ ଏବଂ ନିୟନ୍ତ୍ରଣ ବୋର୍ଡର ସୂଚନା ଅନୁୟାୟୀ, ଆଜି ସକାଳ ସମୟରେ ଫରିଦାବାଦରେ ବାୟୁ ଗୁଣବତ୍ତା ସୂଚାକଙ୍କ 301 ରହିଥିବା ବେଳେ ଗୁରୁଗ୍ରାମରେ 266, ଗ୍ରେଟର ନୋଏଡାରେ 335, ହିସରରେ 238, ଗାଜିଆବାଦରେ 297 ରହିଥିଲା । ଦିଲ୍ଲୀରେ ସକାଳ 6ଟା 5ମିନିଟ ସମୟରେ ବାୟୁ ଗୁଣବତ୍ତା ସୂଚକାଙ୍କ 366 ରହିଥିଲା । ଦିଲ୍ଲୀର 7ଟି ସ୍ଥାନରେ ବାୟୁ ଗଣବତ୍ତା ସୂଚକାଙ୍କ 400 ପାର କରିଛି । ଆଇଟିଓରେ 436 ପଞ୍ଜାବୀ ବାଗରେ 404, ଅଶୋକ ବିହାରରେ 403, ସୋନିଆ ବିହାରରେ 403, ବିବେକ ବିହାରରେ 414, ୱଜିରପୁରରେ 412 , ମୁଣ୍ଡକାରେ ବାୟୁ ଗୁଣବତ୍ତା ସୂଚକାଙ୍କ 408 ରହିଛି ।

ଆଜି ମଧ୍ୟ ଦିଲ୍ଲୀରେ ପାଗ ମେଘୁଆ ରହିବ: ଭାରତୀୟ ପାଣିପାଗ ବିଭାଗ ସୂଚନା ଅନୁଯାୟୀ, ଆଜି (ମଙ୍ଗଳବାର) ରାଜଧାନୀରେ ଆକାଶ ମେଘାଚ୍ଛନ୍ନ ରହିବ । ସକାଳ ସମୟରେ ହାଲୁକା କୁହୁଡି ହୋଇଥିଲା । ଆଜି ଦିନର ସର୍ବାଧିକ ତାପମାତ୍ରା 25 ଏବଂ ସର୍ବନିମ୍ନ ତାପମାତ୍ରା 12 ଡିଗ୍ରୀ ରହିବ । ଏହା ସହିତ ଡିସେମ୍ବର ମାସ ପହିଲାରୁ ସର୍ବନିମ୍ନ ତାପମାତ୍ରା 2ରୁ 3 ଡିଗ୍ରୀ ହ୍ରାସ ପାଇପାରେ । ଏହି ସମୟରେ ଦିଲ୍ଲୀରେ କୁହୁଡ଼ି ମଧ୍ୟ ହେବାର ସମ୍ଭାବନା ରହିଛି । ସ୍କାଏମେଟ୍ ପାଣିପାଗ ରିପୋର୍ଟ ଅନୁଯାୟୀ ଦେଶର ଅନ୍ୟ ରାଜ୍ୟରେ ହାଲୁକାରୁ ମଧ୍ୟମ ବର୍ଷା ହେବାର ସମ୍ଭାବନା ରହିଛି । ଗତ 24 ଘଣ୍ଟା ମଧ୍ୟରେ ଜାତୀୟ ରାଜଧାନୀରେ 7 ମିଲିମିଟର ବର୍ଷା ରେକର୍ଡ କରାଯାଇଛି । ଅକ୍ଟୋବରର ଶେଷ ସପ୍ତାହରୁ ଦିଲ୍ଲୀର ବାୟୁ ଗୁଣବତ୍ତା ଅତ୍ୟନ୍ତ ଖରାପ ସ୍ଥିତି ଦେଇ ଗତି କରୁଛି । ବାୟୁ ପ୍ରଦୂଷଣ ଲୋକଙ୍କ ସ୍ବାସ୍ଥ୍ୟ ଉପରେ କୁପ୍ରଭାବ ପକାଉଛି ।