ଚେନ୍ନାଇ: 'ଇରୁଟୁ ଆରାୟିଲ ମୁରାଟ୍ଟୁ କୁଥୁ'ରେ ଅଭିନୟ କରିଥିବା ଚର୍ଚ୍ଚିତ ଅଭିନେତ୍ରୀ ୟଶିକା ଆନନ୍ଦ ଏକ ବଡ ଧରଣର ଦୁର୍ଘଟଣାରୁ ଅଳ୍ପକେ ବର୍ତ୍ତିଛନ୍ତି । ହେଲେ ଏହି ଦୁର୍ଘଟଣାରେ ନିଜ ବନ୍ଧୁଙ୍କୁ ସେ ହରାଇଛନ୍ତି । ୟଶିକା ଓ ତାଙ୍କ ବନ୍ଧୁ ଭାଲୀ ଶେଟ୍ଟୀ ଭବାନୀଙ୍କ ସମେତ ହାଇଦ୍ରାବାଦର ଦୁଇ ପୁରୁଷ ବନ୍ଧୁଙ୍କ ସହ ଏକ ବିଳାସପୂର୍ଣ୍ଣ କାରରେ ପଣ୍ଡିଚେରୀରୁ ଚେନ୍ନାଇ ଅଭିମୁଖେ ଆସୁଥିଲେ ।
ଆଜି (ରବିବାର) ଭୋରରୁ ମମଲାଲାପୁରମ୍ ନିକଟ ସୋଲେରିକାଡୁ ଅଞ୍ଚଳରେ କାରଟି ଭାରସାମ୍ୟ ହରାଇ ଅନ୍ୟ ଏକ କାର ସହିତ ମୁହାଁମୁହିଁ ଧକ୍କା ହୋଇଥିଲା । ଏହି ଦୁର୍ଘଟଣାରେ ୟଶିକାଙ୍କ ବନ୍ଧୁ ଭାଲୀ ଶେଟ୍ଟୀ ଭବାନୀଙ୍କର ମୃତ୍ୟୁ ଘଟିଛି। ୟଶିକା ଏବଂ ତାଙ୍କର ଦୁଇ ପୁରୁଷ ବନ୍ଧୁ ଗୁରୁତର ଆହତ ହୋଇ ଏକ ଘରୋଇ ଡାକ୍ତରଖାନାରେ ଭର୍ତ୍ତି ହୋଇଛନ୍ତି ।
ତେବେ ପ୍ରାଥମିକ ତଦନ୍ତରୁ ୟଶିକା କାର ଚଳାଉଥିବା ଜଣାପଡିଛି । ଏହି ମାମଲାରେ ଅଭିନେତ୍ରୀଙ୍କ ବିରୁଦ୍ଧରେ ପୋଲିସ ବିଭାଗ 304 ଏ, 337 ଏବଂ 279 ଅନୁଯାୟୀ ମାମଲା ରୁଜୁ କରିଛି । ଲୋକପ୍ରିୟ ତାମିଲ ଟେଲିଭିଜନ ଶୋ ବିଗ୍ ବସ୍ ପାର୍ଟ-୨ରେ ଭାଗ ନେଇ ବେଶ ଚର୍ଚ୍ଚିତ ଥିଲେ ୟଶିକା ।
ବ୍ୟୁରୋ ରିପୋର୍ଟ, ଇଟିଭି ଭାରତ
