ନୂଆଦିଲ୍ଲୀ: ନୋଏଡା ସେକ୍ଟର-29ରେ ଅଗ୍ନିକାଣ୍ଡ। ଶୁକ୍ରବାର ବିଳମ୍ବିତ ରାତିରେ ଅବସରପ୍ରାପ୍ତ ସେନା ବିଗ୍ରେଡିୟରଙ୍କ ଘରେ ନିଆଁ ଲାଗି ଶ୍ବାସ ରୁଦ୍ଧ ହୋଇ ବିଗ୍ରେଡିୟରଙ୍କ ସମେତ ତାଙ୍କ ସ୍ତ୍ରୀଙ୍କର ମୃତ୍ୟୁ ଘଟିଛି । ତେବେ ଏହି ଅଗ୍ନିକାଣ୍ଡ ସର୍ଟସର୍କିଟ ଯୋଗୁଁ ହୋଇଥିବା ଅନୁମାନ କରାଯାଉଛି।
ସୂଚନା ମୁତାବକ, 84 ବର୍ଷୀୟ ଅବସରପ୍ରାପ୍ତ ସେନା ବିଗ୍ରେଡିୟର ଆରପି ସିଂ ତାଙ୍କ ସ୍ତ୍ରୀଙ୍କ ସହ ନୋଏଡା ସେକ୍ଟର 29ରେ ରହୁଥିବାବେଳେ, ତାଙ୍କ ପୁଅ ଆର୍ମିରେ କର୍ଣ୍ଣଲ ଅଛନ୍ତି । ତେବେ ବିଳମ୍ବିତ ରାତିରେ ବିଗ୍ରେଡିୟରଙ୍କ ଘରୁ ଧୂଆଁ ବାହାରୁଥିବା ଦେଖି ପଡୋଶୀ ପୋଲିସ ଓ ଅଗ୍ନିଶମ ବିଭାଗକୁ ଖବର ଦେଇଥିଲେ। ଘଟଣାସ୍ଥଳରେ ଦମକଳବାହିନୀର 3ଟି ଗାଡି ପହଞ୍ଚି ନିଆଁକୁ କାବୁ କରିଥିଲେ ।
ଏହାପରେ ପୋଲିସ ତୁରନ୍ତ ଦମ୍ପତିଙ୍କୁ ନିକଟସ୍ଥ ହସ୍ପିଟାଲରେ ଭର୍ତ୍ତି କରିଥିଲେ। ହେଲେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ତେବେ ନିଆଁ କିପରି ଲାଗିଥିଲା ସେନେଇ ତଦନ୍ତ କରୁଛି ପୋଲିସ।
