ଜୟପୁର: ରାଜସ୍ଥାନର ପୋଖରାନ ଅଞ୍ଚଳର ଭାଦରିଆ ଗାଁରେ ବୋମା ବିସ୍ଫୋରଣ ଯୋଗୁଁ ଏକ ନାବାଳିକାର ମୃତ୍ୟୁ ହୋଇଥିବା ସୂଚନା ମିଳିଛି। ଏହାସହ ଏହି ବୋମା ବିସ୍ଫୋରଣରେ ଆଉ ଜଣେ ନାବାଳକ ଗୁରୁତର ଭାବରେ ଆହତ ହୋଇଛି। ଆହତ ହୋଇଥିବା ନାବାଳକକୁ ସ୍ଥାନୀୟ ଏକ ଡାକ୍ତରଖାନାରେ ଭର୍ତ୍ତି କରାଯାଇଛି। ଏହି ଦୁଇ ନାବାଳକ ରାଜସ୍ଥାନ ସୀମାରୁ ଏକ ବମକୁ ନେଇ ଆସି ସେଥିରେ ଖେଳିବା ଆରମ୍ଭ କରି ଦେଇଥିଲେ। ତେବେ ଅଚାନକ ଏହି ବୋମାଟି ବିସ୍ଫୋରଣ ହୋଇଥିଲା।
ଆଜି(ରବିବାର) ଭାଦରିଆ ଗାଁର ଜଣେ ନାବାଳିକା ଓ ଜଣେ ନାବାଳକ ସୀମାରେ ଥିବା ଫିଲ୍ଡ ପାୟରିଂ ରେଞ୍ଜ ଆଡ଼କୁ ଖେଳିବାକୁ ଯାଇଥିଲେ। ଭାରତ - ପାକିସ୍ତାନ ସୀମା କୁହାଯାଉଥିବା ଏହି ଅଞ୍ଚଳରୁ ଏକ ବମକୁ ଖେଳନା ଭାବି ଦୁଇଜଣ ନେଇ ଆସିଥିଲେ। ଏହି ବମକୁ ଭାଦରିଆ ଗାଁର ଏକ କିଲୋମିଟର ଅଞ୍ଚଳକୁ ଆଣିଥିଲେ ନାବାଳକ। ଏହାପରେ ଦୁହେଁ ଏହି ବୋମାକୁ ଖୋଲିବାକୁ ଚେଷ୍ଟା କରୁଥିବା ବେଳେ ବୋମାଟି ବିସ୍ଫୋରଣ ହୋଇଯାଇଥିଲା।
ବୋମା ବିସ୍ଫୋରଣ ଯୋଗୁଁ ଘଟଣାସ୍ଥଳରେ ହିଁ ଜଣେ ନାବାଳିକାର ମୃତ୍ୟୁ ହୋଇଥିଲା। ଏହାସହ ଘଟଣାସ୍ଥଳରେ ଆଉ ଜଣେ ନାବାଳକ ଗୁରୁତର ଭାବରେ ଆହତ ହୋଇଥିଲା। ଘଟଣାସ୍ଥଳରେ ସ୍ଥାନୀୟ ଲୋକେ ପହଞ୍ଚି ଗୁରୁତର ନାବାଳକକୁ ଉଦ୍ଧାର କରିବା ସହ ସ୍ଥାନୀୟ ଡାକ୍ତରଖାନାରେ ଭର୍ତ୍ତି କରିଛନ୍ତି। ନାବାଳକର ଅବସ୍ଥାର ସଙ୍କଟାପନ୍ନ ରହିଥିବା ନେଇ ସୂଚନା ମିଳିଛି।
ଏହି ବୋମାଟି ସେଠାରେ କିଭଳି ଭାବରେ ପଡ଼ି ରହିଥିଲା, ସେନେଇ କୌଣସି ସୂଚନା ମିଳିପାରିନାହିଁ । ପାକିସ୍ତାନ ପକ୍ଷରୁ ଅସ୍ତ୍ରବିରତି ଉଲ୍ଲଂଘନ ବେଳେ ଏହି ବୋମା ପକାଯାଇଥିବା ସନ୍ଦେହ କରାଯାଉଛି । ତେବେ କୌଣସି କାରଣରୁ ବୋମାଟି ବିସ୍ଫୋରଣ ନ ହୋଇ ପଡ଼ି ରହିଥିଲା ।
ବ୍ୟୁରୋ ରିପୋର୍ଟ, ଇଟିଭି ଭାରତ
