ମୁମ୍ବାଇ: ମହାରାଷ୍ଟ୍ରର ସାକିନାକାରେ ଜଣେ ୩୨ ବର୍ଷୀୟା ମହିଳାଙ୍କୁ ଗଣଦୁଷ୍କର୍ମ ଓ ହତ୍ୟା ଘଟଣା ପରେ ମହିଳାଙ୍କ ସୁରକ୍ଷା ନେଇ ଆକ୍ସନ ମୋଡକୁ ଆସିଛି ମୁମ୍ବାଇ ପୋଲିସ । ଏଥିପାଇଁ ଏକ ନୂଆ ଅଭିଯାନ ଆରମ୍ଭ କରିବାକୁ ସ୍ଥିର କରିଛି ମୁମ୍ବାଇ ପୋଲିସ । ସହରର ୯୦ ଥାନାରେ ଗଠନ ହେବ ନିର୍ଭୟା ସ୍କାର୍ଡ । ଏନେଇ ବିଭାଗ ପକ୍ଷରୁ ପ୍ରସ୍ତୁତି ଆରମ୍ଭ ହୋଇଛି । ମହିଳାଙ୍କୁ ସୁରକ୍ଷା ଓ ମହିଳା ବିରୋଧୀ ଅପରାଧିକ ଘଟଣାକୁ ରୋକିବା ପାଇଁ ଏହି ପ୍ରଶିକ୍ଷିତ ସ୍ବତନ୍ତ୍ର ଟିମ କାମ କରିବ । ଏନେଇ ଗତକାଲି (ମଙ୍ଗଳବାର) ମୁମ୍ବାଇ ପୋଲିସ କମିଶନର ହେମନ୍ତ ନାଗରାଲ ଏହି ନିର୍ଦ୍ଦେଶ ଜାରି କରିଛନ୍ତି ।
ମିଳିଥିବା ସୂଚନା ଅନୁସାରେ, ସମସ୍ତ ପୋଲିସ ଷ୍ଟେସନର ମୋବାଇଲ-ପାଟ୍ରୋଲିଂ ଗାଡିର ନାମ ‘ନିର୍ଭୟା ସ୍କ୍ବାର୍ଡ’ । ପ୍ରତ୍ୟେକ ଟିମରେ ସବ୍-ଇନ୍ସପେକ୍ଟର, ଆସିଷ୍ଟାଣ୍ଟ ପୋଲିସ୍ ଇନ୍ସପେକ୍ଟର , ଜଣେ ଲେଖାଏଁ ମହିଳା ଓ ପୁରୁଷ କନଷ୍ଟେବଳ ଏବଂ ଡ୍ରାଇଭର ରହିବେ । ପ୍ରତ୍ୟେକ ଜୋନରେ ଜଣେ ମହିଳା ଆସିଷ୍ଟାଣ୍ଟ କମିଶନର କିମ୍ବା ପୋଲିସ୍ ଇନ୍ସପେକ୍ଟରଙ୍କ ତତ୍ତ୍ବାବଧାନରେ ଏହି ସ୍ବତନ୍ତ୍ର ଟିମ କାମ କରିବ ।
ନୂଆ କରି ଗଠିତ ହୋଇଥିବା ଏହି ସ୍ବତନ୍ତ୍ର ଟିମକୁ ପ୍ରଭାବଶାଳୀ କରିବା ପାଇଁ ଏକ ସ୍ବତନ୍ତ୍ର ଦୁଇ ଦିନିଆ ତାଲିମ ପ୍ରଦାନ କରାଯିବ । ଏହି ସ୍କ୍ବାର୍ଡ ବାଳିକା ହଷ୍ଟେଲ, ଅନାଥ ଆଶ୍ରମ, ଶିଶୁ ସୁରକ୍ଷା କେନ୍ଦ୍ର ଏବଂ ବିଦ୍ୟାଳୟ, ମହାବିଦ୍ୟାଳୟ ଓ ଆତ୍ମରକ୍ଷା ଶିବିରରେ ପାଟ୍ରୋଲିଂ କରିବ । ସେହିପରି ସାଧାରଣ ଅଭିଯୋଗ ପାଇଁ ବିଭିନ୍ନ ସ୍ଥାନରେ ବକ୍ସ ମଧ୍ୟ ସ୍ଥାପନ କରିବ ପୋଲିସ ।
ସାକିନାକା ଘଟଣା ପରେ ମୁଖ୍ୟମନ୍ତ୍ରୀ ଉଦ୍ଧବ ଠାକରେ ରାଜ୍ୟ ପୋଲିସ ମୁଖ୍ୟାଳୟ ପରିଦର୍ଶନ କରି ଉପ-ମୁଖ୍ୟମନ୍ତ୍ରୀ ଅଜିତ ପାୱାର ଏବଂ ରାଜ୍ୟ ଗୃହମନ୍ତ୍ରୀ ଦିଲୀପ ୱାଲସେ ପାଟିଲଙ୍କ ସହ ଆଲୋଚନା କରିଥିଲେ । ପରେ ପୋଲିସ ମହାନିର୍ଦ୍ଦେଶକ ସଞ୍ଜୟ ପାଣ୍ଡେଙ୍କ ସହ ମହିଳାଙ୍କ ସୁରକ୍ଷା ବ୍ୟବସ୍ଥା ଉପରେ ମଧ୍ୟ ଆଲୋଚନା କରିଥିଲେ ମୁଖ୍ୟମନ୍ତ୍ରୀ ଉଦ୍ଧବ ଠାକରେ ।
@IANS
