ବେଙ୍ଗାଲୁରୁ: 58 ବର୍ଷୀୟ ବ୍ୟକ୍ତିଙ୍କୁ ବଞ୍ଚାଇବା ପାଇଁ ନିଜର ହୃତପିଣ୍ଡ ଦାନ କଲେ 42 ବର୍ଷୀୟ ଯୁବକ । ଏମିତି ଏକ ବିରଳ ଘଟଣା ଘଟିଛି ବେଙ୍ଗାଲୁରୁ ସହରରେ । ହୃତପିଣ୍ଡ ପ୍ରତିରୋପଣ ଫଳରେ ଏକ ନୂଆ ଜୀବନ ପାଇବାରେ ସଫଳ ହୋଇଛନ୍ତି ବେଙ୍ଗାଲୁରୁର ସୁରେନ୍ଦ୍ର ବାବୁ । ତାଙ୍କୁ 42 ବର୍ଷୀୟ ଜଣେ ଯୁବକ ନିଜର ହୃତପିଣ୍ଡ ଦାନ କରିଥିବା ଜଣାପଡିଛି ।
ତେବେ ହୃତପିଣ୍ଡ ଦାନ କରିଥିବା ଯୁବକ ଜଣଙ୍କ ଗତ 14 ତାରିଖରେ ଷ୍ଟ୍ରୋକରେ ଶିକାର ହୋଇ ହସ୍ପିଟାଲରେ ଚିକିତ୍ସିତ ହେଉଥିଲେ । ତେବେ ତାଙ୍କୁ 16 ତାରିଖରେ ଡାକ୍ତର ବ୍ରେନ ଡେଡ ଘୋଷଣା କରିଥିଲେ । ପରେ ତାଙ୍କ ପରିବାର ସଦସ୍ୟମାନେ ଅଙ୍ଗଦାନ କରିବା ପାଇଁ ନିଷ୍ପତ୍ତି ନେଇଥିଲେ ।
ଏଥିପାଇଁ ନାରାୟଣ ହେଲ୍ଥ ସିଟିର ବିଷେଶଜ୍ଞ ମାନଙ୍କୁ ନେଇ ଏକ ଟିମ ଗଠନ କରାଯାଇଥିଲା । ହାର୍ଟ ସର୍ଜରୀ ବିଷେଶଜ୍ଞ ଡାକ୍ତର ଟି କୁମାରାନ ଏହି ବିଶେଷଜ୍ଞ ଟିମର ନେତୃତ୍ବ ନେଇଥିଲେ ।
ଉକ୍ତ ଟିମ ତାଙ୍କର ହାର୍ଟକୁ ସଫଳତାର ସହ ପୃଥକ କରି ପ୍ରତିରୋପଣ ପାଇଁ ହୃତପିଣ୍ଡକୁ ଆରଭି ହସ୍ପିଟାଲରୁ ଜେପି ନଗରର ନାରାୟଣ ହେଲ୍ଥ ସିଟିକୁ ସ୍ଥାନାନ୍ତରିତ କରାଯାଇଛି । ଏହି ସ୍ଥାନାନ୍ତରଣ ବେଳେ ସ୍ବତନ୍ତ୍ର ବ୍ୟବସ୍ଥା ଗ୍ରହଣ କରାଯାଇଥିଲା । ସ୍ଥାନାନ୍ତରଣ ପାଇଁ ବ୍ୟବହାର ହେବାକୁ ଥିବା ମାର୍ଗକୁ ସାମୟିକ ଭାବେ ଗ୍ରୀନ ଜୋନରେ ପରିଣତ କରାଯାଇଥିଲା ।
ଏହା ପାଇଁ ବେଙ୍ଗାଲୁରୁ ପୋଲିସ ମଧ୍ୟ ସହାୟତା କରିଥିଲା । ବେଙ୍ଗାଲୁରୁ ପୋଲିସ ଓ ଟ୍ରାଫିକ ସ୍ବତନ୍ତ୍ର ବ୍ୟବସ୍ଥା ଫଳରେ ଗ୍ରୀନ କରିଡର ମଧ୍ୟରେ ହୃତପିଣ୍ତକୁ ସତର୍କତାର ସହ ନାରାୟଣ ହେଲ୍ଥ ସିଟିକୁ ସ୍ଥାନାନ୍ତରିତ କରାଯାଇଛି । ପ୍ରାୟ 20 କିମି ଦୂରତାକୁ 23 ମିନିଟରେ ଅତିକ୍ରମ କରାଯାଇ ବେଶ ସତର୍କତାର ସହ ଏହି ସ୍ଥାନାନ୍ତରଣ ପ୍ରକ୍ରିୟାକୁ ଶେଷ କରାଯାଇଛି ।
ତେବେ ପ୍ରତିରୋପଣ ହେବାକୁ ଥିବା ସୁରେନ୍ଦ୍ର ବାବୁଙ୍କର ହୃତପିଣ୍ଡ ସମସ୍ୟା ଥିବାବେଳେ କେବଳ ଅଙ୍ଗ ପ୍ରତ୍ୟାରୋପଣ ଏକ ମାତ୍ର ବିକଳ୍ପ ବୋଲି ଡାକ୍ତର ତାଙ୍କୁ ପରାମର୍ଶ ଦେଇଥିଲେ । ଯୁବକ ଜଣଙ୍କ ସୁରେନ୍ଦ୍ର ବାବୁଙ୍କୁ ହାର୍ଟ ଦାନ କରିଥିବାବେଳେ କିଡନୀ ଓ ଫୁସଫୁସ ମଧ୍ୟ ଅନ୍ୟତ୍ର ଦାନ କରିଥିବା ଜଣାପଡିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
