ରାଞ୍ଚି: ଦେଶରେ ଆକାଶ ଛୁଆଁ ଟମାଟୋ ଦର । ଟମାଟୋରେ ହାତ ମାରି ହେଉନି । ଗରୀବ ମଧ୍ୟବିତ୍ତ ପରିବାର କଥା ଛାଡନ୍ତୁ ଧନୀକ ଶ୍ରେଣୀର ଲୋକଙ୍କ ପ୍ଲେଟରୁ ଗାଏବ ହେଇଗଲାଣି ବିଲାତି । ମହଙ୍ଗା ଦରକୁ ନେଇ ଚାରିଆଡେ ଚର୍ଚ୍ଚା । ଏମିତିକି ଚୋର ବି ଆଉ ସୁନାଅଳଙ୍କାର ନୁହେଁ ଟମାଟୋ ଚୋରିରେ ଲାଗି ପଡିଛନ୍ତି । ଏମିତି ଏକ ଖବର ଝାଡଖଣ୍ଡ ଗୁମଲା ଜିଲ୍ଲାରୁ ଆସିଛି । ଏଠି ଚୋରି ହୋଇଛି ସୁନା ଅଳଙ୍କାର ଦାମୀ ଜିନିଷ ନୁହେଁ 40 କିଲୋ ଟମାଟୋ । ଯାହା ଏବେ ଜିଲ୍ଲାରେ ଚର୍ଚ୍ଚାର ବିଷୟ ପାଲଟିଛି ।
ଏହି ଘଟଣାକୁ ନେଇ ସମସ୍ତେ ଆଶ୍ଚର୍ଯ୍ୟ ହୋଇଯାଇଛନ୍ତି । ଯେତେବେଳେ ଦୋକାନୀ ସକାଳୁ ଦୋକାନ ଖୋଲିଥିଲେ ସେତେବେଳେ ଦୋକାନରୁ ଟମାଟୋ ଗାଏବ ହୋଇଯାଇଥିବାର ଦେଖିଥିଲେ । ଏହାପରେ ଦୋକାନୀମାନେ ଏନେଇ ପୋଲିସକୁ ସୂଚନା ଦେଇଥିଲା । ତେବେ ଲୋକମାନେ ସିସିଟିଭି ମାଧ୍ୟମରେ ଚୋରକୁ ଚିହ୍ନଟ କରି କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ପୋଲିସକୁ ଦାବି କରିଛନ୍ତି ।
ଦେଶରେ ବର୍ତ୍ତମାନ ଟମାଟୋର ଦର ଆକାଶ ଛୁଆଁ ରହିଛି । ଏହି କାରଣରୁ ଲୋକମାନେ ଟମାଟୋ କିଣିବା ପ୍ରାୟତଃ ବନ୍ଦ କରିଦେଇଛନ୍ତି କିମ୍ବା କମ୍ ପରିମାଣର କିଣୁଛନ୍ତି । ଦିନକୁ ଦିନ ଟମାଟୋର ଦର ବୃଦ୍ଧି ହେତୁ ସୁନା-ରୁପା ଭଳି ଟମାଟୋକୁ ମଧ୍ୟ ଅପରାଧୀମାନେ ଟାର୍ଗେଟ କରିଛନ୍ତି । ଏହି କାରଣ ପାଇଁ ଟଙ୍କା ଓ ଅଳଙ୍କାର ପରି ଚୋରମାନେ ଟମାଟୋକୁ ମଧ୍ୟ ଚୋରି କରୁଛନ୍ତି । ତେବେ ଶୁକ୍ରବାର ରାତିରେ ଗୁମଲା ସହର ମଝିରେ ଥିବା ଟଙ୍ଗରା ପରିବା ମାର୍କେଟରେ କିଛି ଏଭଳି ଘଟଣା ଦେଖିବାକୁ ମିଳିଛି । ଏଠାରେ ଚୋରମାନେ ପରିବା ବେପାରୀମାନଙ୍କର ବାକ୍ସ ଭାଙ୍ଗି ଟମାଟୋ ଓ ଟଙ୍କା ଚୋରି କରିଛନ୍ତି । ତେବେ ଚୋରମାନେ ବେପାରୀମାନଙ୍କ ଦୋକାନରୁ ପ୍ରାୟ ୧୦ ହଜାରରୁ ଅଧିକ ଟଙ୍କା ଏବଂ ୪୦କିଗ୍ରା ଟମାଟୋ ଚୋରି କରିନେଇଛନ୍ତି । ଏହା ସହ ସେମାନଙ୍କର ନିକିତି ଓ ବଟକରାକୁ ମଧ୍ୟ ଚୋରି କରିନେଇଛନ୍ତି ।
