ଥିରୁଅନନ୍ତପୁରମ୍: ପୁଣି କେରଳରେ ଦୁଇ ଜଣଙ୍କ ଠାରେ ଜିକା ଭାଇରସ ଚିହ୍ନଟ ହୋଇଛି । ଏହାକୁ ମିଶାଇରେ କେରଳରେ ମୋଟ ଜିକା ଭାଇରସ ମାମଲା ସଂଖ୍ୟା 23କୁ ବୃଦ୍ଧି ପାଇଛି ।
ଏକ ଘରୋଇ ଡାକ୍ତରଖାନାରେ କାର୍ଯ୍ୟ କରୁଥିବା ଜଣେ ଡାକ୍ତର ଏବଂ ଜଣେ 16 ବର୍ଷର ବାଳିକାଙ୍କ ଠାରେ ମଙ୍ଗଳବାର ଏହି ଭାଇରସ ଚିହ୍ନଟ ହୋଇଛି । ତେବେ ଜୁଲାଇ 9 ତାରିଖରେ କେରଳରେ ଜଣେ ଗର୍ଭବତୀ ମହିଳାଙ୍କ ଠାରେ ପ୍ରଥମ ଜିକା ଭାଇରସ ଚିହ୍ନଟ ହୋଇଥିଲା । ଯାହାକୁ ନେଇ ରାଜ୍ୟର ବିଭିନ୍ନ ସ୍ଥାନରେ ହାଇଆଲର୍ଟ ଜାରି କରାଯାଇଥିଲା ।
ପୁଣେର ନ୍ୟାସନାଲ୍ ଇନଷ୍ଟିଚ୍ୟୁଟ୍ ଅଫ୍ ଭାଇରୋଲୋଜି (NIV)ରେ ମହିଳାଙ୍କ ନମୂନା ପରୀକ୍ଷା କରାଯାଇଥିଲା । ତେବେ ଜିକା ଭାଇରସ ମୁଖ୍ୟତଃ ଏଡିସ୍ ମଶା ଦ୍ବାରା ସଂକ୍ରମଣ ହୁଏ । ଏହି ମଶା ସାଧାରଣତଃ ଦିନରେ କାମୁଡି ଥାଏ । ଏହି ଭାଇରସର ଲକ୍ଷଣ ଗୁଡିକ ହେଲା ଜ୍ବର, କୁଣ୍ଡେଇ ହେବା, ମାଂସପେଶୀ ଏବଂ ଗଣ୍ଠି ଯନ୍ତ୍ରଣା, ମୁଣ୍ଡବିନ୍ଧା । ବିଶ୍ବ ସ୍ବାସ୍ଥ୍ୟ ସଂଗଠନ ଅନୁଯାୟୀ ଜିକା ଭାଇରସ ସଂକ୍ରମିତ ହେଲେ ଲୋକଙ୍କ ଠାରେ ଲକ୍ଷଣ ପରିଲକ୍ଷିତ ହୁଏନାହିଁ ।
ବ୍ୟୁରୋ ରିପୋର୍ଟ, ଇଟିଭି ଭାରତ
