ଥିରୁଅନନ୍ତପୁରମ: କୋରୋନା ସଙ୍କଟ ମଧ୍ୟରେ ଡରାଇଲାଣି ଜିକା ଭାଇରସ । ଗୋଟିଏ ଦିନ ପୂର୍ବରୁ କେରଳରୁ ପ୍ରଥମ ଜିକା ଭାଇରସ ମାମଲା ଚିହ୍ନଟ ହେବା ପରେ ଆଜି(ଶୁକ୍ରବାର) ରାଜ୍ୟରେ ଆଉ 14 ନୂଆ ମାମଲା ଚିହ୍ନଟ ହୋଇଛନ୍ତି । ବର୍ତ୍ତମାନ କେରଳରେ ସର୍ବମୋଟ 15ଟି ମାମଲା ରହିଛି । ଚିହ୍ନଟ ସଂକ୍ରମିତଙ୍କ ମଧ୍ୟରୁ ଅଧିକାଂଶ ସ୍ବାସ୍ଥ୍ୟକର୍ମୀ ହୋଇଥିବା ଜଣାପଡିଛି ।
ଗୁରୁବାର ପ୍ରଥମେ ଜଣେ 24 ବର୍ଷୀୟ ଗର୍ଭବତୀ ମହିଳାଙ୍କ ଠାରେ ଜିକା ଭାଇରସ ମାମଲା ଚିହ୍ନଟ ହୋଇଥିଲା । ମହିଳାଙ୍କ ଠାରେ ଜ୍ବର, ମୁଣ୍ଡବ୍ୟଥା, ଚର୍ମରେ ଲାଲ୍ ଦାଗ ଭଳି ଲକ୍ଷଣ ଦେଖାଯାଇଥିଲା । ପ୍ରାଥମିକ ଟେଷ୍ଟରେ ସେ ପଜିଟିଭ ଚିହ୍ନଟ ହୋଇଥିବାବେଳେ ତାଙ୍କ ନମୁନା ପୁଣେସ୍ଥିତ ନ୍ୟାସନାଲ ଇନଷ୍ଟିଚ୍ୟୁଟ ଅଫ୍ ଭିରୋଲୋଜିକୁ ପଠାଯାଇଥିଲା । ଗୁରୁବାର ମହିଳାଙ୍କ ଟେଷ୍ଟ ରିପୋର୍ଟରୁ ସେ ଜିକା ଭାଇରସ ସଂକ୍ରମିତ ଥିବା ସ୍ପଷ୍ଟ ହୋଇଥିଲା । ସେହିପରି ଅନ୍ୟ 14 ଜଣ ବ୍ୟକ୍ତି ମଧ୍ୟ ଜିକା ଭାଇରସ ସଂକ୍ରମିତ ଥିବା ଏହି ଇନଷ୍ଟିଚ୍ୟୁଟରୁ ଜଣାପଡିଛି ।
ମୁଖ୍ୟତଃ ଜ୍ବର, ଚର୍ମ ଲାଲ୍ ପଡିଯିବା, ଆଣ୍ଠୁଗଣ୍ଠି ଓ ମାଂସପେଶୀ ଯନ୍ତ୍ରଣା, ମୁଣ୍ଡବ୍ୟଥା ଓ ଦୁର୍ବଳ ଲାଗିବା ଆଦି ଜିକା ଭାଇରସ ସଂକ୍ରମଣର ଲକ୍ଷଣ । 3 ରୁ 14 ଦିନ ମଧ୍ୟରେ ଏହାର ଲକ୍ଷଣ ଦେଖାଯାଇଥାଏ ।
ତେବେ ରାଜ୍ୟରେ ଦିନକୁ ଦିନ ଜିକା ଭାଇରସ କେସ୍ ଲୋଡ ବଢୁଥିବାରୁ ଏକ କେନ୍ଦ୍ରୀୟ ଟିମ୍ କେରଳ ଗସ୍ତ କରିଛନ୍ତି । କିଭଳି ଭାଇରସକୁ ଚେକ ଦିଆଯିବ ସେ ନେଇ ଷ୍ଟ୍ରାଟେଜି କରାଯିବ ବୋଲି ସୂଚନା ମିଳିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
