ଅମରାବତୀ: ବର୍ତ୍ତମାନ ସମଗ୍ର ଦେଶରେ କୋଭିଡର ଦ୍ବିତୀୟ ଲହର ଜାରି ରହିଛି । ଯାହା ଦ୍ବାରା ଗତ କିଛି ଦିନ ହେବ ଅନେକ ଲୋକ ମହାମାରୀରେ ଆକ୍ରାନ୍ତ ହୋଇ ଅକ୍ସିଜେନ ଅଭାବରୁ ଜୀବନ ହାରୁଛନ୍ତି । ସେହିପରି ଏକ ଦୁଖଦ ଘଟଣା ସାମ୍ନାକୁ ଆସିଛି ଆନ୍ଧ୍ରପ୍ରଦେଶର ଅନନ୍ତପୁରମ ଜିଲ୍ଲାରେ। ଅକ୍ସିଜେନ ଅଭାବରୁ 14 ଜଣଙ୍କର ମୃତ୍ୟୁ ହୋଇଛି । ଏଭଳି ଅଭିଯୋଗ ଆଣିଛନ୍ତି ମୃତକଙ୍କ ସମ୍ପର୍କୀୟ ।
ଅନ୍ୟପଟେ ଅଭିଯୋଗକୁ ଖଣ୍ଡନ କରିଛନ୍ତି ଜଏଣ୍ଟ କଲେକ୍ଟର ନିଶାନ୍ତ କୁମାର । ସେ କହିଛନ୍ତି ଯେ, ଅନନ୍ତପୁରମ ଜିଲ୍ଲାରେ ଥିବା ସରକାରୀ ହସ୍ପିଟାଲରେ ଗତକାଲି(ଶନିବାର) 14 ଜଣର ମୃତ୍ୟୁ ହୋଇଛି । ହେଲେ ଏହା ଏପର୍ଯ୍ୟନ୍ତ ସ୍ପଷ୍ଟ ହୋଇନି ଯେ, ଅକ୍ସିଜେନ ଅଭାବରୁ ସମସ୍ତ ଆକ୍ରାନ୍ତଙ୍କ ମୃତ୍ୟୁ ହୋଇଛି । ଆକ୍ରାନ୍ତଙ୍କର ଭିନ୍ନ ଭିନ୍ନ କାରଣରୁ ମୃ୍ତ୍ୟୁ ହୋଇଥିବା କହିଛନ୍ତି ନିଶାନ୍ତ କୁମାର ।
ଘଟଣାରେ ବିଧାୟକ ଅନନ୍ତ ଭେଙ୍କଟାରାମିରେଡ୍ଡି ଡାକ୍ତରଖାନା ପରିଦର୍ଶନ କରିଛନ୍ତି। ବିଧାୟକ କହିଛନ୍ତି ଯେ, 'ସର୍ବଜନ ହସ୍ପିଟାଲର ଏହି ଘଟଣା ଅତି ଦୁର୍ଭାଗ୍ୟଜନକ ଅଟେ । ମୁଁ ଏହି ଘଟଣା ବିଷୟରେ ଜେସି ନିଶାନ୍ତଙ୍କ ସହ କଥା ହୋଇ ସମସ୍ତ ତଥ୍ୟ ପଚାରି ବୁଝିଛି । ଗୋଟେପଟେ ଅଧିକାରୀମାନେ ଅମ୍ଳଜାନର କୌଣସି ସମସ୍ୟା ଉପୁଜିନଥିବା କହୁଥିବାବେଳେ, ପୀଡିତଙ୍କ ସମ୍ପର୍କୀୟମାନେ ଭିନ୍ନ ଦାବି କରିଛନ୍ତି। କିଛି ଦିନ ପୂର୍ବରୁ ମୁଁ ଅମ୍ଳଜାନର ନିମ୍ନ ଚାପ ବିଷୟରେ ଡାକ୍ତରଖାନା କର୍ତ୍ତୃପକ୍ଷଙ୍କୁ ସତର୍କ କରିଥିଲି' । ତେବେ ଏପରି ଘଟଣା ପରେ ଏହା ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ' ।
ସେହିପରି ଅନ୍ୟପଟେ, କର୍ଣ୍ଣାଟକର କାଲାବୁରାଗି ଜିଲ୍ଲାରେ ଥିବା କେବିଏନ ହସ୍ପିଟାଲରେ ଅକ୍ସିଜେନ ଅଭାବରୁ 2 ଜଣ ଆକ୍ରାନ୍ତଙ୍କର ମୃତ୍ୟୁ ହୋଇଛି । ତେବେ ଡାକ୍ତରଖାନାରୁ ଅମ୍ଳଜାନ ଶେଷ ହେବା ପରେ ଡାକ୍ତରମାନେ ପଳାଇ ଯାଇଥିବାବେଳେ, ମୃତକଙ୍କ ପରିବାର ଡାକ୍ତରଖାନା ବୋର୍ଡ ବିରୋଧରେ ଅଭିଯୋଗ ଆଣି ହଙ୍ଗାମା କରିଛନ୍ତି।
ବ୍ୟୁରୋ ରିପୋର୍ଟ, ଇଟିଭି ଭାରତ
