ନୂଆଦିଲ୍ଲୀ: ଭାରତରେ ଅବୈଧ ଭାବେ ରହୁଥିବା ୧୪ ଚୀନ ନାଗରିକ ଅଟକ(14 Chinese nationals detained for illegally staying in India) । ବୁଧବାର ଦିଲ୍ଲୀର ସେକ୍ଟର ୪୯ ଥାନା ଅଞ୍ଚଳରୁ ସମସ୍ତଙ୍କୁ ଅଟକ ରଖାଯାଇଛି । ସେମାନଙ୍କ ମଧ୍ୟରେ ୧୩ ଜଣ ପୁରୁଷ ଓ ଜଣେ ମହିଳା ରହିଛନ୍ତି । ଏହି ନାଗରିକମାନେ ଦୁଇ ବର୍ଷ ହେଲା ଭାରତରେ ବେଆଇନ ଭାବେ ରହିଆସୁଥିଲେ । ସମସ୍ତେ ନୋଏଡା ସ୍ଥିତ ଗୋଟିଏ ଘରୋଇ ମୋବାଇଲ କମ୍ପାନୀରେ କାର୍ଯ୍ୟ କରୁଥିବା ସୂଚନା ମିଳିଛି ।
ପୋଲିସର କହିବାନୁଯାୟୀ, ଅଟକ ଥିବା ଚୀନ ନାଗରିକଙ୍କ ବିଜନେସ ଭିସାର ସମୟସୀମା ୨୦୨୦ରେ ଶେଷ ହୋଇଯାଇଥିଲା । ଏହାପରେ ସେମାନେ ଭିସା ଅବଧି ବଢାଇବାକୁ ଆବେଦନ କରିଥିଲେ, ଯାହାକି ଖାରଜ ହୋଇଯାଇଥିଲା । ଉଚ୍ଚ ପଦସ୍ତ ଅଧିକାରୀଙ୍କ ନିର୍ଦ୍ଦେଶକ୍ରମେ LIU ଗୌତମ ବୁଦ୍ଧ ନଗର ସ୍ଥାନୀୟ ପୋଲିସ ସହାୟତାରେ ସମସ୍ତ ଚୀନ ନାଗରିକଙ୍କୁ ହେପାଜତକୁ ନେଇଛି । ପ୍ରକାଶଥାଉ କି, ଗତବର୍ଷ ଉତ୍ତରପ୍ରଦେଶ ATS ଗୌତମ ବୁଦ୍ଧ ନଗରରୁ ଟଙ୍କା ଠକେଇ ମାମଲାରେ ଦୁଇ ଚୀନ ନାଗରିକଙ୍କୁ ଗିରଫ କରିଥିଲା ।
