ନୂଆଦିଲ୍ଲୀ: ଏଣିକି ସିବିଆଇକୁ ତାମିଲନାଡୁ ମନା । ରାଜ୍ୟ ସରକାରଙ୍କ ବିନା ଅନୁମତିରେ ଏଣ୍ଟ୍ରି କରିପାରିବନି ସିବିଆଇ । କେନ୍ଦ୍ରୀୟ ଯାଞ୍ଚ ଏଜେନ୍ସିକୁ ତାମିଲନାଡୁରେ ପ୍ରବେଶ ଉପରେ କଟକଣା ଲଗାଇଲେ ଷ୍ଟାଲିନ ସରକାର । ସରକାରୀ କାମରେ ରାଜ୍ୟରେ ପ୍ରବେଶ ପାଇଁ ରାଜ୍ୟ ସରକାରଙ୍କ ଅନୁମତି ନେବାକୁ ପଡିବ । ଆର୍ଥିକ ଅନିୟମିତତା ମାମଲାରେ ତାମିଲନାଡୁ ସରକାରଙ୍କ ଶିକ୍ଷାମନ୍ତ୍ରୀଙ୍କୁ ଗିରଫ କରିଥିଲା ପ୍ରବର୍ତ୍ତନ ନିର୍ଦ୍ଦେଶାଳୟ । ଗିରଫ ପରେ କାନ୍ଦି କାନ୍ଦି ଗଡି ଯାଇଥିଲେ ମନ୍ତ୍ରୀ । ଏପରିକି ତାଙ୍କ ସ୍ବାସ୍ଥ୍ୟବସ୍ଥା ବିଗିଡି ଯାଇଛି । ଏହି ଘଟଣା ପରେ ଏପରି ନିଷ୍ପତ୍ତି ନେଇଛନ୍ତି ଷ୍ଟାଲିନ ସରକାର । କେବଳ ତାମିଲନାଡୁ ନୁହେଁ ଏହା ପୂର୍ବରୁ ବିହାର, ପଶ୍ଚିମବଙ୍ଗ ଭଳି କେତେକ ରାଜ୍ୟରେ ସିବିଆଇ ପ୍ରବେଶ ଉପରେ ପ୍ରତିବନ୍ଧକ ଲଗାଯାଇଛି ।
ରାଜ୍ୟ ଗୃହ ମନ୍ତ୍ରଣାଳୟ ଦ୍ବାରା ଜାରି ହୋଇଥିବା ନିର୍ଦ୍ଦେଶାନାମା ଅନୁସାରେ, ଦିଲ୍ଲୀ ପୋଲିସ ଏଷ୍ଟାବ୍ଲିସମେଣ୍ଟ ଆକ୍ଟ ୧୯୪୬ ଅଧିନରେ, ଏବେ ରାଜ୍ୟରେ କୌଣସି ମାମଲାର ଯାଞ୍ଚ ପାଇଁ ସିବିଆଇକୁ ପ୍ରଥମେ ତାମିଲନାଡୁ ସରକାରଙ୍କ ଅନୁମତି ନେବାକୁ ପଡିବ । କାରଣ ‘ସାଧାରଣ ସହମତି’କୁ ପ୍ରତ୍ୟାହାର କରିନେଇଛନ୍ତି ତାମିଲନାଡୁ ସରକାର ।
ଏହା ମଧ୍ୟ ପଢନ୍ତୁ: ଗିରଫ ପରେ କାନ୍ଦି କାନ୍ଦି ଗଡି ଗଲେ ତାମିଲନାଡୁ ଶକ୍ତି ମନ୍ତ୍ରୀ
ଏହାମଧ୍ୟ ପଢନ୍ତୁ: ସିବିଆଇ ଓ ଇଡି ବିରୋଧରେ ସୁପ୍ରିମକୋର୍ଟ ଗଲେ ୧୪ ବିରୋଧି ଦଳ
ସାଧାରଣ ସହମତି ବା ଅନୁମତି କଣ ? ଦିଲ୍ଲୀ ସ୍ପେଶାଲ ପୋଲିସ ଏଷ୍ଟାବ୍ଲିସମେଣ୍ଟ ଆକ୍ଟ ୧୯୪୬ ଅଧିନରେ ସିବିଆଇର ଗଠନ ହୋଇଛି । ଏହି ଆଇନର ଧାରା ୬ ଅନୁସାରେ, ସିବିଆଇ କୌଣସି ବି ମାମଲାର ଯାଞ୍ଚ କରିବା ପୂର୍ବରୁ ରାଜ୍ୟ ସରକାରଙ୍କ ଅନୁମତି ନେବା ଆବଶ୍ୟକ ଅଟେ । ସାଧାରଣତଃ ଦେଖିବାକୁ ଗଲେ ପ୍ରାୟତଃ ରାଜ୍ୟ ସିବିଆଇକୁ ଯାଞ୍ଚ ପାଇଁ ସାଧାରଣ ଅନୁମତି ଦେଇଛନ୍ତି । ଏହି ଅନୁମତି ସିବିଆଇ ପାଇଁ ଏକ ଅସ୍ତ୍ର ଭଳି ବିନା ଦ୍ବିଧାରେ ସିବିଆଇ କୌଣସି ମାମଲାର ଯାଞ୍ଚ କରିପାରିବ । ଯଦି କୌଣସି ରାଜ୍ୟ ସିବିଆଇକୁ ଦେଇଥିବା ଏହି ଅନୁମତି ପ୍ରତ୍ୟାହାର କରିନିଅନ୍ତି ତେବେ ସିବିଆଇକୁ ମାମଲାର ଯାଞ୍ଚ ପାଇଁ ରାଜ୍ୟ ସରକାରଙ୍କ ଅନୁମତି ନେବାକୁ ପଡିବ । ବିନା ଅନୁମତିରେ ସିବିଆଇ ସେହି ରାଜ୍ୟର କୌଣସି ବ୍ୟକ୍ତି ବା କର୍ମଚାରୀ ବିରୋଧରେ ମାମଲା ରୁଜୁ କରିପାରିବ ନାହିଁ ।
ଅନୁମତି ନପାଇଲେ କଣ ସିବିଆଇ ଯାଞ୍ଚ କରିପାରିବନି: ଏ ପ୍ରଶ୍ନ ସାଧାରଣରେ ଆସିବା ସ୍ବାଭାବିକ । ଏ ପ୍ରଶ୍ନର ଉତ୍ତର ହେଉଛି ନା । ସିବିଆଇ କେନ୍ଦ୍ର ସରକାରଙ୍କ ଅଧିନରେ ରହିଛି ମାତ୍ର କୌଣସି ମାମଲାର ଯାଞ୍ଚ ପାଇଁ ହାଇକୋର୍ଟ, ସୁପ୍ରିମକୋର୍ଟ ବା କେନ୍ଦ୍ର ଠାରୁ ନିର୍ଦ୍ଦେଶ ମିଳିଥାଏ । କୌଣସି ରାଜ୍ୟର ମାମଲା ଯାଞ୍ଚ ପାଇଁ ରାଜ୍ୟ ସରକାରଙ୍କ ଅନୁମତି ନେବାକୁ ପଡିଥାଏ । କିନ୍ତୁ ଯଦି ନିର୍ଦ୍ଦେଶ ସୁପ୍ରିମକୋର୍ଟ, ହାଇକୋର୍ଟ କିମ୍ବା କେନ୍ଦ୍ର ଦେଇଥାଏ ରାଜ୍ୟ ସରକାରଙ୍କ ଅନୁମତି ନେବା ଆବଶ୍ୟକ ନଥାଏ ।
କେଉଁ କେଉଁ ରାଜ୍ୟରେ ସିବିଆଇ ଏଣ୍ଟ୍ରି ଉପରେ ଲାଗିଛି ପ୍ରତିବନ୍ଧକ: ସିବିଆଇକୁ ବ୍ୟାନ କରିବାରେ ତାମିଲନାଡୁ ପ୍ରଥମ ରାଜ୍ୟ ନୁହେଁ ଏହା ପୂର୍ବରୁ ୯ଟି ରାଜ୍ୟ ସିବିଆଇ ଉପରେ ପ୍ରତିବନ୍ଧକ ଲଗାଇ ସାରିଛନ୍ତି । ତାମିଲନାଡୁ ହେଉଛି ଦଶମ ରାଜ୍ୟ ଯିଏକି ପ୍ରତିବନ୍ଧକ ଲଗାଇଛି । ଏହା ପୂର୍ବରୁ ଝାଡଖଣ୍ଡ, ପଞ୍ଜାବ, ତେଲେଙ୍ଗାନା, ବିହାର, ମେଘାଳୟ, ଛତିଶଗଡ, କେରଳ, ମିଜୋରାମ ଓ ରାଜସ୍ଥାନରେ ସିବିଆଇ ଉପରେ ବ୍ୟାନ ଲଗାଯାଇଛି ।
ସିବିଆଇ ଭଳି କଣ ଅନ୍ୟ ଏଜେନ୍ସିଙ୍କୁ ଅନୁମତି ନେବାକୁ ପଡେ: ଏହାର ଉତ୍ତର ହେଉଛି ନା । କେବଳ ସିବିଆଇକୁ ତଦନ୍ତ ପାଇଁ ଅନୁମତି ନେବାକୁ ପଡେ । କେନ୍ଦ୍ର ସରକାରଙ୍କ ବାକି ଏଜେନ୍ସି ଯଥା ଇଡି ଓ ଏନଆଇଏକୁ ଅନୁମତି ନେବାକୁ ପଡିନଥାଏ । ଏହି ଏଜେନ୍ସି ଗୁଡିକ କେଉଁ ମାମଲାରେ ବି କୌଣସି ସ୍ଥାନକୁ ଯାଇ ଯାଞ୍ଚ କରିପାରିବେ । ଏଥିପାଇଁ ରାଜ୍ୟ ସରକାରଙ୍କ ଅନୁମତି ଆବଶ୍ୟକତା ପଡି ନଥାଏ ।
