2 ବନ୍ଧୁକଧାରୀ ଯୁବକ ଗିରଫ, ଅସ୍ତ୍ରଶସ୍ତ୍ର ଜବତ - Youth Arrested For Keeping Arms

Youth Arrested For Keeping Arms: ସମ୍ବଲପୁର: ବେଆଇନ ଭାବେ ବନ୍ଧୁକ ରଖିଥିବା 2 ଯୁବକ ଗିରଫ । ସେମାନଙ୍କ ଠାରୁ ଧାରୁଆ ଅସ୍ତ୍ର, ଗୁଳି ଭାବେ ବ୍ୟବହାର ହେଉଥିବା ଛର୍ରା ମଧ୍ୟ ଜବତ ହୋଇଛି । ଏନେଇ କୁଚିଣ୍ଡା SDPO ଅମିତାଭ ପଣ୍ଡା ସୂଚନା ଦେଇଛନ୍ତି । ଗିରଫ ହୋଇଥିବା ଯୁବକମାନେ ହେଲେ ଜମେନକିରା ଥାନା ଅନ୍ତର୍ଗତ ବଡ଼ ବାହାଲ ଗାଁର ଫକୀର ଛତ୍ରିଆ ଓ କିଶୋର କିଷାନ । ଗତକାଲି (ଶନିବାର) ସନ୍ଧ୍ୟା ସମୟରେ ଜମେନକିରା ପୋଲିସର ଟିମ ଗୌଡ଼ପାଲି, ବଡ଼ରମା ଅଞ୍ଚଳରେ ପେଟ୍ରୋଲିଙ୍ଗ କରିବାକୁ ଯାଉଥିଲା । ଏହି ସମୟରେ ବିଶେଷ ସୂତ୍ରରୁ ଖବର ପାଇବା ପରେ ସନ୍ଦେହଜନକ ଅବସ୍ଥାରେ ବୁଲୁଥିବା ଯୁବକଙ୍କୁ ଖୋଜାଖୋଜି କରିଥିଲା ।

ବଡରମା ଜଙ୍ଗଲ ନିକଟରୁ 2 ଯୁବକଙ୍କୁ ଠାବ କରିବା ସହ ସେମାନଙ୍କୁ ପଚରାଉଚରା କରିଥିଲା ପୋଲିସ । ଉଭୟ ଯୁବକ ରଖିଥିବା ବନ୍ଧୁକର ଲାଇସେନ୍ସ ମଧ୍ୟ ଦେଖାଇ ପାରିନଥିଲେ । ଯାହାକୁ ନେଇ ପୋଲିସର ସନ୍ଦେହ ବଢିଥିଲା । ସେମାନଙ୍କ ନିକଟରୁ 310 ଟି ଛର୍ରା, ଧାରୁଆ ଛୁରୀ ସମେତ ମୋବାଇଲ ଜବତ ହୋଇଛି । ଏହି ଅଞ୍ଚଳରେ ବଡରମା ଜଙ୍ଗଲ ଥିବାବେଳେ ବନ୍ୟ ଜନ୍ତୁ ଶିକାର ପାଇଁ ଏହି 2 ଯୁବକ ଚେଷ୍ଟା କରୁଥାଇପାରନ୍ତି ବୋଲି ସନ୍ଦେହ କରାଯାଉଛି l ତେବେ ପୋଲିସ ଏନେଇ କୌଣସି ସୂଚନା ଦେଇନାହିଁ ।

 

ଇଟିଭି ଭାରତ, ସମ୍ବଲପୁର