ରାମମୟ କଳାହାଣ୍ଡି, ଲାଗି ହେଲା ୫୧ କେଜିର ଲଡୁ

Shriram Pran Pratishtha Utsav: ଭବାନୀପଟଣା: ରାମ ମୟ କଳାହାଣ୍ଡି । ଲାଗି ହେଲା ୫୧ କେଜିର ଲଡୁ । ସାକାର ହୋଇଛି ରାମ ଭକ୍ତଙ୍କ ଦୀର୍ଘବର୍ଷ ସ୍ବପ୍ନ  । ସ୍ବର୍ଣ୍ଣିମ ଅକ୍ଷରରେ ଲିପିବଦ୍ଧ ହେଲା ଆଜିର ଦିନ । ରାମ ଭକ୍ତଙ୍କୁ ଭକ୍ତି ଭାବ ସାଗରରେ ଭସାଇ ଭବ୍ୟ, ଦିବ୍ୟ ସୁସଜ୍ଜିତ ମନ୍ଦିରରେ ବିରାଜିଲେ ମର୍ଯ୍ୟାଦା ପୁରୁଷୋତ୍ତମ ପ୍ରଭୁ ଶ୍ରୀରାମ ଚନ୍ଦ୍ର । ଅଯୋଧ୍ୟା ରାମ ମନ୍ଦିରରେ ମାହେନ୍ଦ୍ର ବେଳା ଓ ମାହାର୍ଘ୍ୟ ଶୁଭ ଅଭିଜିତ ମୁହୂର୍ତ୍ତରେ ହେଲା ଅଯୋଧ୍ୟ ରାମ ଲାଲାଙ୍କ ପ୍ରାଣ ପ୍ରତିଷ୍ଠା । ରାମଲାଲାଙ୍କ ଘରବାହୁଡ଼ାକୁ ନେଇ ସାରା ଭାରତ ବର୍ଷରେ ସବୁଠି ଶୁଭୁଛି ଜୟ ଶ୍ରୀରାମ ।

ସମ୍ପୂର୍ଣ ପରିବେଶ ହୋଇଛି ରାମ ମୟ ଗେରୁଆ ରଙ୍ଗରେ ରଙ୍ଗେଇ ହୋଇଛି ପୁରପଲ୍ଲୀ । ଏହି ପରିପ୍ରେକ୍ଷୀରେ କଳାହାଣ୍ଡି ଜିଲ୍ଲା ମଧ୍ୟ ହୋଇ ଉଠିଛି ରାମ ମୟ ଜିଲ୍ଲାର ସମସ୍ତ ମନ୍ଦିରମାନଙ୍କରେ ସ୍ଵତନ୍ତ୍ର ପୂଜା ବିଧି ସହ ପ୍ରସାଦ ମଧ୍ୟ ବଣ୍ଟନ କରାଯାଇଛି । ସବୁଠି ଶ୍ରଦ୍ଧାଳୁଙ୍କ ଭିଡ ଦେଖିବାକୁ ମିଳିଛି । ଭବାନୀପାଟଣା ସହରରେ ଥିବା ରାମ ସ୍ଵାମୀ ମନ୍ଦିରରେ ମଧ୍ୟ ହଜାର ହଜାର ଶ୍ରଦ୍ଧାଳୁଙ୍କ ଭିଡ ଦେଖିବାକୁ ମିଳିଛି । ବିଭିନ୍ନ ସଙ୍ଗଠନ ପକ୍ଷରୁ  ଅନନ୍ନ ବଣ୍ଟନ ସହ ବିଭିନ୍ନ ଅନୁଷ୍ଠାନ ମାନଙ୍କ ପକ୍ଷରୁ ରାମଙ୍କ ଶୋଭାଯାତ୍ରା ମଧ୍ୟ ଅନୁଷ୍ଟିତ ହୋଇଯାଇଛି । ସନ୍ଧ୍ୟା ହେବା ମାତ୍ରା  ଚାରି ଦିଗରେ ସୁସଜ୍ଜିତ ଆଲୋକ ମାଲା ସହ ବାଣ ଫୁଟାଇବା ସହ ଘରେ ଘରେ ଜଳୁଛି ଦୀପ । ସତେ ଯେମିତି ଆଜି ହିଁ ଦୀପାବଳୀ ପାଳନ କରୁଛନ୍ତି ଜିଲ୍ଲାବାସୀ । ସେପଟେ କଳାହାଣ୍ଡି ବ୍ରାହ୍ମଣ ସମାଜ ପକ୍ଷରୁ ରାମ ଲଲାଙ୍କ ପାଇଁ ୫୧ କେଜିର ବୁନ୍ଦି ଲଡୁ ଅର୍ପଣ କରାଯାଇଥିଲା ।

ଇଟିଭି ଭାରତ, କଳାହାଣ୍ଡି