ପ୍ରଚାର ମୈଦାନରେ ଦୀପାଳି: ଭୋଟରଙ୍କ ପାଦ ଛୁଇଁଲେ, ନାଚିଲେ - Jharsuguda constituency

Dipali Das Campaign: ଝାରସୁଗୁଡା: ୨୪ ନିର୍ବାଚନ ପାଇଁ ସମରସଜ୍ଜା ସରିଥିବା ବେଳେ ଏବେ ପ୍ରଚାର ମୈଦାନରେ ପ୍ରାର୍ଥୀ ସେମାନଙ୍କ ବଳ ଦେଖାଇବାରେ ବ୍ୟସ୍ତ  । ଏହି କ୍ରମରେ ଝାରସୁଗୁଡା ବିଜେଡି ବିଧାୟିକା ପ୍ରାର୍ଥିନୀ ଦୀପାଳି ଦାସ ମଙ୍ଗଳବାର ଦିନ ନିଜ ନିର୍ବାଚନ ମଣ୍ଡଳୀର କେଲଡାମାଲ ଓ କୁଲିହାମାଲ ଗ୍ରାମ ପଞ୍ଚାୟତର ସମସ୍ତ ଗ୍ରାମକୁ ଯାଇ ବିଶାଳ ଶୋଭାଯାତ୍ରା କରିବା ସହ ଜୋରଦାର ପ୍ରଚାର କରିଛନ୍ତି  । 

ଗାଁ ଗାଁ ବୁଲି ବୟସ୍କ ଭୋଟରମାନଙ୍କ ପାଖରେ ପହଞ୍ଚି ସେମାନଙ୍କୁ ମୁଣ୍ଡିଆ ମାରି ଭୋଟ ଭିକ୍ଷା କରିଛନ୍ତି ଦୀପାଳି । ଏଥିସହ ଯୋଡି ଶଙ୍ଖରେ ଭୋଟ ଦେଇ ଓଡ଼ିଶାରେ ନବୀନ ପଟ୍ଟନାୟକଙ୍କ ହାଠ ମୁଠାକୁ ଆହୁରି ଟାଣ କରିବା ପାଇଁ ଆହ୍ୱାନ ଦେଇଛନ୍ତି । ଏହି ଅବସରରେ ଦୀପାଳି କହିଛନ୍ତି, "ଝାରସୁଗୁଡାବାସୀ ମୋ ପରିବାର  । ସେମାନଙ୍କ ଆଶୀର୍ବାଦ ନେଉଛି  । ୨୦ ତାରିଖ ଦିନ ତାଙ୍କ ଝିଅ ପରୀକ୍ଷା ଦେବାକୁ ଯାଉଛି  । ସମସ୍ତେ ଆଶୀର୍ବାଦ ଦେଉଛନ୍ତି । ଜଣାଉଛନ୍ତି ଯେ ଆଗାମୀ ଦିନରେ ନିଶ୍ଚିତ ଡବଲ ଶଙ୍ଖ ବାଜିବ  ।" ଏହି ପ୍ରଚାର ସମୟରେ ହଜାର ହଜାର ସମର୍ଥକ ସାମିଲ ହୋଇଥିବା ଦେଖିବାକୁ ମିଳିଛି । ତେବେ ପ୍ରଚାର ବେଳେ ଦୀପାଳିଙ୍କୁ ଭୋଟରମାନେ ନଚାଇ ଥିବା ଦୃଶ୍ୟ ମଧ୍ୟ ଦେଖିବାକୁ ମିଳିଥିଲା  ।

ଇଟିଭି ଭାରତ, ଝାରସୁଗୁଡା