'ଦମନ'କୁ ଜାତୀୟ ଚଳଚ୍ଚିତ୍ର ପୁରସ୍କାର, ଭାବ ବିହ୍ୱଳ ହେଲେ ବାବୁସାନ, କହିଲେ ମୁଁ ନୁହେଁ... - Interview With Babushaan

Interview With Babushaan: ଭୁବନେଶ୍ବର: ଓଡ଼ିଆ ଚଳଚ୍ଚିତ୍ର ଶିଳ୍ପ ପାଇଁ ସଂଜୀବନୀ ସାଜିଥିବା 'ଦମନ' ସିନେମା ଜାତୀୟ ଚଳଚ୍ଚିତ୍ର ପୁରସ୍କାର ପାଇବା ପରେ ଖୁସି ବ୍ୟକ୍ତ କରିଛନ୍ତି ମୁଖ୍ୟ ଚରିତ୍ରରେ ଅଭିନୟ କରିଥିବା ବାବୁସାନ ମହାନ୍ତି । ପୁରସ୍କାରର ସମସ୍ତ ଶ୍ରେୟ ଦର୍ଶକଙ୍କୁ ଦେଇଛନ୍ତି ବାବୁସାନ । ଏହାସହ ଏହି ପୁରସ୍କାରରେ ନିଜ ବାପା ଓ ମାଆ ଅର୍ଥାତ ଓଡ଼ିଆ ସିନେମା ଜଗତର ଦିଗ୍ଗଜ ଅଭିନେତା ଅଭିନେତ୍ରୀ ଉତ୍ତମ ମହାନ୍ତି ଓ ଅପରାଜିତା ସବୁଠୁ ବେଶ ଖୁସି ବୋଲି ବ୍ୟକ୍ତ କରିଛନ୍ତି ବାବୁସାନ । କାରଣ ବାବୁସାନଙ୍କ ଏ ହେଉଛି ପ୍ରଥମ ଜାତୀୟ ଚଳଚିତ୍ର ପୁରସ୍କାର । ଏହି ପୁରସ୍କାର ଆଜି କେବଳ ରାଜ୍ୟକୁ ଗୌରବାନ୍ବିତ କରିନି ବରଂ କଳାକୁ ନେଇ ପରିଚିତ ଦୁଇ ବାପା-ମାଆଙ୍କୁ ମଧ୍ୟ ଖୁସି ପ୍ରଦାନ କରିଛି । ତେଣୁ ବାବୁସାନ ତାଙ୍କ ପ୍ରଥମ ଜାତୀୟ ଚଳଚ୍ଚିତ୍ର ପୁରସ୍କାରକୁ ନେଇ ଭାବବିହ୍ୱଳ ହୋଇଥିବା ବେଳେ ପରିଶ୍ରମ ଓ ଭଲ ଟିମ ହିଁ ଗୋଟେ ସିନେମାକୁ ଏହି ଶିଖରରେ ପହଞ୍ଚାଇଥାଏ ବୋଲି କହିଛନ୍ତି । ଏହି ସିନେମା ତାଙ୍କ ଜୀବନର ସବୁଠାରୁ ବଡ ଉପହାର ହୋଇଥିବା ବେଳେ ଏହା ତାଙ୍କୁ ଆଉ ଏକ ଭଲ ସିନେମା ଓଡ଼ିଆ ସିନେମା ଶିଳ୍ପକୁ ଭେଟିଦେବାର ପ୍ରେରଣା ଓ ଖୋରାକ ଯୋଗାଇବା ବୋଲି କହିଛନ୍ତି ବାବୁସାନ । 
 

ଇଟିଭି ଭାରତ, ଭୁବନେଶ୍ବର