ଖୋର୍ଦ୍ଧା, ବାଘମାରୀ ଥାନା ଓ ଭୂଷଣ୍ଡପୁର ଫାଣ୍ଡିର ନୂତନ କୋଠା ଉଦଘାଟନ

CM Inaugurats New Building Of Police Station: ଖୋର୍ଦ୍ଧା: ଜିଲ୍ଲାର ଖୋର୍ଦ୍ଧା ଓ ବାଘମାରୀ ଥାନା ସହ ଭୂଷଣ୍ଡପୁର ଫାଣ୍ଡିର ନୂତନ କୋଠା ଉଦଘାଟନ ହୋଇଛି । ଭିଡିଓ କନଫରେନ୍ସିଂ ମାଧ୍ୟମରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହି ନୂତନ କୋଠାକୁ ଉଦଘାଟନ କରିଛନ୍ତି । ଏଥିପାଇଁ ଉଭୟ ଥାନାରେ ସ୍ଵତନ୍ତ୍ର ବ୍ୟବସ୍ଥା କରାଯାଇଥିଲା । ଖୋର୍ଦ୍ଧାର ନୂତନ ଥାନା କୋଠା ଉଦଘାଟନୀ ଅବସରରେ ବିଧାୟକ ଜ୍ୟୋତିରିନ୍ଦ୍ର ନାଥ ମିତ୍ର, ଆଇଜି ଆଶିଷ ସିଂ, ଏସପି ବି. ଯୁଗଳ କିଶୋର ଯୋଗଦେଇଥିବା ବେଳେ ବାଘମାରୀ ଥାନା ଉଦଘାଟନୀ ଉତ୍ସବରେ ବେଗୁନିଆ ବିଧାୟକ ତଥା ଜିଲ୍ଲା ଯୋଜନା ବୋର୍ଡ ଅଧ୍ୟକ୍ଷ ରାଜେନ୍ଦ୍ର କୁମାର ସାହୁ, ବେଗୁନିଆ ବ୍ଲକ ଅଧ୍ୟକ୍ଷ ଲକ୍ଷ୍ମୀଧର ସୁବୁଦ୍ଧି, ବିଜେଡି ରାଜ୍ୟ ସମ୍ପାଦକ ପ୍ରଦୀପ ସାହୁ, ଅତିରିକ୍ତ ଏସପି ସୁରେନ୍ଦ୍ର ନାଥ ମୁର୍ମୁ ଯୋଗ ଦେଇଥିଲେ । ସେହିପରି ଭୂଷଣ୍ଡପୂର ଫାଣ୍ଡିର ନୂତନ କୋଠା ମଧ୍ୟ ଉଦଘାଟିତ ହୋଇଯାଇଛି । 
 

 ଏହା ମଧ୍ୟ ପଢନ୍ତୁ: ଉଦଘାଟନ ହେଉନି ଥାନାର ନୂତନ କୋଠା; ହନ୍ତସନ୍ତ ଜନସାଧାରଣ

ସୂଚନା ଅନୁସାରେ, ୨୦୨୨ ମସିହାରେ ୩ କୋଟି ୨୮ ଲକ୍ଷ ୯୪ ହଜାର ଟଙ୍କା ଲେଖାଏଁ ବ୍ୟୟରେ ଉଭୟ ଥାନା ପରିସରରେ ନୂତନ କୋଠା ନିର୍ମାଣ କାର୍ଯ୍ୟ ପୋଲିସ ହାଉସିଂ ବୋର୍ଡ ପକ୍ଷରୁ କରାଯାଇଛି । ଏହି ଥାନା କର୍ପୋରେଟ କାର୍ଯ୍ୟାଳୟ ଢାଞ୍ଚାରେ ନିର୍ମାଣ ହୋଇଛି । ଥାନା ଘର ତିନି ମହଲା ବିଶିଷ୍ଟ ହୋଇଥିବା ବେଳେ ଏହି ଥାନାରେ ଅଭିଯୋଗକାରୀଙ୍କୁ ସମସ୍ତ ପ୍ରକାର ସୁବିଧା ସୁଯୋଗ ଦେବାକୁ ପ୍ରାଥମିକତା ଦିଆଯିବ । ପ୍ରଥମ ମହଲାରେ ଚାଲିବ ଥାନା କାର୍ଯ୍ୟ, ହାଜତ ଓ ମାଲ ଖାନା । ସେହିପରି ଦ୍ବିତୀୟ ମହଲାରେ ରାଇଟର ଓ ପାସପୋର୍ଟ ଯାଞ୍ଚ ସେଲ ରହିବ । ଉପର ମହଲାରେ ରହିଛି ବାରାକ ।

ଇଟିଭି ଭାରତ, ଖୋର୍ଦ୍ଧା