କାକଟପୁର ବିଜେଡିରେ ଫାଟ, ସୁରେନ୍ଦ୍ର ସମର୍ଥକଙ୍କ ଶକ୍ତି ପ୍ରଦର୍ଶନ - BJD Power Show In Kakatpur

BJD Power Show:ନିମାପଡ଼ା: କାକଟପୁର ବିଜେଡିରେ ଫାଟ । ପୂର୍ବତନ ବିଧାୟକ ସୁରେନ୍ଦ୍ର ସେଠୀଙ୍କ ସମର୍ଥକଙ୍କ ଶକ୍ତି ପ୍ରଦର୍ଶନ । ପୁରୀ ଜିଲ୍ଲାରେ କାକଟପୁର ବିଧାନସଭା ଆସନ ପାଇଁ ଏ ପର୍ଯ୍ୟନ୍ତ ପ୍ରାର୍ଥୀ ଘୋଷଣାକୁ ନେଇ ବିଜେଡି, ବିଜେପି ଏବଂ କଂଗ୍ରେସ ଦଳରେ ଛକାପଞ୍ଝା ଲାଗି ରହିଛି । ସେପଟେ ଶାସକ ବିଜେଡ଼ିରେ ଆଶାୟୀ ପ୍ରାର୍ଥୀ ଭାବେ ଗୃହରାଷ୍ଟ୍ର ମନ୍ତ୍ରୀ ତୁଷାରକାନ୍ତି ବେହେରା ଓ ପୂର୍ବତନ ବିଧାୟକ ସୁରେନ୍ଦ୍ର ସେଠୀ ପ୍ରମୁଖ ଦାବିଦାର ରହିଛନ୍ତି । ହେଲେ ଆଜି ତୁଷାରଙ୍କ ବିରୋଧୀ ଗୋଷ୍ଠୀ ଆଜି ବନ୍ଧୁ ମିଳନ ନାମରେ ଶକ୍ତି ପ୍ରଦର୍ଶନ କରିବା ସହ ସୁରେନ୍ଦ୍ରଙ୍କ ଦଳୀୟ ଟିକେଟ ପ୍ରଦାନ କରିବା ପାଇଁ ଦାବି କରିଛନ୍ତି  ।  

ଆଜି ମହାବିଷୁବ ସଂକ୍ରାନ୍ତି ଅବସରରେ କାକଟପୁର ଦେଉଳି ମଠ ଠାରେ ଆୟୋଜିତ ବନ୍ଧୁ ମିଳନ କାର୍ଯ୍ୟକ୍ରମରେ  ସୁରେନ୍ଦ୍ର ସେଠୀଙ୍କ ସମର୍ଥକ ତଥା କାକଟପୁର ବ୍ଲକ ଅଧକ୍ଷ ଶ୍ରୀଧର ନାୟକ, ଅସ୍ତରଙ୍ଗ ବ୍ଲକ ଅଧକ୍ଷା ଆରତୀ ନାୟକଙ୍କ ସମେତ ଗୋପ ବ୍ଲକ ବିଭିନ୍ନ ପଞ୍ଚାୟତର ଶତାଧିକ ନିର୍ବାଚିତ ପ୍ରତିନିଧି, ପୂର୍ବତନ ସରପଞ୍ଚ, ସମିତି ସଭ୍ୟ, ପୂର୍ବତନ ଜିଲ୍ଲାପରିଷଦ ସଦସ୍ୟ ପ୍ରମୁଖ ଉପସ୍ଥିତ ରହି ଶକ୍ତି ପ୍ରଦର୍ଶନ କରିଥିଲେ । ମନ୍ତ୍ରୀ ତୁଷାରକାନ୍ତିଙ୍କ ବିରୋଧରେ ବିଶୋଦଗାର କରିବା ସହ ସୁରେନ୍ଦ୍ର ସେଠୀଙ୍କୁ ବିଧାୟକ ପ୍ରାର୍ଥୀ କରିବା ପାଇଁ ମୁଖ୍ୟମନ୍ତ୍ରୀଙ୍କ ନିକଟରେ ଦୃଢ଼ ଦାବି ଜଣାଇଥିଲେ । ଏହି ଶକ୍ତି ପ୍ରଦର୍ଶନ ଫଳରେ ବିଜେଡ଼ି ମଧ୍ୟରେ ଥିବା ତୀବ୍ର ଅସନ୍ତୋଷକୁ ପ୍ରତିଫଳିତ ହୋଇଥିଲା । 

ଇଟିଭି ଭାରତ, ନିମାପଡ଼ା