ହାଇଦ୍ରାବାଦ: ଜହ୍ନ ହେଉଛି ପୃଥିବୀର ଏକ ବିଶ୍ବାସଯୋଗ୍ୟ ସାଥୀ କହିଲେ ଅତ୍ୟୁକ୍ତି ହେବ ନାହିଁ । ଜହ୍ନକୁ ପୃଥିବୀର ଉପଗ୍ରହ ବୋଲି କୁହାଯାଏ । ପୃଥିବୀ ନିକଟରେ ଦୀର୍ଘ 4.5 ବିଲିଅନ ବର୍ଷ ଧରି ଜହ୍ନ ଘୁରି ବୁଲୁଛି । ତେବେ ଆପଣ କେବେ ଚିନ୍ତା କରିଛନ୍ତି କି ସେତେବେଳେ କଣ ହେବ ଯେତେବେଳେ ହଠାତ ଜହ୍ନ ନିଜ କକ୍ଷପଥରୁ ଉଭାନ ହୋଇଯିବ ଜହ୍ନ । ତେବେ ଗବେଷକଙ୍କ ମତରେ ଗ୍ରହମାନଙ୍କ ମଧ୍ୟରେ ଏକ ସନ୍ତୁଳନ ରକ୍ଷା କରିବା ଲାଗି ଜହ୍ନର ବହୁ ଗୁରୁତ୍ବପୂର୍ଣ୍ଣ ଭୂମିକା ରହିଛି । ମନୁଷ୍ୟ କ୍ଷେତ୍ରରେ ଜ୍ୟୌତିର୍ବିଜ୍ଞାନଠୁ ଆରମ୍ଭ କରି ଅନେକ କ୍ଷେତ୍ରରେ ଜହ୍ନର ବହୁ ଆବଶ୍ୟକତା ରହିଛି ।
ପ୍ରଭାବିତ ହେବ ତରଙ୍ଗ:-
ଯଦି ଜହ୍ନ ହଠାତ ଗାଏବ ହୋଇଯାଏ ତେବେ ସମୁଦ୍ର ତରଙ୍ଗ ଉପରେ ପ୍ରଭାବ ପଡ଼ିବ । ସମୁଦ୍ର ମଧ୍ୟରେ ସନ୍ତୁଳନ ରହିବ ନାହିଁ । ସମୁଦ୍ର ତଟବର୍ତ୍ତୀ ଅଞ୍ଚଳ ଖାଇୟିବା ସାଙ୍ଗକୁ ବନ୍ୟା ପରିସ୍ଥିତି ଉପୁଜିବ । ଏହାସହିତ ସାମୁଦ୍ରିକ ଇକୋସିଷ୍ଟମରେ ମଧ୍ୟ ଗଡବଡ଼ି ଦେଖିବାକୁ ମିଳିବ ।
ପୃଥିବୀର କକ୍ଷପଥରେ ସ୍ଥିରତା ବଜାୟ ରଖେ ଜହ୍ନ:-
ଗବେଷକଙ୍କ ମତରେ ଜହ୍ନର ମାଧ୍ୟାକର୍ଷଣ ଶକ୍ତି ଯୋଗୁଁ ପୃଥିବୀ ତାର କକ୍ଷପଥରେ ସନ୍ତୁଳିତ ଢଙ୍ଗରେ ଘୂରିଥାଏ । ଯଦି ଜହ୍ନ ରହିବ ନାହିଁ, ତେବେ ପୃଥିବୀର କକ୍ଷପଥରେ ପରିବର୍ତ୍ତନ ଦେଖିବାକୁ ମିଳିବ । ଏହାଦ୍ବାରା ପାଣିପାଗରେ ମଧ୍ୟ ପରିବର୍ତ୍ତନ ଦେଖାଯିବ । ପୃଥିବୀରେ କିଛି ସ୍ଥାନ ଅଧିକ ଗରମ ହୋଇଯିବ ଓ ଆଉ କିଛି ସ୍ଥାନ ଅଧିକରୁ ଅଧିକ ଥଣ୍ଡା ହୋଇଯିବ ।
ବୃଦ୍ଧି ପାଇବ ଭୂମିକମ୍ପ:-
ଜହ୍ନର ମାଧ୍ୟାକର୍ଷଣ ଶକ୍ତି ପୃଥିବୀର ଟେକ୍ଟୋନିକ ପ୍ଲେଟରେ ସ୍ଥିରତା ବଜାୟ ରଖିଥାଏ । ଯଦି ଏପରି ନହେବ ତେବେ ବାରମ୍ବାର ଭୂମିକମ୍ପ ଅନୁଭୂତ ହେବା ସହ ଆଗ୍ନେୟଗିରି ଉଦଗୀରଣ ହେବ । ଏପରି ବାରମ୍ବାର ହେଲେ ଅକାଳରେ ଅନେକ ଲୋକଙ୍କ ମୃତ୍ୟୁ ଘଟିବା ସହ ପ୍ରକୃତିର ମଧ୍ୟ ବ୍ୟାପକ କ୍ଷତି ହେବ ।
ନିଦରେ ସମସ୍ୟା ଓ ହାର୍ଟ ଉପରେ ପ୍ରଭାବ:-
ଖାଲି ସେତିକି ନୁହେଁ, ପ୍ରକୃତି ସାଙ୍ଗକୁ ମନୁଷ୍ୟ ଜୀବନ ଉପରେ ମଧ୍ୟ ଗଭୀର ପ୍ରଭାବ ପଡ଼ିବ । ଜହ୍ନ ନିଜ କକ୍ଷପଥରେ ଘୁରୁଥିବାରୁ ଆମ ନିଦକୁ ନିୟନ୍ତ୍ରଣ କରିଥାଏ । ଯଦି ଜହ୍ନ ରହିବ ନାହିଁ, ତେବେ ଆମ ନିଦ ପ୍ୟାଟର୍ଣ୍ଣ ଉପରେ ପ୍ରଭାବ ପଡ଼ିବ । ନିଦ ହେବାରେ ସମସ୍ୟା ସାଙ୍ଗକୁ ଭୋକ ଲାଗିବା ଓ ଅନ୍ୟ ସ୍ବାସ୍ଥ୍ୟ ସମସ୍ୟା ଦେଖିବାକୁ ମିଳିବ ।
ଏହା ବି ପଢନ୍ତୁ- 2026 ଯାଏଁ ଚନ୍ଦ୍ରପୃଷ୍ଠକୁ ଅନ୍ତରୀକ୍ଷ ଯାତ୍ରୀ ପଠାଇବନି ନାସା
ପରିଶେଷରେ, କହିବାକୁ ଗଲେ ଜହ୍ନ ବିନା ମଣିଷ ଜୀବନ ଅସମ୍ଭବ । ଏହା ପ୍ରକୃତି ଯେପରିକି ସମୁଦ୍ର, ପାଣିପାଗ, ଭୌଗୋଳିକ ସାଙ୍ଗକୁ ମଣିଷ ଶରୀର ଉପରେ ମଧ୍ୟ ପ୍ରଭାବ ପକାଇବ । ମନୁଷ୍ୟ ଜୀବନରେ ଜହ୍ନକୁ ଦେଖି ବିଭିନ୍ନ ତିଥି ନିର୍ଦ୍ଧାରଣ ମଧ୍ୟ କରାଯାଏ । ଏହା ଉପରେ ଜ୍ୟୌତିର୍ବିଜ୍ଞାନ ମଧ୍ୟ ନିର୍ଭରଶୀଳ । ଜହ୍ନ ବିନା ମଣିଷ ଜୀବନ ଭାବିବା ନିହାତି ଅସମ୍ଭବ ।
