ହାଇଦ୍ରାବାଦ: ଓଟିଟି ପ୍ଲାଟଫର୍ମ ନେଟଫ୍ଲିକ୍ସରେ ଆଜିକାଲି ସମସ୍ତେ ନିଜ ନିଜ ପସନ୍ଦର ଫିଲ୍ମ, ୱେବ ସିରିଜ ଆଦି ଦେଖୁଛନ୍ତି । କୌଣସି ଫିଲ୍ମ ଦେଖୁଥିଲେ ଏହାର ଗୋଟିଏ ଗୋଟିଏ ସିନ୍ ଦର୍ଶକଙ୍କ ମନକୁ ଛୁଇଁଯାଏ । ସେମାନେ ଏହାକୁ ସୋସିଆଲ ମିଡିଆ ହେଉ କି ବନ୍ଧୁ ପରିଜନଙ୍କ ସହିତ ସେୟାର କରିବାକୁ ଚାହାଁନ୍ତି । ହେଲେ ସ୍କ୍ରିନସଟ୍କୁ ଅନୁମତି ନଥିବାରୁ କେହି କେହି ଅନ୍ୟ କୌଣସି ଡିଭାଇସର ସହାୟତା ନିଅନ୍ତି । ଅର୍ଥାତ ଆଉ ଗୋଟେ ମୋବାଇଲ ଆଣି ଉକ୍ତ ସିନ୍କୁ କ୍ୟାପଚର କରନ୍ତି । ଏବେ ଆଉ କଷ୍ଟ କରିବାକୁ ପଡ଼ିବ ନାହିଁ । ନୂଆ ଫିଚର ଆଣିଛି ନେଟଫ୍ଲିକ୍ସ ।
ନେଟଫ୍ଲିକ୍ସ ନୂଆ ଫିଚର 'Moments' ଆଣି ଏହାକୁ ଅତି ସହଜ କରିଛି । ଏବେ ଆପଣ ଅତି ସହଜରେ ଯେକୌଣସି ଫିଲ୍ମ ବା ଶୋ'ର ସିନ୍କୁ କ୍ୟାପଚର, ସେଭ ଓ ସେୟାର କରିପାରିବେ । ନିଜ ମୋବାଇଲରୁ ସେୟାର କରିପାରିବେ । ନେଟଫ୍ଲିକ୍ସ ପୂର୍ବରୁ କଣ୍ଟେଣ୍ଟ ସେୟାରକୁ ଅନୁମତି ଦେଉନଥିବାରୁ ସ୍କ୍ରିନସଟ୍ ନେବା ମାତ୍ରେ ଏହା ବ୍ଲାକ୍ ଭଳି ଆସିଥାଏ । ମାତ୍ର ନୂଆ ଫିଚର ସାହାଯ୍ୟରେ iOS ୟୁଜର ଆଜିଠୁ ଏହାର ସୁବିଧା ପାଇପାରିବେ । ଆଉ କିଛି ସପ୍ତାହ ମଧ୍ୟରେ ଆଣ୍ଡ୍ରଏଡ ୟୁଜର ମଧ୍ୟ ସ୍କ୍ରିନସଟ୍ ନେଇପାରିବେ ।
| ଏହା ବି ପଢନ୍ତୁ |
କେମିତି କାମ କରିବ ଏହି ଫିଚର ?
- ଧରନ୍ତୁ ଆପଣ କୌଣସି ଫିଲ୍ମ ବା ଶୋ' ଦେଖୁଛନ୍ତି । ଏଠାରେ ଏପରି ଏକ ସିନ୍ ଆସିଲା ଯାହାକୁ ଆପଣ କ୍ୟାପଚର କରିବାକୁ ଚାହୁଁଛନ୍ତି ।
- ତେବେ ସ୍କ୍ରିନର ତଳ ଭାଗରେ ଥିବା Moments ବଟନ୍ ଉପରେ ଟାପ୍ କରନ୍ତୁ ।
- ଏହାପରେ ସଙ୍ଗେ ସଙ୍ଗେ ଉକ୍ତି ସିନ୍ଟି ଆପଣଙ୍କ 'My Netflix tab'ରେ ସେଭ୍ ହୋଇଯିବ । ଆପଣ ପରେ ଏହାକୁ ଯାଇ ଦେଖିପାରିବେ ।
କେମିତି ସେୟାର କରିବେ ?
- ନେଟଫ୍ଲିକ୍ସରେ ନିଆଯାଇଥିବା ସ୍କ୍ରିନସଟ୍କୁ ସେୟାର କରିବା ମଧ୍ୟ ଆହୁରି ସହଜ ।
- ଆପଣ ଥରେ ସିନ୍କୁ ସେଭ୍ କରିବା ପରେ ଏହାକୁ ସିଧାସଳଖ ସୋସିଆଲ ମିଡିଆ ପ୍ଲାଟଫର୍ମ ଫେସବୁକ, ଇନଷ୍ଟାଗ୍ରାମ ଓ ଅନ୍ୟ ପ୍ଲାଟଫର୍ମରେ ପୋଷ୍ଟ କରିପାରିବେ ।
- ଏଥିଲାଗି ଆପଣଙ୍କୁ My Netflix tabକୁ ଯିବାକୁ ହେବ । ସେଠାରୁ ହିଁ ସେୟାର କରିପାରିବେ ।
