ରାଇରଙ୍ଗପୁର: ମଣିଷପଣିଆ ହଜାଇ ନୃଶଂସ ପାଲଟିଲା ମଣିଷ । କୁରାଢି ଚୋଟରେ ଜନୈକା ବୃଦ୍ଧାଙ୍କ ମୁଣ୍ଡ ଗଣ୍ଡି ଅଲଗା କରିଦେଲା ପଡୋଶୀ । କୌଣସି କାରଣରୁ ପଡୋଶୀ ଜଣକ ଜଣେ ବିଧବା ମହିଳାଙ୍କୁ କୁରାଢ଼ୀ ସାହାଯ୍ୟରେ ହାଣି ନୃଶଂସ ଭାବେ ହତ୍ୟା କରିଛି । ତେବେ ଏଭଳି ଏକ ଅଭାବନୀୟ ଘଟଣା ଘଟି ଯାଇଛି ମୟୂରଭଞ୍ଜ ଜିଲ୍ଲା ବଡ଼ସାହି ଥାନା ଅନ୍ତର୍ଗତ ନିଶ୍ଚିନ୍ତପୁର ଗ୍ରାମରେ । ହତ୍ୟା ଅଭିଯୁକ୍ତ ଜଣକ ବଡ଼ସାହି ଥାନା ନିଶ୍ଚିନ୍ତପୁର ଗ୍ରାମର ବାବୁଲି ମହାକୁଡ ଏବଂ ମୃତ ବିଧବା ବୃଦ୍ଧା ଜଣକ ଗୌରୀ ବେହେରା ଓ ତାଙ୍କ ବୟସ ୭୨ ବର୍ଷ ବୋଲି ପୋଲିସ ପକ୍ଷରୁ ସୂଚନା ମିଳିଛି ।
ସୂଚନା ଅନୁଯାୟୀ, ବିଧବା ବୃଦ୍ଧା ଜଣକ କୌଣସି କାମରେ ଘରୁ ବାହାରକୁ ଯାଉଥିବା ସମୟରେ ଗାଁ ଦାଣ୍ଡରେ ହିଁ ବାବୁଲି ମହାକୁଡ ଏକ କୁରାଢ଼ୀ ସାହାଯ୍ୟରେ ଅତର୍କିତ ଭାବେ ଆକ୍ରମଣ କରିଥିଲେ । ବୃଦ୍ଧାଙ୍କୁ ଅତି ନୃଶଂସ ଭାବେ ହାଣି ପକାଇ ମୁଣ୍ଡଟିକୁ ଦେହରୁ ଅଲଗା କରି ପକାଇଥିଲେ ଅଭିଯୁକ୍ତ ବାବୁଲି । ହତ୍ୟାକାଣ୍ଡ ଘଟାଇବା ପରେ ଅଭିଯୁକ୍ତ ବାବୁଲିକୁ ଗ୍ରାମବାସୀ ମାନେ ଅଟକ ରଖି ବଡ଼ସାହି ଥାନା ପୋଲିସକୁ ଖବର ଦେଇଥିଲେ । ଖବର ପାଇ ବଡ଼ସାହି ଥାନା ଅଧିକାରୀ ଉମାଶଙ୍କର ନାୟକ ଘଟଣା ସ୍ଥଳରେ ପହଞ୍ଚି ଅଭିଯୁକ୍ତକୁ ଗିରଫ କରିବା ସହ ହତ୍ୟାରେ ବ୍ୟବହୃତ କୁରାଢିକୁ ମଧ୍ୟ ଜବତ କରାଯାଇଛି ।
