ରାଇରଙ୍ଗପୁର: ଶାଢୀ ଚୋରିକୁ ନେଇ ନିର୍ମମ ହତ୍ୟା । ଶାଢୀ ଚୋରି କରୁଥିବା ସନ୍ଦେହରେ ଯୁବକଙ୍କୁ ଖୁଣ୍ଟରେ ବାନ୍ଧି ପିଟି ପିଟି ମାରିଦେଲେ ଲୋକେ । ଏଭଳି ଏକ ଚାଞ୍ଚଲ୍ୟକର ଘଟଣା ସାମ୍ନାକୁ ଆସିଛି ମୟୂରଭଞ୍ଜ ଜିଲ୍ଲା ବିଶୋଇ ଥାନା ଅନ୍ତର୍ଗତ ଗୁଣ୍ଡୁରିଆ ଗ୍ରାମରୁ । ମୃତକ ହେଲେ ପଥରକଟା ଗାଁର ଘନ ନାଏକ । ବୟସ 40 ବର୍ଷ । ପୋଲିସ ଘଟଣାରେ 2 ଜଣଙ୍କୁ ଗିରଫ କରି କୋର୍ଟ ଚାଲାଣ କରିଛି ।
କଣ ଥିଲା ଘଟଣା ?
ଗତକାଲି(ଶନିବାର) ମୃତ ଘନ ନାଏକଙ୍କ ମୃତଦେହ ବିଶୋଇ ଥାନା ଅନ୍ତର୍ଗତ ଗୁଣ୍ଡୁରିଆ ଗ୍ରାମର ଦଶରଥ ନାଏକଙ୍କୁ ଘରୁ ଉଦ୍ଧାର କରାଯାଇଥିଲା । ଏହାକୁ ଥାନାରେ ଅଭିଯୋଗ କରିଥିଲେ ମୃତକଙ୍କ ମାଆ ଜୁନାଇ ନାଏକ । ବିଶୋଇ ଥାନା ପୋଲିସ ଘଟଣାର ତଦନ୍ତ କରିବା ସହ ଦୁଇ ଭାଇଙ୍କୁ ଗିରଫ କରିଛି ପୋଲିସ । ଗିରଫ ଦୁଇ ଭାଇ ହେଲେ ଦଶରଥ ନାଏକ ଓ ମଙ୍ଗଲ ନାଏକ ।
ଶାଢୀ ଚୋରି ସନ୍ଦେହରେ ହତ୍ୟା:
ପୋଲିସ ପ୍ରାଥମିକ ତଦନ୍ତରୁ ଜାଣିବାକୁ ପାଇଛି ଯେ, ଦଶରଥଙ୍କ ଘରେ କିଛି ଦିନ ହେଲା ଲୁଗାପଟା ଚୋରି ହେଉଥିଲା । ଏହାକୁ ନେଇ ସେ ମୃତ ଘନ ନାଏକଙ୍କ ଉପରେ ସନ୍ଦେହ କରୁଥିଲେ । ଗତକାଲି(ଶନିବାର) ମୃତ ଘନ ଦଶରଥଙ୍କ ଘରେ ପଶିଥିବା ବେଳେ ଚୋର ସନ୍ଦେହରେ ସେମାନେ ତାଙ୍କୁ ଖୁଣ୍ଟରେ ବାନ୍ଧିକି ପିଟିଥିଲେ । ଫଳରେ ତାଙ୍କର ମୃତ୍ୟୁ ଘଟିଥିଲା ।
କଣ କହିଲେ ମୃତକଙ୍କ ମାଆ:
ମୃତକ ଘନ ନାଏକଙ୍କ ମାଆ ଜୁନାଇ ନାଏକଙ୍କ କହିଛନ୍ତି, ‘ଦଶରଥ ନାଏକଙ୍କ ଘର ଲୋକେ ଆସି ମୋତେ କହିଲେ ଯେ ଆମେ ଘନକୁ ବାନ୍ଧି ରଖିଛୁ, ଯାଇକି ତାକୁ ନେଇ ଆସ। ମୁଁ ଯାଇ ଦେଖିଲା ବେଳକୁ ପୁଅ ଘନ ନାଏକ(୪୦) ମୃତଦେହ ପଡିଥିବା ଦେଖିବାକୁ ପାଇଥିଲି ।’
କଣ କହିଲା ପୋଲିସ ?
ରାଇରଙ୍ଗପୁର ଏସଡିପିଓ ଗୋକୁଳାନନ୍ଦ ସାହୁ କହିଛନ୍ତି, ‘ଜୁନାଇ ନାଏକ ଥାନାରେ ଅଭିଯୋଗ କରିଥିଲେ ଯେ ତାଙ୍କ ପୁଅକୁ ଗାଁର ଦୁଇ ଜଣ ପିଲା ପିଟି ପିଟି ହତ୍ୟା କରିଛନ୍ତି । ପୋଲିସର ତଦନ୍ତ ପରେ ସମସ୍ତ ତଥ୍ୟ ପ୍ରମାଣକୁ ଭିତ୍ତି କରି ଦୁଇ ଅଭିଯୁକ୍ତ ଦଶରଥ ଓ ମଙ୍ଗଲକୁ ଗିରଫ କରି ଆଜି କୋର୍ଟ ଚାଲାଣ କରାଯାଇଛି । ତେବେ ପ୍ରାଥମିକ ତଦନ୍ତରୁ ଘନ ନାଏକ ଦଶରଥଙ୍କ ଘରେ ପଶିଥିଲେ । ପୂର୍ବରୁ ଦଶରଥଙ୍କ ଘରୁ ଲୁଗାପଟା ଚୋରି ହୋଇଥିବାରୁ ଘନ ନାଏକଙ୍କୁ ଚୋର ସନ୍ଦେହରେ ବାନ୍ଧିକି ପିଟି ପିଟି ହତ୍ୟା କରିଛନ୍ତି ।’
ଇଟିଭି ଭାରତ, ମୟୂରଭଞ୍ଜ
