ନିଆଳି: ଖୋର୍ଦ୍ଧା ଜିଲ୍ଲା ବାଲିପାଟଣା ଥାନା ଆମଣାକୁଦ ପଞ୍ଚାୟତ କୁଦପାଟଣା ଗ୍ରାମର ପବିତ୍ର ଭୋଇଙ୍କ ପତ୍ନୀ ଲିଜା ରାଣୀ ଦାସ (୨୩)ଙ୍କ ସୋମବାର ଦିନ ସନ୍ଦେହ ଜନକ ଅବସ୍ଥାରେ ମୃତ୍ୟୁ ଘଟିଛି । ମୃତକଙ୍କ ଶାଶୁ ଘର ଲୋକେ ତାଙ୍କୁ ଚିକିତ୍ସା ନିମନ୍ତେ ବାଲିପାଟଣା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ଆଣିଥିବା ବେଳେ ଡାକ୍ତର ତାଙ୍କୁ ମୃତ ଘୋଷଣା କରିଛନ୍ତି । ଯୌତୁକ ପାଇଁ ହତ୍ୟା କରାଯାଇଥିବା ଅଭିଯୋଗ ଆଣିଛନ୍ତି ମୃତ ମହିଳାଙ୍କ ବାପା । ଅନ୍ୟପଟେ ଲିଜା ରାଣୀ ଦାସ ନିଜେ ପରିବାରିକ କଳହ ଯୋଗୁ ଜୀବନ ହାରିଥିବା କହିଛନ୍ତି ଲିଜା ରାଣୀଙ୍କ ଶାଶୁଘର ଲୋକେ ।
ଏହାମଧ୍ୟ ପଢନ୍ତୁ.. ଯୌତୁକ ଜୁଇରେ ଜଳିଲା ଜୀବନ, ନବବଧୂକୁ ତଣ୍ଟି ଚିପି ହତ୍ୟା !
ସୂଚନା ଅନୁଯାୟୀ, କଟକ ଜିଲ୍ଲା କସର୍ଦ୍ଦା ପଞ୍ଚାୟତସ୍ଥିତ ବଢିଆସହି ଗ୍ରାମର ଅକ୍ଷୟ ଦାସଙ୍କ ଝିଅ ଲିଜାରାଣୀ ବାଲିପାଟଣା ଥାନା କୁଦପାଟଣା ଗ୍ରାମର ଫକୀର ଭୋଇଙ୍କ ପୁଅ ପବିତ୍ରଙ୍କୁ ୨୦୧୯ ମସିହା ମେ ' ମାସରେ ବିବାହ କରିଥଲେ । ଅଧିକ ଯୌତୁକ ଦାବିରେ ଶାଶୁଘର ଲୋକେ ଝିଅକୁ ବାରମ୍ବାର ଶାରୀରିକ ଓ ମାନସିକ ନିର୍ଯାତନା ଦେଇ ଆସୁଥିଲେ ବୋଲି ମୃତକଙ୍କ ବାପା ପୋଲିସ ନିକଟରେ ଅଭିଯୋଗ କରିଛନ୍ତି । ଅକ୍ଷୟଙ୍କ ଅଭିଯୋଗ ଅନୁସାରେ ମୃତକଙ୍କ ସ୍ୱାମୀ ପବିତ୍ର ଓ ପରିବାର ଲୋକେ ଝିଅକୁ ମାଡମାରି ଘରୁ ବିଦା କରି ଦେଇଥିଲେ । ଭଦ୍ର ଲୋକଙ୍କ ସହାୟତାରେ ସମାଧାନ ହୋଇ ଲିଜାରାଣୀ ବାପ ଘର ବଢିଆସହିରୁ କୁଦପାଟଣା ଶାଶୁ ଘରକୁ ଆସିଥିଲେ । ଗତ ତିନି ଦିନ ତଳେ ଝିଅକୁ ନିର୍ଯାତନା ଦିଆଯାଇଥିବା ପରିବାର ଲୋକେ ଅଭିଯୋଗ କରିଛନ୍ତି । ଆଜି ହଠାତ୍ ଖବର ପାଇ ମେଡିକାଲରେ ପହଞ୍ଚି ଥିଲେ ପରିବାର ଲୋକେ । ହେଲେ ପରିବାର ଲୋକେ ପହଞ୍ଚିବା ବେଳକୁ ଝିଅର ମୃତ୍ୟୁ ହୋଇସାରିଥିଲା ।
ଲିଜାରାଣୀଙ୍କ ମୃତ୍ୟୁକୁ ନେଇ 2 ପରିବାର ମଧ୍ୟରେ ବିବାଦ ଦେଖିବାକୁ ମିଳିଥିଲା । ପାଖାପାଖି 6 ଘଣ୍ଟା ଧରି ମୃତଦେହ ହସ୍ପିଟାଲରେ ପଡିରହିଥିଲା । ଅନ୍ୟପଟେ ପୋଲିସ ପହଞ୍ଚି ତଦନ୍ତ ଆରମ୍ଭ କରିଛି । ଲିଜାରାଣୀଙ୍କ କିଭଳି ମୃତ୍ୟୁ ହୋଇଛି ଏବଂ ଶାଶୁ ଘର ଲୋକମାନେ ଶାରୀରିକ ଓ ମାନସିକ ନିର୍ଯାତନା ଦେବା ସହିତ ଯୋତିକ ନିର୍ଯାତନା ଦେଉଥିଲେ କି ନାହିଁ ଏହି ଘଟଣାର ବାଲିପାଟଣା ପୋଲିସ୍ ତଦନ୍ତ ଜାରି ରଖିଛି । ବ୍ୟବଛେଦ ରିପୋର୍ଟ ଆସିବା ପରେ ଘଟଣାର ସତ୍ୟାସତ୍ୟ ଜଣା ପଡିବ ବୋଲି ପୋଲିସ ସୂତ୍ରରୁ ସୂଚନା ମିଳିଛି ।
ଇଟିଭି ଭାରତ, ନିଆଳି
