କଟକ: ଆକ୍ସନ ମୋଡ଼ରେ ରାଜ୍ୟ ଭିଜିଲାନ୍ସ ବିଭାଗ । ଜଣକ ପରେ ଜଣେ ଲାଞ୍ଚୁଆ ଅଧିକାରୀ ଭିଜିଲାନ୍ସ ଜାଲରେ ପଡ଼ୁଛନ୍ତି । ଏଥର କିନ୍ତୁ ଯେଉଁ ଅଧିକାରୀ ଭିଜିଲାନ୍ସ ଜାଲରେ ପଡିଛନ୍ତି, ତାଙ୍କ ବିସୟରେ ଜାଣିଲେ ତାଯୁବ ହୋଇଯିବେ । କାରଣ ଇଏ ଏମିତି ଜଣେ ଅଧିକାରୀ ଯିଏ କି ୨୦୦୦ ଟଙ୍କାରେ କାର୍ଯ୍ୟ ଆରମ୍ଭ କରିଥିଲେ । ଆଉ ଚାକିରର ୩୩ ବର୍ଷ ମଧ୍ୟରେ ୧୪ କୋଟିରୁ ଅଧିକ ସମ୍ପତ୍ତି ଅର୍ଜନ କରିଥିବା ଭିଜିଲାନ୍ସ ପକ୍ଷରୁ ସ୍ପଷ୍ଟ କରାଯାଇଛି । ସବୁଠାରୁ ବଡ଼ କଥା ହେଉଛି ଏହି ବାବୁଙ୍କ ଘରୁ 1 କେଜି ସୁନା ଅଳଙ୍କାର ବାହାରିବା ସହ ୫୦ରୁ ଅଧିକ ପ୍ଲଟ ମଧ୍ୟ ରହିଛି । ଭିଜିଲାନ୍ସ ଲାଞ୍ଚୁଆ ଯନ୍ତ୍ରୀ ପ୍ରଦୀପ କୁମାର ରଥଙ୍କୁ ଗିରଫ କରି କୋର୍ଟ ଚାଲାଣ କରିଛି ।
Vigilance Arrests OBCC Additional Chief Engineer (ETV Bharat Odisha) ଆୟ ବହିର୍ଭୁତ ସମ୍ପତି ଠୁଳ ମାମଲାରେ OBCC ମୁଖ୍ୟ ନିର୍ମାଣ ଯନ୍ତ୍ରୀ ପ୍ରଦୀପ ରଥଙ୍କୁ ଗିରଫ ପରେ କୋର୍ଟ ଚାଲାଣ କରିଛି ଭିଜିଲାନ୍ସ । ଦୀର୍ଘ ଦିନ ଧରି ଭିଜିଲାନ୍ସ ରାଡ଼ାରରେ ରହିବା ପରେ ଲାଞ୍ଚ ନେଉଥିବା ବେଳେ ଧରାପଡିଥିଲେ ପ୍ରଦୀପ । ଗତକାଲି ଭୁବନେଶ୍ୱର ସମେତ ଢେଙ୍କାନାଳ, ଯାଜପୁର ଜିଲ୍ଲାରେ ଥିବା ପ୍ରଦୀପଙ୍କ ବାସଭବନରେ ଚଢ଼ାଉ ସମୟରେ ଅନେକ ପ୍ରମାଣ ଭିଜିଲାନ୍ସ ଟିମ ହସ୍ତଗତ କରିଥିଲା । ଭିଜିଲାନ୍ସ ଏସପି ସୁଧାଂଶୁ ମିଶ୍ରଙ୍କ ସୂଚନା ଅନୁଯାୟୀ, ପ୍ରଦୀପ ରଥ ମାସିକ ମାତ୍ର 2 ହଜାର ଟଙ୍କା ଦରମାରେ ଚାକିରୀ ଆରମ୍ଭ କରିଥିଲେ । 33 ବର୍ଷର ଚାକିରୀ ମଧ୍ୟରେ 14 କୋଟିରୁ ଅଧିକ ଟଙ୍କାର ସମ୍ପତ୍ତି ଅର୍ଜନ କରିଥିଲେ । ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ ଓଡ଼ିଶା ସେତୁ ଓ ନିର୍ମାଣ ନିଗମ ବା ଓବିସିସିର ଅତିରିକ୍ତ ମୁଖ୍ୟଯନ୍ତ୍ରୀ ପ୍ରଦୀପ କୁମାର ରଥଙ୍କୁ ଆଜି ଭିଜିଲାନ୍ସ ଦ୍ବାରା ଗିରଫ ହୋଇଛନ୍ତି । ତାଙ୍କ ଠାରୁ ମୋଟ 14 କୋଟିରୁ ଅଧିକ ଟଙ୍କାର ସମ୍ପତ୍ତି ଠାବ ହୋଇ ଥିବା ବେଳେ ମଙ୍ଗଳବାର ଅପରାହ୍ନରେ ଗିରଫ ପରେ ପ୍ରଦୀପ କୁମାର ରଥଙ୍କୁ କୋର୍ଟ ଚାଲାଣ କରିଛି ଭିଜିଲାନ୍ସ ।
ଏତେ ସମ୍ପତି ଆସିଲା କେଉଁଠୁ ?ଭିଜିଲାନ୍ସ ଏସ୍ପିଙ୍କ ସୂଚନା ମୁତାବକ, ପ୍ରଦୀପଙ୍କ ଘରୁ ଏକ କେଜିର ସୁନା ଅଳଙ୍କାର, ୩୦୦ ଗ୍ରାମ ରୁପା, ୧ କୋଟି ୩୮ ଲକ୍ଷ ଟଙ୍କାର ଜମା, 50ଟି ପ୍ଲଟ୍ ସମେତ ମୂଲ୍ୟବାନ ସ୍ଥାବର ଓ ଅସ୍ଥାବର ସମ୍ପତ୍ତି ଜବତ ହୋଇଛି । କଟକ ଭିଜିଲାନ୍ସ ଟିମ୍ ୧୨ଟି ସ୍ଥାନରେ ଚଢ଼ଉ କରି ଥିବା ବେଳେ ତାଙ୍କ ସମ୍ପତ୍ତି ପରିମାଣ ଆହୁରି ବୃଦ୍ଧି ପାଇବ ବୋଲି ଭିଜିଲାନ୍ସ ପକ୍ଷରୁ କୁହାଯାଇଛି । 1991 ମସିହାରେ ମାସିକ ମାତ୍ର 2 ହଜାର ଟଙ୍କା ଦରମାରେ ଚାକିରୀ ଆରମ୍ଭ କରିଥିଲେ ପ୍ରଦୀପ କୁମାର ରଥ । 1999 ମସିହାରେ ସହକାରୀ ଯନ୍ତ୍ରୀ ଭାବେ ଚାକିରୀ ସ୍ଥାୟୀ ହେବା ପରେ ସେ ଢେଙ୍କାନାଳ, ମୟୁରଭଞ୍ଜ, ବାଲେଶ୍ୱର, କେନ୍ଦୁଝର, ଯାଜପୁର, ଭୁବନେଶ୍ୱର ଓ କଟକରେ କାର୍ଯ୍ୟ କରିଥିଲେ । 2001 ପଦୋନତି ପାଇ 2022 ମସିହାରେ ଓବିସିସିର ମୁଖ୍ୟ ଯନ୍ତ୍ରୀ ଭାବେ କାର୍ଯ୍ୟ କରିଆସୁଥିଲେ।
ଏହା ମଧ୍ୟ ପଢ଼ନ୍ତୁ...ଭିଜିଲାନ୍ସ ଜାଲରେ ପୁଣି ଜଣେ କୁବେର ଯନ୍ତ୍ରୀ, ଏକାଧିକ ସ୍ଥାନରେ ଚାଲିଛି ଚଢାଉ - Pradeep Rath in vigilance scanner
ଭିଜିଲାନ୍ସ ଏସ୍ପି ସୁଧାଂଶୁ ମିଶ୍ରଙ୍କ ପ୍ରତିକ୍ରିୟା:
ଏନେଇ କଟକ ଭିଜିଲାନ୍ସ ଏସ୍ପି ସୁଧାଂଶୁ ମିଶ୍ର କହିଛନ୍ତି, "ଆମେ ଗତକାଲି ପ୍ରଦୀପ ରଥଙ୍କ ଭୁବନେଶ୍ବର, ଭଦ୍ରକ, ଯାଜପୁର ରୋଡ ସହ ବିଭିନ୍ନ ଜାଗାରେ ଯାଞ୍ଚ କରିଥିଲୁ । ବର୍ତ୍ତମାନ ସୁଦ୍ଧା କରାଯାଇଥିବା ଯାଞ୍ଚରେ ବ୍ୟାଙ୍କ ଓ ଅନ୍ୟାନ୍ୟ ଯାଞ୍ଚରୁ ମୋଟ 14 କୋଟି ଟଙ୍କାର ସମ୍ପତ୍ତି ବାହାରିଛି । ଆମର ତଦନ୍ତ ଚାଲିଛି । ଏହି ସମ୍ପତ୍ତି ଭିତରେ ଭୁବନେଶ୍ବର, କଟକ, ଖୋର୍ଦ୍ଧା, ଢେଙ୍କାନାଳ ପ୍ରଭୁତି ଜାଗାରେ ପାଖାପାଖି 50ଟି ପ୍ଲଟ ରହିଛି । ଭୁବନେଶ୍ବରରୁ 3ଟି ଫ୍ଲାଟ ମଧ୍ୟ ମିଳିଛି । ଏହାସହ ତାଙ୍କ ବ୍ୟାଙ୍କ ଡିପୋଜିଟ, ଫିକ୍ସଡ୍ ଡୋପୋଜିଟ, ଇନ୍ସ୍ୟୁରାନ୍ସ ରୁ 1.9 କୋଟି ଟଙ୍କା ପାଇଛୁ । ଅନେକ ମେସିନର ସନ୍ଧାନ ମିଳିଛି । ବର୍ତ୍ତମାନ ତଦନ୍ତ ଚାଲିଛି । ଆଗକୁ ଯାହା ବାହାରିବ ତଦନ୍ତ ପରେ ଜଣାପଡ଼ିବ । ଏପର୍ଯ୍ୟନ୍ତ ଆମେ ତାଙ୍କର 10 କୋଟିରୁ ଅଧିକ ଆୟ ପାଇଛୁ ।"
ଇଟିଭି ଭାରତ, କଟକ
