ବଲାଙ୍ଗୀର: ଗତକାଲି(ଗୁରୁବାର) 5T ଆଧାରରେ ସହରର ରୂପାନ୍ତରଣ କାର୍ଯ୍ୟକ୍ରମ ଅନୁଷ୍ଠିତ ହୋଇଛି । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ରାଜ୍ୟର ବିଭିନ୍ନ ପୌରାଞ୍ଚଳର ବିକାଶ ପାଇଁ ଶତାଧିକ ପ୍ରକଳ୍ପର ଶିଳାନ୍ୟାସ ଓ ଉଦଘାଟନ କରିଥିଲେ । ଏହି କାର୍ଯ୍ୟକ୍ରମରେ ମୁଖ୍ୟମନ୍ତ୍ରୀ ବଲାଙ୍ଗୀର ପୌରାଞ୍ଚଳ ପାଇଁ ମୋଟ 213 କୋଟି ଟଙ୍କାର ଉନ୍ନୟନ ମୂଳକ କାମର ଶିଳାନ୍ୟାସ କରିଛନ୍ତି । ସେହିପରି ବଲାଙ୍ଗୀରରେ ପାନୀୟ ଜଳ ବାବଦକୁ 137 କୋଟି ଟଙ୍କାର ପ୍ରକଳ୍ପ ଶିଳାନ୍ୟାସ ହୋଇଛି ।
ବଲାଙ୍ଗୀର ସୁଦପଡା ସ୍ଥିତ କଲ୍ୟାଣ ମଣ୍ଡପରେ ଏହି କାର୍ଯ୍ୟକ୍ରମ ଆୟୋଜିତ ହୋଇଥିଲା । ଏଥିରେ ବଲାଙ୍ଗୀର ପୌରାଞ୍ଚଳର ସମସ୍ତ ଅଧିକାରୀ ତଥା ଅଧ୍ୟକ୍ଷା ଓ କାଉନସିଲରମାନେ ଉପସ୍ଥିତ ଥିଲେ । ଓଡ଼ିଶା ହାଉସିଂ ବୋର୍ଡ ଅଧ୍ୟକ୍ଷ କଳିକେଶ ନାରାୟଣ ସିଂ ଦେଓ ମଧ୍ୟ ଉପସ୍ଥିତ ଥିଲେ । ସହରରେ ଥିବା 17ଟି ପୋଖରୀର ଉନ୍ନତି କରଣ ପାଇଁ ଟଙ୍କା ଅନୁଦାନ, ରାଜୀବ ନଗର ଥିବା ପାର୍କର ଉଦଘାଟନ ମଧ୍ୟ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଏନେଇ ପୌରାଧ୍ୟକ୍ଷା ଲିକା ସାହୁ କହିଛନ୍ତି, "ବଲାଙ୍ଗୀର ପୋୖରାଞ୍ଚଳର ସର୍ବାଙ୍ଗୀନ ଉନ୍ନତି ପାଇଁ ସରକାର ଚେଷ୍ଟିତ ଅଛନ୍ତି । ଏଥିରେ ପୂର୍ବରୁ ଅନେକ ପ୍ରକଳ୍ପ କାମ ଚାଲିଥିବାବେଳେ ନୂଆ ପାର୍କ ସହିତ ପିଇବା ପାଣି ସମସ୍ୟା ପାଇଁ ନୂଆ ପ୍ରକଳ୍ପର ଶିଳାନ୍ୟାସ କରିଛନ୍ତି ମୁଖ୍ୟମନ୍ତ୍ରୀ । ଏହି ପ୍ରକଳ୍ପ ଆସନ୍ତା 2025ରେ ସମ୍ପୂର୍ଣ୍ଣ ହେବ ଓ ବଲାଙ୍ଗୀରର ସମସ୍ତ ୱାର୍ଡବାସୀ ପିଇବା ପାଣି ପାଇବେ ।"
ଏହା ମଧ୍ୟ ପଢନ୍ତୁ...ଦ୍ବିତୀୟ ପର୍ଯ୍ୟାୟରେ ୨୮୮ ବ୍ଲକର ୨୦୦୦ ଗ୍ରାମରେ ଖୋଲିଲା ଆମ ବ୍ୟାଙ୍କ
ଏହା ମଧ୍ୟ ପଢନ୍ତୁ...ମୁଖ୍ୟମନ୍ତ୍ରୀଙ୍କ ଘୋଷଣା, ସବୁ ଜିଲ୍ଲାରେ ଖୋଲିବ ବିଜ୍ଞାନ କେନ୍ଦ୍ର ଓ ପ୍ଲାନେଟୋରିୟମ
ସେହିପରି ରାଜ୍ୟ ହାଉସିଂ ବୋର୍ଡ ଅଧ୍ୟକ୍ଷ କଳିକେଶ ନାରାୟଣ ସିଂ ଦେଓ କହିଛନ୍ତି, "ପୂର୍ବରୁ ବଲାଙ୍ଗୀର ପାଣି ସମସ୍ୟା ଦୂର କରିବା ପାଇଁ ବିଜୁ ପଟ୍ଟନାୟକ ମହାନଦୀରୁ ପାଣି ଆଣିଥିଲେ । ସେହିପରି 2013ରେ ବିଧାୟକ ଏ ୟୁ ସିଂହ ଦେଓଙ୍କ ପ୍ରଚେଷ୍ଟାରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ତେଲନଦୀରୁ ପାଣି ଆଣିଥିଲେ । ସେହିପରି ଏବେ ସହର ବଢିଥିବାବେଳେ କିଛି ଅଞ୍ଚଳରେ ପାନୀୟ ଜଳର ସମସ୍ୟା ରହିଥିଲା। ତେବେ ନବୀନ ସରକାର ପୁଣି 137 କୋଟି ଟଙ୍କାରେ ନୂଆ ପ୍ରକଳ୍ପ ଶିଳାନ୍ୟାସ କରିଛନ୍ତି । ଯାହାଦ୍ୱାରା ଲକ୍ଷେରୁ ଉର୍ଦ୍ଧ୍ବ ଲୋକ ପିଇବା ପାଣି ପାଇବେ।"
ଇଟିଭି ଭାରତ, ବଲାଙ୍ଗୀର
