ବୌଦ୍ଧ: ପାର୍ବଣରେ ପରିବେଶ ଚିନ୍ତା । ଜିଲ୍ଲାର ସର୍ବବୃହତ ଗ୍ରାମର ପୁଷ୍କରିଣୀକୁ ସ୍ବଚ୍ଛ ତଥା ବିଭିନ୍ନ କୀଟ ପତଙ୍ଗ, ପକ୍ଷୀ ତଥା ଜଳଚର ପ୍ରାଣୀମାନଙ୍କ ସୁରକ୍ଷାର ବାର୍ତ୍ତା ଓ ସଚେତନତା ସୃଷ୍ଟି ଉଦ୍ଦେଶ୍ୟରେ ପୁଷ୍କରିଣୀରେ ତିଆରି ହୋଇଛି ପୂଜା ମଣ୍ଡପ । ପୁଷ୍କରିଣୀ ଭିତରେ ଅଭିନବ ଶୈଳୀରେ ଯୁବ ଗୋଷ୍ଠୀ ପରିବେଶ ଓ ପ୍ରାଣୀସମ୍ପଦ ସୁରକ୍ଷାର ବାର୍ତ୍ତା ପ୍ରଚାର କରୁଛନ୍ତି । ଯାହାକି ବିଜୟା ଦଶମୀରେ ସମସ୍ତଙ୍କ ଆକର୍ଷଣର କେନ୍ଦ୍ରବିନ୍ଦୁ ପାଲଟିଛି ।
- ମା’ ଭୈରବୀଙ୍କ ପୀଠରେ ବିଜୟା ଦଶମୀ
ଶାରଦୀୟ ଦୁର୍ଗାପୂଜା ପାଇଁ ସବୁଆଡେ ଉତ୍ସବର ମାହୋଲ ସୃଷ୍ଟି ହୋଇଛି । ବୈଦ୍ଧ ଜିଲ୍ଲାର ଆରାଧ୍ୟ ଦେବୀ ପୁରୁଣା କଟକ ସ୍ଥିତ ମା’ ଭୈରବୀଙ୍କ ପୀଠରେ ବିଜୟା ଦଶମୀ ଅବସରରେ ମା’ଭୈରବୀଙ୍କ ଦର୍ଶନ ପାଇଁ ପ୍ରବଳ ଜନସମାଗମ ହୋଇଛି । ଏହାଛଡା ବୌଦ୍ଧ ଜିଲ୍ଲାର ତିନୋଟି ବ୍ଲକର ଶହ ଶହ ସ୍ଥାନରେ ଥିବା ଶକ୍ତିପୀଠ ତଥା ପୂଜା ମଣ୍ଡପ ଗୁଡିକରେ ଦଶହରାରେ ଉତ୍ସବର ମାହୋଲ ସୃଷ୍ଟି ହୋଇଛି । ଆଲୋକମାଳାରେ ପୂଜା ମଣ୍ଡପଗୁଡିକ ଝଲସୁଛି । ବିଭିନ୍ନ ସ୍ଥାନରୁ ଶ୍ରଦ୍ଧାଳୁଙ୍କ ଭିଡ ମଧ୍ୟ ବଢିବାରେ ଲାଗିଛି ।
- ପୁଷ୍କରିଣୀ ମଧ୍ୟରେ ପୂଜା ମଣ୍ଡପ, ପ୍ରକୃତି ସୁରକ୍ଷାର ବାର୍ତ୍ତା
ଜିଲ୍ଲାର ସର୍ବବୃହତ ଗ୍ରାମ ସରସରା ଠାରେ ଅଭିନବ ଶୈଳୀରେ ବିଜୟା ଦଶମୀ ପାଳନ କରାଯାଇଛି । ଗ୍ରାମର ପୁଷ୍କରିଣୀ ମଧ୍ୟରେ ପ୍ରତ୍ୟେକ ବର୍ଷ ଭଳି ସ୍ବତନ୍ତ୍ର ମଣ୍ଡପରେ ମହାକାଳଙ୍କୁ ଆରାଧନା କରାଯିବା ସହିତ ପରିବେଶ ଓ ପ୍ରାଣୀସମ୍ପଦ ସୁରକ୍ଷାର ବାର୍ତ୍ତା ପ୍ରଚାର କରାଯାଇଛି । ମହୁମାଛି, ପ୍ରଜାପତି ଭଳି ବିଭିନ୍ନ କୀଟ ପତଙ୍ଗଠାରୁ ନେଇ କୁମ୍ଭୀର, କଇଁଛ, ହଂସ ଭଳି ବିଭିନ୍ନ ଜଳଚର ଜୀବଙ୍କ ସୁରକ୍ଷା ପାଇଁ ସମସ୍ତେ ଆଗେଇ ଆସିବାକୁ ସଚେତନ କରାଇବା ସହିତ ପରିବେଶ ସୁରକ୍ଷା ପାଇଁ ମଧ୍ୟ ସଚେତନ କରାଯାଉଛି । ଏହି ମଣ୍ଡପ ପରିଦର୍ଶନ କରିବା ବେଳେ ଭକ୍ତିମାନେ ପରିବେଶ ଓ ଅନ୍ୟ ଜୀବଜନ୍ତୁଙ୍କ ସୁରକ୍ଷା ପ୍ରତି ସଚେତନ ହେବାର ବାର୍ତ୍ତା ପାଇବେ ବୋଲି କହିଛନ୍ତି ଆୟୋଜକ । ଚଳିତ ବର୍ଷ ପାର୍ବଣରେ ଏହି ଅଭିନବ ଶୈଳୀରେ ପରିବେଶ ସୁରକ୍ଷାର ବାର୍ତ୍ତା ସମସ୍ତଙ୍କ ଆକର୍ଷଣର କେନ୍ଦ୍ରବିନ୍ଦୁ ପାଲଟିଛି ।
ଇଟିଭି ଭାରତ, ବୌଦ୍ଧ
