ଭୁବନେଶ୍ବର: ପରଲୋକରେ କେନ୍ଦ୍ରମନ୍ତ୍ରୀ ଜୁଏଲ ଓରାମଙ୍କ ପତ୍ନୀ ଝିଙ୍ଗିଆ ଓରାମ । ଡେଙ୍ଗୁରେ ଆକ୍ରାନ୍ତ ହୋଇ ଭୁବନେଶ୍ବରର ଏକ ଘରୋଇ ହସ୍ପିଟାଲରେ ଚିକିତ୍ସାଧୀନ ଥିବା ବେଳେ ଗତକାଲି ରାତିରେ ତାଙ୍କର ଦେହାନ୍ତ ହୋଇଛି । ଆଜି ତାଙ୍କର ଶେଷକୃତ୍ୟ ସମ୍ପନ୍ନ ହେବ । ମୃତ୍ୟୁ ବେଳକୁ ତାଙ୍କୁ 58 ବର୍ଷ ବୟସ ହୋଇଥିଲା । ଡେଙ୍ଗୁରେ ପୀଡିତ ହେବା ପରେ ପ୍ରାୟ ଏକ ସପ୍ତାହେ ଧରି ସେ ଭୁବନେଶ୍ବରର ଏକ ଘରୋଇ ହସ୍ପିଟାଲରେ ଚିକିତ୍ସିତ ହେଉଥିଲେ । ଶରୀରର ପ୍ଲେଟଲେଟ ହ୍ରାସ ପାଇବାରୁ ତାଙ୍କର ଅବସ୍ଥା ସଙ୍କଟାପନ୍ନ ରହିଥିଲା । ଗତକାଲି ରାତି ପ୍ରାୟ 10ଟା 30 ସମୟରେ ସେ ଶେଷନିଶ୍ବାସ ତ୍ୟାଗ କରିଛନ୍ତି । ଝିଙ୍ଗିଆ ଓରାମଙ୍କ ଦେହାନ୍ତରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଶୋକବ୍ୟକ୍ତ କରିବା ସହ ଶେଷଦର୍ଶନ ମଧ୍ୟ କରିଛନ୍ତି । କେନ୍ଦ୍ରମନ୍ତ୍ରୀ ଜୁଏଲ ଓରମା ମଧ୍ୟ ଡେଙ୍ଗୁରେ ପୀଡିତ ଅଛନ୍ତି ।
ଶେଷଦର୍ଶନ କଲେ ମୁଖ୍ୟମନ୍ତ୍ରୀ:
ମୁଖ୍ୟମନ୍ତ୍ରୀ ଟ୍ବିଟ୍ କରି ଲେଖିଛନ୍ତି,‘‘ଆମ ଦଳର ବରିଷ୍ଠ ନେତା ତଥା କେନ୍ଦ୍ରମନ୍ତ୍ରୀ ଜୁଏଲ ଓରାମଙ୍କ ଧର୍ମପତ୍ନୀ ଝିଙ୍ଗିଆ ଓରାମଙ୍କ ପାର୍ଥିବ ଶରୀରର ଶେଷ ଦର୍ଶନ କରି ପୁଷ୍ପମାଲ୍ୟ ଅର୍ପଣ କଲି । ତାଙ୍କ ଅମର ଆତ୍ମାର ସଦଗତି କାମନା କରିବା ସହ ଶୋକସନ୍ତପ୍ତ ପରିବାର ବର୍ଗଙ୍କୁ ସମବେଦନା ଜଣାଉଛି ।’’
ଆମ ଦଳର ବରିଷ୍ଠ ନେତା ତଥା କେନ୍ଦ୍ରମନ୍ତ୍ରୀ ଶ୍ରୀ ଜୁଏଲ ଓରାମଙ୍କ ଧର୍ମପତ୍ନୀ ଶ୍ରୀମତୀ ଝିଙ୍ଗିଆ ଓରାମଙ୍କ ପାର୍ଥିବ ଶରୀରର ଶେଷ ଦର୍ଶନ କରି ପୁଷ୍ପମାଲ୍ୟ ଅର୍ପଣ କଲି I ତାଙ୍କ ଅମର ଆତ୍ମାର ସଦଗତି କାମନା କରିବା ସହ ଶୋକସନ୍ତପ୍ତ ପରିବାର ବର୍ଗଙ୍କୁ ସମବେଦନା ଜଣାଉଛି ।
— Mohan Charan Majhi (@MohanMOdisha) August 18, 2024
ଓଁ ଶାନ୍ତି🙏 pic.twitter.com/HXg7jMTl3I
ଡେଙ୍ଗୁରେ ପୀଡିତ ଅଛନ୍ତି ଜୁଏଲ:
ଉଭୟ ଜୁଏଲ ଓ ତାଙ୍କ ପତ୍ନୀ ଡେଙ୍ଗୁରେ ଆକ୍ରାନ୍ତ ହେବା ପରେ ହସ୍ପିଟାଲରେ ଭର୍ତ୍ତି ହୋଇଥିଲେ । ଜୁଏଲ ଓରମାଙ୍କ ଅବସ୍ଥା ଗୁରୁତର ହେବାରୁ ତାଙ୍କୁ ଆଇସିୟୁରେ ମଧ୍ୟ ଭର୍ତ୍ତି କରାଯାଇଥିଲା । ସ୍ବାସ୍ଥ୍ୟବସ୍ଥାରେ ସାମାନ୍ୟ ଉନ୍ନତି ପରିଲଖିତ ହେବାରୁ ତାଙ୍କୁ ଆଇସିୟୁରୁ ଜେନେରାଲ ଓ୍ବାର୍ଡକୁ ଅଣାଯାଇଥିଲା । ଏବେ ସେ ହସ୍ପିଟାଲରୁ ଡିସଚାର୍ଜ ହୋଇସାରିଛନ୍ତି । କିନ୍ତୁ ପତ୍ନୀ ଝିଙ୍ଗିଆଙ୍କ ଶରୀରରେ ପ୍ଲେଟଲେଟ ମାତ୍ରା କମିବାରୁ ତାଙ୍କ ସ୍ଥିତି ସଙ୍କଟାପନ୍ନ ହୋଇଥିଲା । ଗତକାଲି ରାତିରେ ସେ ଶେଷନିଶ୍ବାସ ତ୍ୟାଗ କରିଛନ୍ତି । ପତ୍ନୀଙ୍କ ବିୟୋଗରେ ଭାଙ୍ଗି ପଡିଛନ୍ତି ଜୁଏଲ ।
ଆଜି ଶେଷକୃତ୍ୟ:
ଗତକାଲି ରାତିରେ ଝିଙ୍ଗିଆ ଓରାମଙ୍କ ଦେହାନ୍ତ ହେବା ପରେ ଶେଷ ଦର୍ଶନ ପାଇଁ ଲୁମ୍ବିନି ବିହାର ସ୍ଥିତ ବାସଭବନକୁ ଅଣାଯାଇଥିଲା । ସେଠାରେ ବହୁ ବିଶିଷ୍ଟ ବ୍ୟକ୍ତିବିଶେଷ ଓ ବିଜେପି ନେତା ତାଙ୍କର ଶେଷଦର୍ଶନ କରିଥିଲେ । ମୁଖ୍ୟମନ୍ତ୍ରୀ ମଧ୍ୟ ଶେଷଦର୍ଶନ କରି ଅମର ଆତ୍ମାର ସଦଗତି କାମନା କରିଥିଲେ । ଆଜି ସୁନ୍ଦରଗଡର କେନ୍ଦୁଡିହିରେ ଶେଷକୃତ୍ୟ ସମ୍ପନ୍ନ ହେବ । ତାଙ୍କର ଦୁଇ ଝିଅ ମଧ୍ୟ ରହିଛନ୍ତି । ଜୁଏଲ ଓରମାଙ୍କ ରାଜନୈତିକ ଯାତ୍ରା ପଛରେ ଝିଙ୍କିଆଙ୍କ ମହତ୍ତ୍ବପୂର୍ଣ୍ଣ ଭୂମିକା ରହିଛି ।
କେନ୍ଦୁଡିହିରେ ପହଞ୍ଚିଲା ମରଶରୀର:
ଶେଷକୃତ୍ୟ ପାଇଁ କେନ୍ଦ୍ରମନ୍ତ୍ରୀ ଜୁଏଲ ଓରାମଙ୍କ ପତ୍ନୀ ଝିଙ୍ଗିଆ ଓରାମ ମରଶରୀର ଆଜି ସକାଳ ୧୦ ଘଟିକା ସମୟରେ ନିଜ ଗାଁ କେନ୍ଦୁଡିହିରେ ପହଞ୍ଚିଥିଲା । ଜିଲ୍ଲାପାଳ, ଉପଜିଲ୍ଲାପାଳ ସମେତ ସମସ୍ତ ପ୍ରଶାସନିକ ଅଧିକାରୀ, ଦଳୀୟ କାର୍ଯ୍ୟକର୍ତ୍ତା ଏବଂ ସମସ୍ତ ରାଜନୈତିକ ଦଳର ନେତୃବୃନ୍ଦ ସହ ଶତାଧିକ ଜନ ସାଧାରଣ ଯୋଗ ଦେଇ ଶ୍ରଦ୍ଧାଞ୍ଜଳି ଜ୍ଞାପନ କରିଥିଲେ । ତାଙ୍କର ମୃତ୍ୟୁ ପରେ ବଣାଇ, ସୁନ୍ଦରଗଡ଼ ସମେତ ସାରା ଓଡ଼ିଶାରେ ଶୋକର ଛାୟା ଖେଳିଯାଇଛି ।
'ମୋ ପତ୍ନୀ ମୋ ପାଇଁ ସବୁକିଛି ଥିଲେ ':
ଏନେଇ ଜୁଏଲ ଓରାମ କହିଛନ୍ତି," ଗତକାଲି ମୋ ଧର୍ମପତ୍ନୀଙ୍କ ଦେହାନ୍ତ ହୋଇଯାଇଛି । ସେ ଡେଙ୍ଗୁରେ ପୀଡିତ ଥିଲେ । ତାଙ୍କର ପୂର୍ବରୁ ଲଙ୍ଗସରେ ଫିବ୍ରୋସିସ ହୋଇଥିଲା । ଡେଙ୍ଗୁ ହେବା ପରେ ଶରୀର ଅଧିକ ଅସୁସ୍ଥ ହୋଇପଡ଼ିଥିଲା । ପରେ ରକ୍ତବାନ୍ତି ହେଲା, ଡାକ୍ତର ମାନେ ଚେଷ୍ଟା କରିବା ପରେ ବିଫଳ ହୋଇଥିଲେ । ମୋ ପତ୍ନୀ ମୋ ପାଇଁ ସବୁକିଛି ଥିଲେ । ମୋ ସଫଳ ରାଜନୀତି ଜୀବନରେ ତାଙ୍କର ସବୁଠୁ ଅଧିକ ଯୋଗଦାନ ରହିଛି । ମୁଁ ଚାହୁଁଛି ଆସନ୍ତା ୭ ଜନ୍ମ ଯାଏଁ ମୋ ସହ ତାଙ୍କର ସମ୍ପର୍କ ଯୋଡି ହେଇଥାଉ ।"
ଇଟିଭି ଭାରତ, ଭୁବନେଶ୍ବର
